ബോളിവുഡിന്റെ പ്രിയതാരം, ഹിന്ദി സിനിമാലോകത്തെ ഫിറ്റ്‌നസ് ഐക്കൺ, വിജയകരമായ ബിസിനസ് സംരംഭക, ഇന്നും ലക്ഷക്കണക്കിന് ആരാധകരുടെ ഉറക്കം കെടുത്തുന്ന അപ്സര സൗന്ദര്യത്തിനുടമ... ഇങ്ങനെ വിശേഷണങ്ങള്‍ അനവധിയാണ് ശില്‍പ ഷെട്ടി കുന്ദ്രയ്ക്ക്. ബാസിഗര്‍ എന്ന സിനിമയിലൂടെ ബോളിവുഡില്‍ അരങ്ങേറ്റം കുറിച്ച ശില്‍പ, തന്റെ അഭിനയമികവു കൊണ്ടും നൃത്തപാടവം കൊണ്ടും സൗന്ദര്യം കൊണ്ടും അഴകളവുകള്‍ കൊണ്ടുമാണ് പ്രേക്ഷകരുടെ പ്രിയങ്കരിയായി മാറിയത്.
വിവാഹശേഷം വളരെ സെലക്ടീവായി മാത്രം സിനിമകള്‍ ചെയ്യുന്ന താരം സോഷ്യല്‍ മീഡിയയില്‍ നിറസാന്നിധ്യമാണ്. തന്റെ ഫിറ്റ്നെസ്സ് വീഡിയോകളും യോഗ പ്രാക്ടീസും ഡയറ്റ് മന്ത്രങ്ങളും ഫോട്ടോഷൂട്ടുകളുമടക്കം എല്ലാ വിശേഷങ്ങളും താരം അതിലൂടെ പങ്കിടാറുണ്ട്. താരം പങ്കിടുന്ന ചിത്രങ്ങളെല്ലാം വളരെ വേഗത്തിലാണ് തരംഗമായി മാറാറുള്ളത്.
ഇപ്പോഴിതാ മോച്ച ബ്രൗണ്‍ നിറത്തിലുള്ള മോഡേണ്‍ റെഡി-ടു-വെയർ സാരിയഴകിലുള്ള ചിത്രങ്ങള്‍ പങ്കിടുകയാണ് ശില്‍പ ഷെട്ടി കുന്ദ്ര. വ്യത്യസ്തവും ആധുനികവുമായ സാരി സ്റ്റൈലിംഗിലൂടെ ഫാഷൻ ലോകത്ത് എപ്പോഴും ശ്രദ്ധേയയാണ് ശില്‍പ. പരമ്പരാഗതമായ സാരി ലുക്കിനെ പാശ്ചാത്യ ശൈലിയുമായി സമന്വയിപ്പിക്കുന്ന പല ചിത്രങ്ങളും താരം പങ്കിടാറുണ്ട്. ഇത്തവണയും ഡിസൈനര്‍ സാരിയിലാണ് താരം തിളങ്ങുന്നത്.
‘‘ചെറുപ്പമാണ് സുന്ദരിയും...’’ എന്ന ക്യാപ്ഷന്‍ നല്‍കിയാണ് ശില്‍പ തന്റെ പുതിയ ചിത്രങ്ങള്‍ പങ്കിട്ടിരിക്കുന്നത്. മെറ്റാലിക് ബീഡ്‌സുകളും തിളങ്ങുന്ന സ്റ്റോണുകളും വരിവരിയായി മനോഹരമായി തുന്നിച്ചേർത്തിരിക്കുന്ന സ്ലീവ്ലെസ് ഹൈ നെക്ക് ഹാള്‍ട്ടര്‍ നെക്ക് ക്രോപ് ബ്ലൗസും കോഫി ബ്രൗണ്‍ ഫ്ലൂയിഡ് സാരിയുമാണ് ശില്‍പ അണിഞ്ഞിരിക്കുന്നത്. പോസ്റ്റിനു താഴെ താരത്തിന്റെ ഹോട്ട്നെസ്സിനെക്കുറിച്ചും സൗന്ദര്യത്തെക്കുറിച്ചും പ്രായം ബാധിക്കാത്ത അഴകിനെക്കുറിച്ചും ഫിറ്റ്നെസ്സിനെക്കുറിച്ചും നിരവധി കമന്റുകളാണ് ആരാധകര്‍ കുറിച്ചിരിക്കുന്നത്.
Comments