ആലപ്പുഴ: സൈബര് തട്ടിപ്പിലൂടെ നഷ്ടപ്പെട്ട പണം വീണ്ടെടുക്കാനായി ആരംഭിച്ച പദ്ധതിയിലൂടെ ജില്ലയില് നിന്ന് വീണ്ടെടുത്തത് എട്ട് ലക്ഷത്തില്പരം രൂപ. ഓണ്ലൈന് സാമ്പത്തിക തട്ടിപ്പിനിരയായവരുടെ നഷ്ടപ്പെട്ട തുക തിരികെ ലഭ്യമാക്കുന്നതിനായി കേന്ദ്ര ആഭ്യന്തര മന്ത്രാലയത്തിന്റെ കീഴിലുള്ള നാഷണല് സൈബര് ക്രൈം റിപ്പോര്ട്ടിങ് പോര്ട്ടല് (എന്.സി.ആര്.പി) ല് മണി റീസ്റ്റോറേഷന് മൊഡ്യൂള്(എം.ആര്.എം) എന്ന സംവിധാനം വഴി ജില്ലയില് ഇതുവരെ 321 ബാങ്ക് അക്കൗണ്ടുകളില് നിന്ന് 8,06,794 രൂപയാണ് സൈബര് സാമ്പത്തിക തട്ടിപ്പിനിരയായ പരാതിക്കാര്ക്ക് തിരികെ ലഭ്യമാക്കിയത്്.
സൈബര് തട്ടിപ്പ് കേസുകളിലെ അന്വേഷണത്തിന്റെ ഭാഗമായി സംശയാസ്പദ അക്കൗണ്ടുകളില് മരവിപ്പിച്ച തുകയില് നിന്ന് പരാതിക്കാരന് തിരികെനല്കാന് കഴിയുന്ന തുക ബാങ്കുകള് റിസ്റ്റോറബിള് എമൗണ്ട് ആയി എം.ആര്.എം പോര്ട്ടലില് അപ്ഡേറ്റ് ചെയ്യുന്നുണ്ട്. നിലവില് പ്രധാനമായും ഒരു ബാങ്ക് അക്കൗണ്ടില് 50,000/ല് താഴെ ഹോള്ഡ് ചെയ്തിട്ടുള്ള തുകകള് ഈ സംവിധാനത്തിന്റെ പരിധിയില് ഉള്പ്പെടുത്തി നടപടികള് നടപ്പിലാക്കി വരികയാണ്.ബാങ്കുകള് റീസ്റ്റോറബിള് എമൗണ്ട് അപ്ഡേറ്റ് ചെയ്തിട്ടും നിരവധി പരാതിക്കാര് അവബോധക്കുറവ് മൂലം മണി റീസ്റ്റോറേഷന് മൊഡ്യൂള് റിക്വസ്റ്റ് സമര്പ്പിക്കാത്ത സാഹചര്യം നിലവിലുണ്ട്.
അതിനാല് എന്.കി.ആര്.പി പോര്ട്ടലില് ഓണ്ലൈന് സാമ്പത്തിക തട്ടിപ്പ് പരാതി രജിസ്റ്റര് ചെയ്തിട്ടുള്ള എല്ലാ പരാതിക്കാരും എം.ആര്.എം. സിറ്റിസണ് പോര്ട്ടലില് ലോഗിന് ചെയ്ത് തങ്ങളുടെ പരാതിയില് റീസ്റ്റോറബിള് എമൗണ്ട് ലഭ്യമാണോ എന്ന് പരിശോധിക്കുകയും, ലഭ്യമാണെങ്കില് കാലതാമസം കൂടാതെ മണി റീസ്റ്റോറേഷന് റിക്വസ്റ്റ് സമര്പ്പിച്ച് ഈ സൗകര്യം പ്രയോജനപ്പെടുത്തുകയും ചെയ്യണമെന്ന് ആലപ്പുഴ ജില്ലാ പോലീസ് അറിയിച്ചു.
നഷ്ടപ്പെട്ട പണം വീണ്ടെടുക്കാന്
പരാതിക്കാര് എം.ആര്.എം സിറ്റിസണ് പോര്ട്ടല് (http-s:mrmncrp.mha.gov.in/lo-gin) സന്ദര്ശിച്ച്, NCRP Public Portal (h-ttps:cybercrime.gov.in) മുഖേനയോ സൈബര് ഹെല്പ്പല്ലൈന് നമ്പര് 1930 മുഖേനയോ പരാതി രജിസ്റ്റര് ചെയ്തപ്പോള് നല്കിയ മൊബൈല് നമ്പര് ഉപയോഗിച്ച് ഒ.ടി.പി വഴി ലോഗിന് ചെയ്ത്, തങ്ങളുടെ പരാതിയില് തുക ലഭ്യമാണോ എന്ന് പരിശോധിക്കാവുന്നതാണ്. ബാങ്കുകള് റീസ്റ്റോറബിള് തുക അപ്ഡേറ്റ് ചെയ്തിട്ടുള്ള കേസുകളില് മാത്രമേ റിക്വസ്റ്റ്സമര്പ്പിക്കാന് സാധിക്കുകയുള്ളു. പരാതിക്കാരന് അപേക്ഷ സമര്പ്പിച്ച ശേഷം, ബന്ധപ്പെട്ട പോലീസ് സ്റ്റേഷനിലെ അന്വേഷണ ഉദ്യോഗസ്ഥന് അപേക്ഷ പരിശോധിച്ച് ആവശ്യമായ രേഖകളും വിവരങ്ങളും അപ്ലോഡ് ചെയ്ത് ബന്ധപ്പെട്ട ബാങ്കിലേക്ക് കൈമാറുന്നതോടെയാണ് തുക തിരിച്ചുനല്കുന്നതിനുള്ള നടപടികള് ബാങ്ക് ആരംഭിക്കുന്നത്.
