മഹാരാഷ്ട്രയിലെ റായ്ഗഡ് ജില്ലയിൽ നിന്നുള്ള മൂന്ന് കൊച്ചു മിടുക്കികളാണ് ഇപ്പോൾ സോഷ്യൽ മീഡിയയിലെ താരങ്ങൾ. തങ്ങളുടെ സ്കൂളിലേക്കുള്ള വഴിയിലെ തകർന്ന റോഡിനെക്കുറിച്ച് ഇവർ തയ്യാറാക്കിയ ഒരു വീഡിയോ വൈറലായതോടെ അധികൃതർക്ക് പോലും അടിയന്തരമായി ഇടപെടേണ്ടി വന്നു. തകർന്നു കിടക്കുന്ന ഖാൻഡ്‌പെ-കൊണ്ടിവാഡെ റോഡിന്റെ അവസ്ഥ വെളിച്ചത്തു കൊണ്ടുവരാൻ മാധ്യമപ്രവർത്തകരെപ്പോലെ വേഷമിട്ട് വിദ്യാർത്ഥിനികൾ നടത്തിയ തകർപ്പൻ പ്രകടനമാണ് ഭരണകൂടത്തെ ഉണർത്തിയത്.
വീഡിയോയിൽ ഒരു പെൺകുട്ടി റിപ്പോർട്ടറായും, രണ്ടാമത്തെയാൾ ക്യാമറമാനായും, മൂന്നാമത്തെയാൾ അതിഥിയായും വേഷമിട്ടു. കയ്യിൽ ഒരു കുടയുമായി നിന്നുകൊണ്ട്, "റോഡിലാണോ കുഴികൾ, അതോ കുഴികൾക്കിടയിലാണോ റോഡ്?" എന്ന് ഇവർ ചോദിക്കുന്നത് കണ്ട് കാഴ്ചക്കാർ അത്ഭുതപ്പെട്ടുപോയി. തങ്ങളുടെ പ്രദേശത്തെ റോഡിന്റെ ശോചനീയാവസ്ഥയെ ഇത്രയും രസകരമായും എന്നാൽ ഗൗരവത്തോടെയും അവതരിപ്പിച്ച കുട്ടികളുടെ ബുദ്ധിയെ സോഷ്യൽ മീഡിയ ഒന്നടങ്കം പ്രശംസിച്ചു.
ഈ വീഡിയോ ഇന്റർനെറ്റിൽ തീ പോലെ പടർന്നതോടെ അധികൃതർ ഞെട്ടി. സംഭവം വലിയ ചർച്ചയായതോടെ, പ്രദേശത്തെ എംഎൽഎ മഹേന്ദ്ര തോർവേ അടിയന്തരമായി ഇടപെടുകയും റോഡിലെ കുഴികൾ അടയ്ക്കാൻ നിർദ്ദേശം നൽകുകയും ചെയ്തു. വീഡിയോ പുറത്തുവന്നതിന് തൊട്ടുപിന്നാലെ തന്നെ അറ്റകുറ്റപ്പണികൾ ആരംഭിച്ചതും വളരെ വേഗത്തിലായിരുന്നു. മഴക്കാലം കഴിഞ്ഞാലുടൻ റോഡ് പൂർണ്ണമായും പുനർനിർമ്മിക്കുമെന്നും എംഎൽഎ ഉറപ്പുനൽകി.
എന്തായാലും, അധികൃതരുടെ കണ്ണുതുറപ്പിക്കാൻ ഒരു ചെറിയ വീഡിയോയ്ക്ക് സാധിച്ചു എന്നത് വലിയൊരു മാറ്റമാണ്. സമൂഹത്തിലെ പ്രശ്നങ്ങൾക്കെതിരെ കുട്ടികൾ പോലും ഇത്രയധികം ജാഗരൂകരാണെന്നും, അവരെ അവഗണിക്കാൻ കഴിയില്ലെന്നുമാണ് ഈ സംഭവം തെളിയിക്കുന്നത്. അധികൃതരുടെ അനാസ്ഥയ്‌ക്കെതിരെ ശബ്ദമുയർത്താൻ മടികാണിക്കാത്ത ഈ കൊച്ചു കൂട്ടുകാരികൾക്ക് ഇപ്പോൾ സോഷ്യൽ മീഡിയയിൽ അഭിനന്ദന പ്രവാഹമാണ്.
Comments