മുംബൈ ലോക്കൽ ട്രെയിനിൽ സീറ്റിലിരുന്ന് ഉറങ്ങുന്ന തെരുവ് നായ; ഹൃദയസ്പർശിയായ വീഡിയോ വൈറൽ

മുംബൈയിലെ തിരക്കേറിയ ലോക്കൽ ട്രെയിനുകൾ ലക്ഷക്കണക്കിന് ആളുകളുടെ നിത്യജീവിതത്തിന്റെ ഭാഗമാണ്. എന്നാൽ ഈ നഗരയാത്രകൾക്കിടയിൽ പലപ്പോഴും ഹൃദയത്തെ സ്പർശിക്കുന്ന മനോഹരമായ കാഴ്ചകളും ഉണ്ടാകാറുണ്ട്. അത്തരത്തിൽ ലോക്കൽ ട്രെയിനിലെ വനിതാ കമ്പാർട്ട്മെന്റിലെ സീറ്റിൽ ഒരു തെരുവ് നായ സമാധാനത്തോടെ ഉറങ്ങുന്ന ദൃശ്യങ്ങൾ സമൂഹമാധ്യമങ്ങളിൽ ഇപ്പോൾ ഏറെ ശ്രദ്ധനേടുകയാണ്.

@thewoofline എന്ന ഇൻസ്റ്റാഗ്രാം പേജിൽ പങ്കുവെച്ച ഈ വീഡിയോയിൽ, ട്രെയിനിലെ ഒഴിഞ്ഞുകിടക്കുന്ന ഒരു സീറ്റിന്റെ കോണിൽ നായ ശാന്തമായി ഉറങ്ങുന്നത് കാണാം. ചുറ്റും തിരക്കോടെ യാത്രക്കാരുണ്ടെങ്കിലും അതൊന്നും വകവെക്കാതെയാണ് ഈ മിണ്ടാപ്രാണി ഉറക്കത്തിലേക്ക് വീണത്. ട്രെയിനിലുള്ള യാത്രക്കാർ ആരും തന്നെ ഇതിനെ ഉപദ്രവിക്കുകയോ ശല്യപ്പെടുത്തുകയോ ചെയ്തില്ല എന്നത് ശ്രദ്ധേയമാണ്.

യാത്രയ്ക്കിടയിൽ നായ ഏറെ നേരം ഒരേ കിടപ്പ് തുടർന്നപ്പോൾ, യാത്രക്കാർക്ക് അതിനെക്കുറിച്ച് ആശങ്കയായി. തങ്ങൾക്ക് തീർത്തും അപരിചിതനായ ഒരു മൃഗത്തിന്റെ സുരക്ഷ ഉറപ്പുവരുത്താൻ തികച്ചും അന്യരായ ചില യാത്രക്കാർ സ്നേഹത്തോടെ അടുത്തെത്തി അതിന്റെ ആരോഗ്യസ്ഥിതി പരിശോധിക്കുകയും തലയിൽ തലോടുകയും ചെയ്തു. മാധ്യമങ്ങളിൽ നിറയുന്ന അസഹിഷ്ണുതയുടെ ചിത്രങ്ങൾക്കപ്പുറം സമൂഹത്തിൽ ഇപ്പോഴും വലിയൊരു വിഭാഗം ആളുകൾ മൃഗങ്ങളോട് കാരുണ്യം കാണിക്കുന്നുണ്ടെന്ന് ഈ സംഭവം ഓർമ്മിപ്പിക്കുന്നു.

"ഞാൻ ജീവിക്കാൻ ആഗ്രഹിക്കുന്ന ഇന്ത്യ ഇതാണ്" എന്ന അടിക്കുറിപ്പോടെയാണ് ഈ വീഡിയോ പങ്കുവെച്ചിരിക്കുന്നത്. വാർത്തകളിൽ ഇടംപിടിക്കാത്ത എത്രയെത്ര ചെറിയ കാരുണ്യപ്രവർത്തികളാണ് നമുക്ക് ചുറ്റും നടക്കുന്നത് എന്ന് വീഡിയോയിൽ പറയുന്നു. ലക്ഷക്കണക്കിന് പേർ കണ്ട ഈ ദൃശ്യങ്ങൾ, ഇന്ത്യക്കാരുടെ യഥാർത്ഥ സംസ്‌കാരമായ ജീവിക്കുക, ജീവിക്കാൻ അനുവദിക്കുക എന്ന ആശയത്തെയാണ് ഓർമ്മപ്പെടുത്തുന്നത്.