മുൻപോട്ടു പോകാൻ എളുപ്പവഴികളല്ല, നീതിയാണ് അവർ ചോദിക്കുന്നത്; പോരാടുന്ന യുവതലമുറയ്ക്ക് പിന്തുണയുമായി അനന്യ പാണ്ഡെ

രാജ്യത്ത് ചോദ്യപേപ്പർ ചോർച്ചയ്ക്കും വിദ്യാഭ്യാസ മേഖലയിലെ ക്രമക്കേടുകൾക്കുമെതിരെ ജെൻ സി പ്രക്ഷോഭം ശക്തമാകുന്നതിനിടെ, പ്രതിഷേധക്കാർക്ക് പിന്തുണയുമായി ബോളിവുഡ് നടി അനന്യ പാണ്ഡെ. ഇൻസ്റ്റാഗ്രാമിലൂടെയാണ് നടി തന്റെ പിന്തുണ അറിയിച്ചത്.

പ്രതിഷേധ സ്ഥലങ്ങളിൽ നിന്നുള്ള രണ്ട് ബ്ലാക്ക് ആൻഡ് വൈറ്റ് ചിത്രങ്ങളോടൊപ്പം ഒരു നീണ്ട കുറിപ്പും അനന്യ പങ്കുവെച്ചു. രാജ്യത്തിന്റെ ഭരണഘടന കൈയ്യിലേന്തിയിരിക്കുന്ന ചിത്രവും, ഒരു പെൺകുട്ടിയോടൊപ്പം നിൽക്കുന്ന പിതാവിന്റെ ചിത്രവുമാണ് താരം പോസ്റ്റ് ചെയ്തത്.

‘ജെന്‍ സി തലമുറ എപ്പോഴും പലവിധ ലേബലുകള്‍ക്ക് ഇരയായിട്ടുണ്ട്. അവയില്‍ പലതും അത്ര ദയയുളളവയായിരുന്നില്ല. എന്നാൽ ഈ നിമിഷം ഈ തലമുറ യഥാർത്ഥത്തിൽ ആരാണെന്ന് നമ്മളെ ഓർമ്മിപ്പിക്കുകയാവാം.

'മുൻപും കാര്യങ്ങൾ ഇങ്ങനെയൊക്കെ തന്നെയായിരുന്നു' എന്ന് പറഞ്ഞ് ഇനി മുന്നോട്ട് പോകാൻ താല്പര്യമില്ലാത്ത ഒരു തലമുറ. അവർ എളുപ്പവഴികളല്ല ചോദിക്കുന്നത്. നീതി ലഭിക്കുക എന്നത് ഒരു അപൂർവ്വ കാര്യമാകരുത്, മറിച്ച് അത് ഏറ്റവും കുറഞ്ഞ ആവശ്യമാണെന്നാണ് അവർ പറയുന്നത്.

ചോദ്യങ്ങൾ ചോദിക്കുന്നത് ബഹുമാനമില്ലായ്മയല്ല.തുറന്നു സംസാരിക്കുന്നത് കലാപവുമല്ല.അത് പ്രതീക്ഷയാണ്.കാര്യങ്ങൾ ഇനിയും മെച്ചപ്പെടും എന്ന വിശ്വാസമാണത്. അങ്ങനെയാണ് മാറ്റങ്ങൾ ആരംഭിക്കുന്നത്. ഞാൻ എന്റെ രാജ്യത്തെയും ഇവിടുത്തെ ജനങ്ങളെയും സ്നേഹിക്കുന്നു.’ അനന്യ പാണ്ഡെ കുറിച്ചു.