അമ്മയ്ക്കും സഹോദരനും സുഹൃത്തുക്കള്‍ക്കുമൊപ്പം പിറന്നാള്‍ ആഘോഷമാക്കി സാറ അലി ഖാന്‍; ചിത്രങ്ങള്‍ പങ്കുവെച്ച് താരം

ബോളിവുഡ് താരം സാറ അലി ഖാന്റെ പിറന്നാൾ ആഘോഷത്തിന്റെ ചിത്രങ്ങളാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. കഴിഞ്ഞ ദിവസം നടന്ന വർണ്ണാഭമായ കാർണിവൽ തീം പാർട്ടിയിൽ കുടുംബാംഗങ്ങളും അടുത്ത സുഹൃത്തുക്കളും പങ്കെടുത്തു. ഇൻസ്റ്റാഗ്രാമിലൂടെ താരം തന്നെയാണ് ആഘോഷത്തിന്റെ മനോഹരമായ ചിത്രങ്ങൾ ആരാധകരുമായി പങ്കുവെച്ചത്.

അമ്മയും അമൃത സിംഗ്, സഹോദരൻ ഇബ്രാഹിം അലി ഖാൻ, നടി ഡിംപിൾ കപഡിയ എന്നിവർ പിറന്നാൾ ആഘോഷത്തിൽ സജീവമായി പങ്കെടുത്തിരുന്നു. "സാറയുടെ കാർണിവൽ" എന്ന് എഴുതിയ മനോഹരമായ പശ്ചാത്തലത്തിൽ കുടുംബത്തോടൊപ്പമുള്ള താരത്തിന്റെ ചിത്രങ്ങൾ ആരാധകർ ഇതിനോടകം ഏറ്റെടുത്തു കഴിഞ്ഞു.

സാറയുടെ വ്യക്തിത്വവും താൽപ്പര്യങ്ങളും ജീവിതയാത്രയും പ്രതിഫലിക്കുന്നതായിരുന്നു പിറന്നാൾ വേദിയുടെ അലങ്കാരങ്ങൾ. ഫിലിം റീൽ, പുസ്തകങ്ങൾ, മലനിരകൾ, കാപ്പി, വിമാനം, മേക്കപ്പ്, ഫിറ്റ്നസ് ഘടകങ്ങൾ എന്നിവയെല്ലാം കാർണിവൽ പശ്ചാത്തലത്തിൽ ഉൾപ്പെടുത്തിയിരുന്നു. കൂടാതെ, താരം പഠിച്ച കൊളംബിയ യൂണിവേഴ്സിറ്റിയുടെ ഓർമ്മകൾ, സിനിമയുമായി ബന്ധപ്പെട്ട ക്ലാപ്പർബോർഡ്, ക്യാമറ, സ്റ്റാച്യു ഓഫ് ലിബർട്ടി, ഫിറ്റ്നസ് ഉപകരണങ്ങൾ എന്നിവ ഉൾപ്പെടുത്തി പ്രത്യേകമായി നിർമ്മിച്ച പിറന്നാൾ കേക്കും ഏറെ ശ്രദ്ധ നേടി.

തന്റെ ജീവിതത്തെ പൂർണ്ണമായി അറിയാമായിരുന്നിട്ടും ഒപ്പം നിൽക്കുന്ന പ്രിയപ്പെട്ടവർക്ക് നന്ദി പറഞ്ഞുകൊണ്ടാണ് സാറ ചിത്രങ്ങൾ പങ്കുവെച്ചത്.‘എന്നെ നൂറുശതമാനം അറിയാമെങ്കിലും, എങ്കിലും കൂടെ നില്‍ക്കാന്‍ മാത്രം കൂളായ ആളുകളാല്‍ ചുറ്റപ്പെടാന്‍ കഴിഞ്ഞതില്‍ ഞാന്‍ ഭാഗ്യവതിയാണ്’ എന്നാണ് താരം കുറിച്ചത്.

പച്ച നിറത്തിലുള്ള തിളങ്ങുന്ന വേഷത്തിലാണ് സാറ പിറന്നാള്‍ ആഘോഷത്തില്‍ തിളങ്ങിയത്. കുടുംബത്തിന്റെയും സുഹൃത്തുക്കളുടെയും ഒപ്പമുള്ള ഈ ലളിതവും എന്നാല്‍ മനോഹരവുമായ ആഘോഷം ഇതിനോടകം തന്നെ ആരാധകര്‍ക്കിടയില്‍ ചര്‍ച്ചയായിക്കഴിഞ്ഞു.