മാഡ്രിഡ്: ഒടുവില്‍ ഇതിഹാസ ഫുട്‌ബോള്‍താരം ക്രിസ്ത്യാനോ റൊണാള്‍ഡോയുടേയും കാമുകി ജോര്‍ജ്ജീനയുടെയും പത്തുവര്‍ഷത്തെ പ്രണയം വിവാഹത്തിലേക്ക്. തന്റെ ദീര്‍ഘകാല പങ്കാളിയായ ജോര്‍ജിന റോഡ്രിഗസിനെ ഓഗസ്റ്റ് 11 ചൊവ്വാഴ്ച റൊണാള്‍ഡോ വിവാഹം കഴിച്ചു. പോര്‍ച്ചുഗല്‍ തലസ്ഥാനമായ ലിസ്ബണിന് സമീപമുള്ള കാസ്‌കേസ് എന്ന തീരദേശ നഗരത്തില്‍ അഞ്ച് മക്കളുടെയും സാന്നിധ്യത്തില്‍ തികച്ചും സ്വകാര്യമായ ചടങ്ങിലായിരുന്നു വിവാഹമെന്ന് ബ്രണ്‍സ്വിക് ഗ്രൂപ്പ് വ്യക്തമാക്കി.
2016-ല്‍ മാഡ്രിഡില്‍ വെച്ചാണ് റൊണാള്‍ഡോയും ജോര്‍ജിനയും ആദ്യമായി കണ്ടുമുട്ടുന്നത്. പത്ത് വര്‍ഷമായി ഒന്നിച്ച് ജീവിക്കുന്ന ഇവരുടെ ബന്ധം സ്‌പെയിന്‍, ഇറ്റലി, യുകെ, സൗദി അറേബ്യ എന്നീ രാജ്യങ്ങളിലൂടെ വളര്‍ന്ന് ഇന്ന് അഞ്ച് മക്കളുള്ള വലിയൊരു കുടുംബമായി മാറിയിരിക്കുകയാണ്. മാഡ്രിഡിലെ പ്രശസ്തമായ ഗൂച്ചി ബോട്ടിക്കില്‍ സെയില്‍സ് അസിസ്റ്റന്റായിരുന്നു ജോര്‍ജ്ജീന. ഇവിടെവെച്ചാണ് ഇരുവരും ആദ്യമായി കാണുന്നത്. അന്ന് റയല്‍ മാഡ്രിഡിന്റെ പ്രധാന താരമായിരുന്നു റൊണാള്‍ഡോ.
ദിവസങ്ങള്‍ക്ക് ശേഷം ഒരു ബ്രാന്‍ഡ് ഇവന്റില്‍ വെച്ച് കണ്ടുമുട്ടിയതോടെയാണ് ജോര്‍ജിനയുടെ ജോലി സമയത്തിന് പുറത്ത് ശാന്തമായ അന്തരീക്ഷത്തില്‍ ഇരുവര്‍ക്കും സംസാരിക്കാന്‍ അവസരം ലഭിച്ചതും സൗഹൃദത്തിലായതും. 2017 നവംബറില്‍ ഇവര്‍ക്ക് അലാന മാര്‍ട്ടിന എന്ന പെണ്‍കുട്ടി ജനിച്ചു. ഇതിന് മാസങ്ങള്‍ക്ക് മുമ്പ് വാടകഗര്‍ഭധാരണത്തിലൂടെ റൊണാള്‍ഡോയ്ക്ക് ജനിച്ച മാറ്റിയോ, ഈവ എന്നീ ഇരട്ടക്കുട്ടികളെയും ക്രിസ്റ്റ്യാനോ ജൂനിയറിനെയും സ്വന്തം മക്കളെപ്പോലെയാണ് ജോര്‍ജിന പരിചരിക്കുന്നത്.
അന്താരാഷ്ട്ര ഫുട്‌ബോളില്‍ പോര്‍ച്ചുഗലിനായി 146 ഗോളുകള്‍ നേടി ഏറ്റവും കൂടുതല്‍ ഗോള്‍ നേടുന്ന താരമെന്ന റെക്കോര്‍ഡ് റൊണാള്‍ഡോയുടെ പേരിലുണ്ട്. 5 തവണ ബാലണ്‍ ഡി ഓര്‍ പുരസ്‌കാരം നേടിയ താരം അടുത്തിടെ തന്റെ ആറാം ലോകകപ്പിലും പോര്‍ച്ചുഗലിനായി കളത്തിലിറങ്ങിയിരുന്നു. നിലവില്‍ സൗദി പ്രോ ലീഗ് ക്ലബ്ബായ അല്‍ നസറിനായി കളിക്കുന്ന റൊണാള്‍ഡോ ശനിയാഴ്ച ആരംഭിക്കുന്ന പുതിയ സീസണില്‍ വീണ്ടും ബൂട്ട് കെട്ടുമെന്നാണ് പ്രതീക്ഷിക്കുന്നത്.
Comments