‘സന്തോഷകരമായ ജന്മദിനാശംസകൾ, എന്റെ പ്രിയപ്പെട്ടവളേ’: പ്രിയങ്കയ്ക്ക് പ്രണയാർദ്രമായ ആശംസകളുമായി നിക്ക് ജൊനാസ്

ഭാര്യയും നടിയുമായ പ്രിയങ്ക ചോപ്രയ്ക്ക് ജന്മദിനാശംസകൾ നേർന്നുകൊണ്ട് ഗായകനും നടനുമായ നിക്ക് ജൊനാസ് സോഷ്യൽ മീഡിയയിൽ പങ്കുവെച്ച വീഡിയോയാണിപ്പോൾ ശ്രദ്ധേയമാകുന്നത്.സ്‌പെയിനിലെ ഒരു ബോട്ട് യാത്രയ്ക്കിടെ പകർത്തിയ ദൃശ്യങ്ങളാണ് നിക്ക് ഇൻസ്റ്റഗ്രാമിൽ പങ്കുവെച്ചിരിക്കുന്നത്.

യാട്ടിന്റെ മനോഹരമായ കാഴ്ചയിൽ നിന്ന് തുടങ്ങി ബിക്നി ധരിച്ച് സന്തോഷത്തോടെ പുഞ്ചിരിക്കുന്ന പ്രിയങ്കയിലേക്ക് നീളുന്നതാണ് വീഡിയോ. സൺഗ്ലാസും ബന്ദാനയും ധരിച്ചിരിക്കുന്ന പ്രിയങ്ക നിക്കിന് ഒരു ഫ്ലയിംഗ് കിസ് നൽകുന്നതും കാണാം. "സന്തോഷകരമായ ജന്മദിനാശംസകൾ, എന്റെ പ്രിയപ്പെട്ടവളേ" എന്ന പ്രണയാർദ്രമായ അടിക്കുറിപ്പോടെയാണ് നിക്ക് വീഡിയോ പോസ്റ്റ് ചെയ്തത്.

2018-ലായിരുന്നു പ്രിയങ്കയുടെയും നിക്കിന്റെയും വിവാഹം. ക്രിസ്ത്യൻ മതാചാര പ്രകാരമുള്ള വിവാഹവും ഹിന്ദു മതാചാര പ്രകാരമുള്ള വിവാഹവും നടന്നിരുന്നു. 2022-ലാണ് ഇവർക്ക് വാടകഗർഭധാരണത്തിലൂടെ മകൾ മാൾട്ടി മേരി ചോപ്ര പിറന്നത്.

അതേസമയം, എസ്.എസ്. രാജമൗലി സംവിധാനം ചെയ്യുന്ന പാൻ-ഇന്ത്യൻ ചിത്രം 'വാരാണസി'യിലൂടെ വലിയൊരു ഇടവേളയ്ക്ക് ശേഷം പ്രിയങ്ക ഇന്ത്യൻ സിനിമയിലേക്ക് തിരിച്ചെത്തുകയാണ്. മഹേഷ് ബാബുവും പൃഥ്വിരാജ് സുകുമാരനും പ്രധാന വേഷങ്ങളിലെത്തുന്ന ചിത്രത്തിൽ 'മന്ദാകിനി' എന്ന കഥാപാത്രത്തെയാണ് പ്രിയങ്ക അവതരിപ്പിക്കുന്നത്. വമ്പൻ ബജറ്റിലൊരുങ്ങുന്ന ചിത്രം 2027 ഏപ്രിലിൽ തിയേറ്ററുകളിലെത്തും.