സൂപ്പർ ഹീറോകൾ സിനിമകളിലും കഥകളിലും മാത്രമാണെന്ന് കരുതുന്നവർക്ക് മുന്നിലേക്ക് യഥാർത്ഥ ജീവിതത്തിലെ ഒരു സ്പൈഡർമാൻ എത്തിയതിന്റെ കൗതുകത്തിലാണ് സമൂഹമാധ്യമങ്ങൾ. അമേരിക്കയിലെ അർക്കൻസാസിൽ തിരക്കേറിയ റോഡ് മുറിച്ചുകടക്കാൻ ബുദ്ധിമുട്ടിയ വീൽചെയർ യാത്രികനെ സ്പൈഡർമാൻ വേഷം ധരിച്ചെത്തിയ യുവാവ് സാഹസികമായി സഹായിച്ചതാണ് ഇപ്പോൾ ലോകമെമ്പാടും പ്രശംസ പിടിച്ചുപറ്റുന്നത്. അർക്കൻസാസിലെ ജോൺസ്ബോറോയിലാണ് കൗതുകം നിറഞ്ഞ ഈ സംഭവം നടന്നത്.
ട്രാംപോളിൻ പാർക്കിലെ ജോലിക്കിടെ ഒരു സൂപ്പർഹീറോ ഇവന്റിൽ പങ്കെടുക്കാൻ ധരിച്ച സ്പൈഡർമാൻ കോസ്റ്റ്യൂം മാറ്റാതെ തന്റെ വാഹനത്തിൽ മടങ്ങുകയായിരുന്നു ഇരുപതുകാരനായ ക്രിസ്റ്റഫർ ഹെല്ലെന്താൾ. ഇതിനിടയിലാണ് തിരക്കേറിയ ജങ്ഷനിൽ വീൽചെയറിൽ റോഡ് മുറിച്ചുകടക്കാൻ സാധിക്കാതെ വിഷമിക്കുന്ന ഒരു വ്യക്തിയെ അദ്ദേഹം കണ്ടത്. ഒരു നിമിഷം പോലും ആലോചിച്ചുനിൽക്കാതെ, തന്റെ ഉള്ളിലെ സൂപ്പർഹീറോയെ പുറത്തെടുത്ത ഹെല്ലെന്താൾ ഉടൻ തന്നെ വാഹനത്തിൽ നിന്നും ചാടിയിറങ്ങി ആ വ്യക്തിയുടെ സഹായത്തിനായി എത്തുകയായിരുന്നു.
ട്രാഫിക് സിഗ്നൽ മാറി വാഹനങ്ങൾ ചലിച്ചുതുടങ്ങുന്നതിനിടയിൽ, സാഹസികമായി ആ വ്യക്തിയുടെ വീൽചെയർ തള്ളി സുരക്ഷിതമായി റോഡിന്റെ മറുകര എത്തിക്കാൻ അദ്ദേഹത്തിന് സാധിച്ചു. ഈ ചെറിയ എന്നാൽ മാതൃകയായ ദൗത്യം അവിടെയുള്ള ഒരു തെരുവ് ക്യാമറയിൽ പതിയുകയും, തുടർന്ന് ജോൺസ്ബോറോ പൊലീസിന്റെ ഔദ്യോഗിക സോഷ്യൽ മീഡിയ പേജ് വഴി പുറത്തുവിടുകയുമായിരുന്നു. അടിയന്തര സാഹചര്യത്തിൽ വേഗത്തിൽ ഇടപെടാൻ കഴിഞ്ഞതിൽ സന്തോഷമുണ്ടെന്നും താൻ ധരിച്ചിരുന്ന വേഷം ഈ നിമിഷം കൂടുതൽ രസകരമാക്കി മാറ്റിയെന്നും ഹെല്ലെന്താൾ മാധ്യമങ്ങളോട് പ്രതികരിച്ചു.
തന്റെ ഔദ്യോഗിക ജീവിതത്തിനിടയിൽ ഇത്തരമൊരു സംഭവം ആദ്യമായിട്ടാണ് കാണുന്നതെന്ന് ജോൺസ്ബോറോ പോലീസ് വകുപ്പ് വക്താവ് വ്യക്തമാക്കി. ബുദ്ധിമുട്ടിൽ കഴിയുന്നവർക്ക് സഹായഹസ്തവുമായി യഥാർത്ഥ ജീവിതത്തിൽ എത്തിയ ഈ സ്പൈഡർമാന് വൻതോതിലുള്ള അഭിനന്ദനങ്ങളാണ് സമൂഹമാധ്യമങ്ങളിൽ നിന്നും ലഭിച്ചുകൊണ്ടിരിക്കുന്നത്.
Comments