രാജിവച്ചത് ധർമേന്ദ്ര പ്രധാൻ; വൈറലായത് രാജ്‌നാഥ് സിംഗിന്റെ പഴയ പ്രസംഗം!

ന്യൂഡൽഹി: രാജ്യവ്യാപകമായി പ്രതിഷേധങ്ങൾക്കും നീറ്റ് പരീക്ഷാ വിവാദങ്ങൾക്കുമൊടുവിൽ കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ രാജി വെച്ചതിന് പിന്നാലെ, എൻഡിഎ സർക്കാരിൽ മന്ത്രിമാർ രാജി വെക്കാറില്ലെന്ന പ്രതിരോധ മന്ത്രി രാജ്നാഥ് സിങ്ങിന്റെ പഴയ പരാമർശം സമൂഹമാധ്യമങ്ങളിൽ വീണ്ടും വൈറലാകുന്നു.ധർമ്മേന്ദ്ര പ്രധാന്റെ രാജി പുറത്തുവന്നതിന് പിന്നാലെ, 2015 ജൂൺ 24-ലെ രാജ്നാഥ് സിങ്ങിന്റെ പത്രസമ്മേളനത്തിന്റെ ദൃശ്യങ്ങളാണ് ഓൺലൈനിൽ പ്രചരിക്കുന്നത്.

ലളിത് മോദി വിവാദത്തിനിടയിൽ മന്ത്രിമാരുടെ രാജി ആവശ്യപ്പെട്ട കോൺഗ്രസിനെതിരെയായിരുന്നു അദ്ദേഹത്തിന്റെ പരാമർശം. "ഞങ്ങളുടെ മന്ത്രിമാർക്ക് രാജി വെക്കേണ്ടി വരില്ല. ഇത് അവരുടെ (കോൺഗ്രസ്) സർക്കാറല്ല, ഇത് എൻഡിഎ സർക്കാറാണ്" എന്നായിരുന്നു അന്ന് രാജ്നാഥ് സിങ് വ്യക്തമാക്കിയത്. അന്നത്തെ വിദേശകാര്യ മന്ത്രി സുഷമ സ്വരാജും രാജസ്ഥാൻ മുഖ്യമന്ത്രി വസുന്ധര രാജെയും ലളിത് മോദിക്ക് യാത്രാ രേഖകൾ ലഭിക്കാൻ സഹായിച്ചുവെന്ന ആരോപണങ്ങളെ തുടർന്ന് പ്രതിപക്ഷത്തിന്റെ ശക്തമായ വിമർശനങ്ങൾ നേരിട്ടിരുന്നു. എന്നാൽ അന്നവർ രാജി വെച്ചിരുന്നില്ല.

രാജ്നാഥ് വിശേഷിപ്പിച്ച മോദി സർക്കാരിന്റെ ആ പ്രതിച്ഛായയ്ക്കാണ് ഇപ്പോൾ ധർമ്മേന്ദ്ര പ്രധാന്റെ രാജിയിലൂടെ തിരിച്ചടിയേറ്റിരിക്കുന്നത്. ശനിയാഴ്ചയ്ക്ക് മുമ്പ് മീടൂ പ്രസ്ഥാനവുമായി ബന്ധപ്പെട്ട ആരോപണങ്ങളെ തുടർന്ന് 2018 ഒക്ടോബർ 17-ന് രാജി വെച്ച മുൻ വിദേശകാര്യ സഹമന്ത്രി എം.ജെ. അക്ബറാണ് ഇതിന് മുൻപ് രാജിവെച്ച ഏക മന്ത്രി.