തൃശൂരിൽ ആശുപത്രി കെട്ടിടത്തിന് മുകളിൽ നിന്ന് ചാടി എംബിബിഎസ് വിദ്യാർത്ഥിനി ആത്മഹത്യ ചെയ്തു; പൊലീസ് അന്വേഷണം ആരംഭിച്ചു

തൃശൂർ: തൃശൂരിൽ എംബിബിഎസ് വിദ്യാർത്ഥിനി ആശുപത്രി ഹോസ്റ്റൽ കെട്ടിടത്തിൽ നിന്ന് ചാടി ആത്മഹത്യ ചെയ്തു. ജൂബിലി മിഷൻ ആശുപത്രി ഹോസ്റ്റലിലെ നാലാം നിലയിൽ നിന്ന് ചാടിയാണ് ഒന്നാം വർഷ എംബിബിഎസ് വിദ്യാർത്ഥിനി മരിച്ചത്. കോട്ടയം സ്വദേശിനി സ്‌നേഹ പൗലോസ് (20) ആണ് മരിച്ചത്.

വിവരമനുസരിച്ച് രാവിലെ 11 മണിയോടെയായിരുന്നു സംഭവം. ഉടൻതന്നെ ആശുപത്രിയിലെ തീവ്രപരിചരണ വിഭാഗത്തിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. ആത്മഹത്യയുടെ കാരണം വ്യക്തമല്ലെന്ന് പൊലീസ് അറിയിച്ചു. സംഭവത്തിൽ ഈസ്റ്റ് പൊലീസ് സ്ഥലത്തെത്തി അന്വേഷണം ആരംഭിച്ചിട്ടുണ്ട്.

വിവരമറിഞ്ഞ് വിദ്യാർത്ഥിനിയുടെ കുടുംബം തൃശൂരിലേക്ക് തിരിച്ചിട്ടുണ്ട്. എംബിബിഎസ് പഠനത്തിൽ താത്പര്യമില്ലായിരുന്നുവെന്ന സഹപാഠികളുടെ മൊഴി ലഭിച്ചതായും, ഇത് ഉൾപ്പെടെ പരിശോധിച്ചുവരികയാണെന്നും പൊലീസ് വ്യക്തമാക്കി.