ജന്തർ മന്തറിൽ കെ സുധാകരൻ; 'ഐക്യദാർഢ്യം വിദ്യാർത്ഥികൾക്ക്, സിജെപിക്കല്ല'

ന്യൂഡൽഹി: ഡൽഹിയിലെ ജന്തർ മന്തറിൽ നടക്കുന്ന സിജെപി പ്രതിഷേധവേദി കോൺഗ്രസ് നേതാവ് കെ. സുധാകരൻ എംപി സന്ദർശിച്ചു. ഐക്യദാർഢ്യം അറിയിച്ചത് സിജെപിക്കല്ല, സമരത്തിലുള്ള വിദ്യാർത്ഥികൾക്കാണെന്ന് അദ്ദേഹം വ്യക്തമാക്കി.

സിജെപിക്ക് പിന്തുണ നൽകുന്ന കാര്യത്തിൽ കോൺഗ്രസിന് ഏകപക്ഷീയമായി തീരുമാനമെടുക്കാനാകില്ലെന്നും അതിന് പാർട്ടി നേതൃത്വവുമായി ചർച്ച വേണമെന്നും സുധാകരൻ പറഞ്ഞു. വിദ്യാർത്ഥികൾക്ക് നേരെയുണ്ടായ മർദനത്തിന്റെ പശ്ചാത്തലത്തിലാണ് പ്രതിഷേധവേദിയിലെത്തിയതെന്നും അദ്ദേഹം കൂട്ടിച്ചേർത്തു.

അതേസമയം, ജന്തർ മന്തറിലെ യുവാക്കളുടെ പ്രതിഷേധം പാർലമെന്റിന്റെ ഇരുസഭകളുടെയും നടപടികളെ ഇന്നും തടസപ്പെടുത്തി. കേന്ദ്രമന്ത്രി ധർമേന്ദ്ര പ്രധാൻ രാജിവെക്കണമെന്നാവശ്യപ്പെട്ട് പ്രതിപക്ഷ എംപിമാർ ശക്തമായ പ്രതിഷേധം ഉയർത്തി.
സമ്മേളനം ആരംഭിക്കും മുമ്പേ പ്രതിഷേധം തുടങ്ങിയിരുന്നു. വിഷയത്തിൽ ചർച്ചയ്ക്ക് തയ്യാറാണെന്ന് സ്പീക്കർ അറിയിച്ചിട്ടും ബഹളം തുടർന്നതോടെ ലോക്സഭ ആദ്യം നിർത്തിവെക്കുകയും പിന്നീട് വീണ്ടും ചേർന്നപ്പോഴും പ്രതിഷേധം അവസാനിക്കാതിരുന്നതിനെ തുടർന്ന് പിരിയുകയും ചെയ്തു. രണ്ട് മിനിറ്റ് മാത്രമാണ് ലോക്സഭ സമ്മേളിക്കാൻ കഴിഞ്ഞത്. പ്രതിപക്ഷ എംപിമാർ നടുത്തളത്തിലിറങ്ങിയതോടെ രാജ്യസഭയും ഇന്നത്തേക്ക് പിരിഞ്ഞു.