ശബരിമല സ്വർണക്കൊള്ള കേസിൽ മുൻ ദേവസ്വം ബോർഡ് പ്രസിഡന്റ് പി.എസ്. പ്രശാന്തിനെ നാലാം പ്രതിയാക്കി ഹൈക്കോടതി ഇടക്കാല ഉത്തരവ് പുറപ്പെടുവിച്ചു. ഗൂഢാലോചനയിൽ അദ്ദേഹത്തിന് പങ്കുണ്ടെന്നതിന് അന്വേഷണത്തിൽ തെളിവുകൾ ലഭിച്ചിട്ടുണ്ടെന്ന് കോടതി നിരീക്ഷിച്ചു. 2025ൽ ദ്വാരപാലക ശിൽപങ്ങൾ ചെന്നൈയിലേക്ക് കൊണ്ടുപോയ സംഭവവുമായി ബന്ധപ്പെട്ട കേസിലാണ് നടപടി.
കേസിൽ ആകെ ഏഴ് പ്രതികളാണുള്ളത്. മുരാരി ബാബു ഒന്നാം പ്രതിയും ഉണ്ണികൃഷ്ണൻ പോറ്റി രണ്ടാം പ്രതിയും പങ്കജ് ഭണ്ഡാരി മൂന്നാം പ്രതിയുമാണ്. അജി കുമാർ, കണ്ഠരര് രാജീവര് എന്നിവരാണ് മറ്റ് പ്രതികൾ.
അന്വേഷണത്തിനിടെ ശേഖരിച്ച തെളിവുകൾ പ്രകാരം ഏഴ് പ്രതികളുടെയും പങ്കാളിത്തം വ്യക്തമായതായി എസ്ഐടി റിപ്പോർട്ടിൽ പറയുന്നു. മുൻകൂട്ടി ആസൂത്രണം ചെയ്ത ക്രിമിനൽ ഗൂഢാലോചനയുടെ ഭാഗമായാണ് ഇവർ പ്രവർത്തിച്ചതെന്നും വിശ്വാസവഞ്ചന, രേഖാ വ്യാജം, ക്രിമിനൽ ഗൂഢാലോചന തുടങ്ങിയ കുറ്റങ്ങൾ ഇവർക്കെതിരെ നിലനിൽക്കുന്നതായും റിപ്പോർട്ടിൽ വ്യക്തമാക്കുന്നു. ഇതിന്റെ അടിസ്ഥാനത്തിൽ ബി.എൻ.എസ്.എസ് വ്യവസ്ഥകൾ പ്രകാരം കർശന നിയമനടപടികൾ സ്വീകരിക്കണമെന്ന് എസ്ഐടി ശുപാർശ ചെയ്തതായി കോടതി രേഖപ്പെടുത്തി. അന്വേഷണം വേഗത്തിൽ പൂർത്തിയാക്കി അന്തിമ റിപ്പോർട്ട് സമർപ്പിക്കാനും കോടതി നിർദേശിച്ചു.
2025ൽ സ്വർണം പൂശുന്നതിനായി ദ്വാരപാലക ശിൽപങ്ങൾ ചെന്നൈയിലേക്ക് കൊണ്ടുപോയ സംഭവത്തിൽ അന്വേഷണം നടത്താൻ ഹൈക്കോടതി നേരത്തെ നിർദേശം നൽകിയിരുന്നു. ഈ വിഷയത്തിൽ ഗുരുതര വീഴ്ചകൾ ഉണ്ടായതായി ചൂണ്ടിക്കാട്ടി സ്പെഷ്യൽ കമ്മിഷണർ സമർപ്പിച്ച റിപ്പോർട്ടിന്റെ അടിസ്ഥാനത്തിലാണ് അന്വേഷണം പുരോഗമിക്കുന്നത്. ഗുരുതര കുറ്റവകുപ്പുകളാണ് പ്രതികൾക്കെതിരെ ചുമത്തിയിരിക്കുന്നതെന്നും എസ്ഐടി അറിയിച്ചു.
