ബോളിവുഡിന്റെ മാത്രമല്ല ഇന്ത്യന് സിനിമയിലെ തന്നെ ലേഡി സൂപ്പര്സ്റ്റാറായിരുന്ന ശ്രീദേവി കപൂറിന്റെ മകള് ജാന്വി കപൂര് അമ്മയുടെ പാത പിന്തുടര്ന്ന് ബോളിവുഡില് തന്റേതായ ഇടം നേടിയെടുത്ത താരപുത്രിയാണ്. ഗ്ലാമറസ് വെസ്റ്റേൺ ഔട്ട്ഫിറ്റുകൾ മുതൽ പരമ്പരാഗത സാരികൾ വരെയണിഞ്ഞ് തന്റെ ട്രെൻഡി ലുക്കുകളിലൂടെയും ഫാഷൻ പരീക്ഷണങ്ങളിലൂടെയും ഫാഷൻ പ്രേമികളുടെ പ്രിയപ്പെട്ട താരമായി മാറാനും ജാന്വിക്ക് കഴിഞ്ഞിട്ടുണ്ട്. സോഷ്യല് മീഡിയയില് ജാന്വി പങ്കിടുന്ന ചിത്രങ്ങളെല്ലാം വളരെ വേഗത്തില് തരംഗമായി മാറാറുണ്ട്.
ഇപ്പോഴിതാ സെലിബ്രിറ്റി ഡിസൈനര് മനീഷ് മല്ഹോത്ര ഡിസൈന് ചെയ്ത സാരിയില് അതിസുന്ദരിയായ ചിത്രങ്ങള് പങ്കിടുകയാണ് ജാന്വി കപൂര്. തന്റെ സഹോദരി അൻഷുല കപൂറിന്റെയും രോഹൻ തക്കറിന്റെയും വെഡ്ഡിംഗ് റിസപ്ഷനില് ജാന്വി തിളങ്ങിയത് ഈ സാരിയിലാണ്. സാരിയഴകിലുള്ള ചിത്രങ്ങള് പങ്കിടുന്നതിനൊപ്പം തന്റെ പ്രിയപ്പെട്ട ഡിസൈനര് മനീഷ് പാരീസ് കോച്ചർ വീക്കിൽ അരങ്ങേറ്റം കുറിക്കുന്നതിനുള്ള ആശംസയും ജാന്വി പങ്കിടുന്നുണ്ട്. സ്വന്തം മാതൃപാരമ്പര്യത്തിൽ നിന്നുള്ള നെയ്ത കാഞ്ചീവരം സാരി ധരിച്ച സന്തോഷവും താരം കുറിക്കുന്നു.
‘‘ഇന്ന്, എന്റെ ഗോഡ്ഫാദർ, എന്റെ ഉപദേഷ്ടാവ്, എന്റെ വഴികാട്ടി, എന്റെ സുരക്ഷിത ഇടം, എന്റെ ഏറ്റവും സത്യസന്ധനായ വിശ്വസ്തൻ ഒക്കെയായ മനീഷ് മല്ഹോത്ര പാരീസ് കോച്ചർ വീക്കിൽ അരങ്ങേറ്റം കുറിക്കുന്നു.
കുട്ടിക്കാലം മുതൽ തന്നെ അദ്ദേഹത്തിന്റെ പ്രതിഭയെയും, സർഗ്ഗാത്മകതയെയും, അഭിനിവേശത്തെയും ഞാൻ അഭിനന്ദിച്ചിട്ടുണ്ട്, ഈ നാഴികക്കല്ല് വികസിക്കുന്നത് കാണുമ്പോൾ എനിക്ക് ഇതിലും അഭിമാനിക്കാനാവില്ല. ഇന്നത്തെ ശേഖരം അസാധാരണമായ കരകൗശല വൈദഗ്ധ്യത്തിന്റെ പ്രദർശനം മാത്രമല്ല, അദ്ദേഹത്തിന് ഏറ്റവും പ്രിയപ്പെട്ട വ്യക്തിക്ക്...അദ്ദേഹത്തിന്റെ അമ്മയ്ക്ക്...ആഴത്തിലുള്ള വ്യക്തിപരമായ ആദരാഞ്ജലി കൂടിയാണെന്ന് എനിക്കറിയാം.
നമ്മുടെ അമ്മമാരെയും നമ്മുടെ വേരുകളെയും ആഘോഷിക്കുന്നതിന്റെ അതേ വികാരം പങ്കിടുന്നതിനാൽ ഇന്ന് നിങ്ങളുടെ മനോഹരമായ സൃഷ്ടികളിൽ ഒന്ന് ധരിക്കുന്നത് വളരെ അർത്ഥവത്തായി തോന്നുന്നു. എന്റെ സ്വന്തം മാതൃപാരമ്പര്യത്തിൽ നിന്നുള്ള നെയ്ത കാഞ്ചീവരം സാരിയുടെ വ്യാഖ്യാനം അതിനെ കൂടുതൽ സവിശേഷമാക്കുന്നു....
പാരീസിൽ മാജിക് സൃഷ്ടിക്കുമ്പോൾ വീട്ടിൽ നിന്ന് നിങ്ങളെ പ്രോത്സാഹിപ്പിക്കുന്നു....’’ എന്നാണ് ചിത്രങ്ങള് പങ്കിട്ട് ജാന്വി കുറിച്ചിരിക്കുന്നത്. ഇതിനു മറുപടിയായി ‘നീ സാരിയിൽ അതിസുന്ദരിയായിരുന്നു...’ എന്ന് മനീഷ് മല്ഹോത്ര കമന്റില് കുറിച്ചിട്ടുണ്ട്.
അപ്സര ലുക്കിലാണ് ജാന്വി അന്ഷുലയുടെ വെഡ്ഡിംഗ് റിസപ്ഷനില് തിളങ്ങിയത്. സർദോസി എംബ്രോയ്ഡറി, വിശാലമായ സ്റ്റേറ്റ്മെന്റ് ബോർഡറുകൾ, സാരിയുടെ നീളം മുഴുവൻ സ്വർണ്ണ ബ്രോക്കേഡ് കൊണ്ട് നിര്മ്മിച്ച മനോഹരമായ ഫ്ലോറല് ഡിസൈനുകൾ കൊണ്ട് അലങ്കരിച്ച മൗവ് ഷേഡിലുള്ള മനോഹരമായ ബനാറസി സിൽക്ക് സാരിയാണ് ജാന്വി ധരിച്ചത്. ഇതിനൊപ്പം സ്ട്രാപ്പ്ലെസ്സ് ഫിറ്റഡ് ബ്ലൗസാണ് താരം ധരിച്ചത്. മുത്തുകളും വജ്രങ്ങളും പതിച്ച ഒരു സ്വർണ്ണ മാലയും, മനോഹരമായ ഒരു കമർബന്ദും താരത്തിന്റെ സാരി ലുക്കിന് സ്ലീക്ക് ഫിനിഷിംഗ് നല്കുന്നുണ്ട്.
