തമിഴ്നാട് മുഖ്യമന്ത്രി വിജയ്ക്കും നടി തൃഷയ്ക്കുമെതിരായ വിവാദ പരാമർശത്തിന്റെ പശ്ചാത്തലത്തില്‍ പ്രതിപക്ഷ നേതാവ് ഉദയനിധി സ്റ്റാലിനെ അറസ്റ്റ് ചെയ്തത് ഇക്കഴിഞ്ഞ ദിവസമാണ്. കാവേരി വിഷയത്തിൽ തഞ്ചാവൂരിൽ ഡിഎംകെ നടത്തിയ പ്രതിഷേധത്തിനിടയിൽ നടി തൃഷയെയും മുഖ്യമന്ത്രി വിജയിനെയും ബന്ധപ്പെടുത്തി അപകീര്‍ത്തിപരമായ പരാമര്‍ശമാണ് ഉദയനിധി നടത്തിയത്. ചോദ്യം ചെയ്യലിന് ശേഷം പ്രതിപക്ഷ നേതാവിനെ പോലീസ് കസ്റ്റഡിയിൽ നിന്ന് വിട്ടയച്ചിരുന്നു.
എന്നാല്‍ ഈ പ്രശ്നത്തോടെ വീണ്ടും എയറിലായിരിക്കുന്നത് മലയാളത്തിന്റെ പ്രിയതാരം ധ്യാന്‍ ശ്രീനിവാസനാണ്. ഈയടുത്ത് തന്റെ ഏറ്റവും പുതിയ സിനിമയായ ‘വിസിറ്റർ’ ന്റെ പ്രൊമോഷൻ ചടങ്ങിനിടയിൽ വിജയ്‌യുടെയും തൃഷയുടെയും പേരുകൾ പരാമർശിച്ച് ധ്യാൻ ശ്രീനിവാസൻ നടത്തിയ തമാശ രൂപത്തിലുള്ള പരാമർശം തമിഴ്‌നാട്ടിൽ വലിയ വിവാദങ്ങൾക്ക് വഴിവെച്ചിരുന്നു. ഉദയനിധിയുടെ അറസ്റ്റ് വന്നതിന് പിന്നാലെ ധ്യാൻ തന്നെ നല്‍കിയ രസകരമായ പ്രതികരണവും വൈറലായി, ട്രോളുകളിലും നിറഞ്ഞു.
ഇപ്പോഴിതാ തന്നെ ട്രോളിയ ഒരു പേജില്‍ ധ്യാന്‍ ശ്രീനിവാസന്‍ നല്‍കിയ മറുപടിയാണ് സോഷ്യല്‍ മീഡിയയില്‍ തരംഗമാകുന്നത്. ഒരു ട്രോള്‍ പേജില്‍ ധ്യാനെ പരിഹസിച്ചുകൊണ്ടുള്ള പോസ്റ്റും ‘അണ്ണൻ തമ്പി’ ചിത്രത്തില്‍ മൂകനായി മമ്മൂട്ടി അഭിനയിച്ച കഥാപാത്രം താൻ തെറ്റൊന്നും ചെയ്തിട്ടില്ലെന്ന ഭാവത്തില്‍ നില്‍ക്കുന്ന രംഗവും ട്രോളില്‍ ഉപയോഗിച്ചു. ഈ ഷോര്‍ട്ട് വീഡിയോയുടെ മുകളില്‍ ‘തൃഷയെ വാക്കുകള്‍ കൊണ്ട് അധിക്ഷേപിച്ചതിന് ഉദയനിധി സ്റ്റാലിൻ അറസ്റ്റിലായെന്ന വാർത്ത കണ്ടതിന് പിന്നാലെ ധ്യാൻ ശ്രീനിവാസൻ’ എന്ന അർഥം വരുന്ന കുറിപ്പും നല്‍കിയിട്ടുണ്ട്. മുൻപ് ധ്യാൻ നടത്തിയ വിജയ്-തൃഷ പരാമർശം ഓർമ്മിക്കുന്ന തരത്തിലാണ് ട്രോള്‍.
എന്നാല്‍ ട്രോളിന് താഴെ ധ്യാന്‍ നല്‍കിയ കമന്റ് ആരാധകര്‍ വൈറലാക്കുകയാണ്. ‘ഹാഹാ... അണ്ണനും അണ്ണിയും എന്റെ ജീവനാണ്...’ എന്നാണ് ധ്യാന്‍ കുറിച്ചത്. ഒപ്പം ചിരിക്കുന്ന ഇമോജികളും താരം കുറിച്ചു. തന്നെ ട്രോളി വന്ന ഒരു പോസ്റ്റിനെ പോലും തമാശയായി ഏറ്റെടുത്ത ധ്യാനിന്റെ മറുപടി സോഷ്യല്‍ മീഡിയയില്‍ തരംഗമാകുകയാണ്.
ധ്യാൻ ശ്രീനിവാസൻ തൃഷയെ വാക്കുകള്‍ കൊണ്ട് അധിക്ഷേപിച്ചുവെന്ന അർഥത്തിലല്ലെന്നും വിനോദത്തിന് വേണ്ടി മാത്രം തയ്യാറാക്കിയ ട്രോളാണിത് എന്ന വിശദീകരണവും പോസ്റ്റ് പങ്കുവെച്ച പേജ് കമന്റിലൂടെ നല്‍കിയിട്ടുണ്ട്. ട്രോളിനെതിരെ പ്രതികരിക്കാതെ അതേ തമാശയുടെ ഭാഗമായ ധ്യാനിന് ആരാധകരുടെ എണ്ണവും ഇരട്ടിയായിട്ടുണ്ട്.
ഒരിക്കല്‍ വിജയ്-തൃഷയെ കളിയാക്കുന്ന തരത്തില്‍ ധ്യാന്‍ നടത്തിയ പരാമർശം തമിഴ്നാട്ടില്‍ വലിയ വിവാദമായിരുന്നു. വിജയ് ആരാധകർ ധ്യാനോട് പരസ്യമായി മാപ്പ് പറയണമെന്ന് ആവശ്യപ്പെട്ട് രംഗത്തു വന്നിരുന്നു. എന്നാലിപ്പോള്‍ ധ്യാനിനെ ട്രോളിയും ധ്യാന്‍ നല്‍കിയ രസകരമായ കമന്റും ആരാധകര്‍ ഏറ്റെടുക്കുകയാണ്.
Comments