സോഷ്യൽ മീഡിയയിൽ വെല്ലുവിളി പോസ്റ്റുകളിട്ടത് സുഹൃത്താണെന്ന് അർജുൻ ആയങ്കി

കണ്ണൂർ: ഒളിവിലിരുന്ന് പൊലീസിനെ വെല്ലുവിളിച്ച അർജുൻ ആയങ്കിയുടെ ഫോൺ പൊലീസ് പിടിച്ചെടുത്തു. എന്നാൽ, പൊലീസിനും ആഭ്യന്തര മന്ത്രി രമേശ് ചെന്നിത്തലയ്ക്കും എതിരെയുള്ള പോസ്റ്റുകൾ ഇട്ടത് തന്റെ സുഹൃത്ത് പ്രണവ് ആണെന്ന് ആയങ്കി പറഞ്ഞു. ഇയാൾ ഇപ്പോഴും ഒളിവിലാണ്.

അർജുൻ കഴിഞ്ഞ ദിവസം എറണാകുളത്തുനിന്ന് കണ്ണൂരിലേക്ക് വരുമ്പോൾ പ്രണവും ഒപ്പമുണ്ടായിരുന്നു. തളിപ്പറമ്പിൽ നിന്ന് ഇന്നലെയാണ് പ്രണവ് മറ്റൊരിടത്തേക്ക് മാറിയത് എന്നും ആയങ്കി പറഞ്ഞതായാണ് റിപ്പോർട്ടുകൾ. അതേസമയം സോഷ്യൽ മീഡിയ പോസ്റ്റുകളിട്ടത് ആയങ്കിയുടെ ഫോണിൽ നിന്നുതന്നെയാണോ എന്നും പൊലീസ് പരിശോധിക്കുന്നുണ്ട്. പിടികൂടുമെന്ന് പറഞ്ഞ് വിരട്ടരുത് എന്നും വളർന്ന പാർട്ടി വേറെയാണെന്നും ആയങ്കിയുടെ അക്കൗണ്ടിൽ നിന്ന് പോസ്റ്റുകൾ വന്നിരുന്നു.

അർജുൻ ആയങ്കി കോതമം​ഗലം പൊലീസ് സ്റ്റേഷനിലെ സ്റ്റേഷൻ ഹൗസ് ഓഫീസറായ ഇൻസ്പെക്ടറെയും കുടുംബത്തിനും എതിരായി ഫേസ്ബുക്ക് വഴി ലൈംഗികപരമായ പ്രസ്താവനകൾ പോസ്റ്റ് ചെയ്യുകയും ഭീഷണിപ്പെടുത്തുകയും ചെയ്തിരുന്നു. ജാമ്യം നിഷേധിച്ചതിന് ഊന്നുകൽ പൊലീസ് സ്റ്റേഷനിലെ ഇൻസ്പെക്ടറെ സമൂഹമാധ്യമങ്ങളിലൂടെ അസഭ്യം പറഞ്ഞ് ഭീഷണിപ്പെടുത്തുകയും ചെയ്തു.

അർജുൻ ആയങ്കിയുടെ രണ്ട് കൂട്ടാളികളെ കൂടി പൊലീസ് പിടികൂടി. ഇവരെ വളപട്ടണം പൊലീസ് കസ്റ്റഡിയിൽ എടുത്ത് ഊന്നുകൽ പോലീസിന് കൈമാറി. അഴിക്കോട് കപ്പക്കടവ് സ്വദേശികളാണ് പിടിയിലായത്. ജിതിൻ, സുഭാഷ് എന്നിവരാണ് പിടിയിലായത്. ജിതിന്റെ കാറിലാണ് ആയങ്കി രക്ഷപ്പെട്ടതെന്നാണ് വിവരം.