കാനഡയിലെ പാർക്കിൽ യുവതിയെ കടന്നുപിടിച്ചു; ഇന്ത്യക്കാരൻ അറസ്റ്റിൽ

ഒട്ടാവ: കാനഡയിലെ സറേ നഗരത്തിലെ ഒരു പാർക്കിൽ യുവതിയെ ലൈംഗികമായി പീഡിപ്പിച്ചു എന്നാരോപിച്ച് 40 വയസ്സുകാരനായ ഇന്ത്യൻ വംശജനെ അറസ്റ്റ് ചെയ്തതായി പൊലീസ് അറിയിച്ചു. ബെയർ ക്രീക്ക് പാർക്കിൽ വച്ച് "പ്രായപൂർത്തിയായ ഒരു പുരുഷൻ" തന്നെ കടന്നുപിടിച്ചെന്നും ശേഷം അയാൾ അവിടെ നിന്നും ഓടിപ്പോയെന്നും ഇരയായ യുവതി പൊലീസിനോട് പറഞ്ഞു. ഇതിന്റെ അടിസ്ഥാനത്തിൽ, ജഗേന്ദർ കുരാന എന്ന പ്രതിക്കെതിരെ ലൈംഗികാതിക്രമം, ലൈംഗിക അതിക്രമം ലക്ഷ്യമിട്ടുള്ള ഇടപെടൽ എന്നീ രണ്ട് കുറ്റങ്ങൾ ചുമത്തിയിട്ടുണ്ട്.

ഓഗസ്റ്റ് 9-നാണ് സംഭവം റിപ്പോർട്ട് ചെയ്യപ്പെട്ടത്. തുടർന്ന് ഉദ്യോഗസ്ഥർ പാർക്കിലും പരിസര പ്രദേശങ്ങളിലും വ്യാപകമായി പട്രോളിംഗ് നടത്തിയെങ്കിലും പ്രതിയെ കണ്ടെത്താനായില്ല. പൊലീസ് നൽകുന്ന വിവരമനുസരിച്ച്, ഏകദേശം 5'8" ഉയരമുള്ള ഒരു ദക്ഷിണേഷ്യൻ പുരുഷനാണ് പ്രതിയെന്നാണ് യുവതി നൽകിയ സൂചന. നീല നിറത്തിലുള്ള അഡിഡാസ് തൊപ്പി, കറുത്ത ടി-ഷർട്ട്, കറുത്ത പാന്റ്സ്, കറുത്ത ഫ്ലിപ്പ് ഫ്ലോപ്പുകൾ (ചെരുപ്പ്) എന്നിവയാണ് അയാൾ ധരിച്ചിരുന്നത്.

സംഭവത്തിൽ അന്വേഷണം ആരംഭിച്ച പൊലീസ്, വിവരങ്ങൾ ശേഖരിക്കുന്നതിനായി കഴിഞ്ഞ ആഴ്ച പൊതുജനങ്ങളോട് അഭ്യർത്ഥിക്കുകയും പ്രതിയുടെ ഫോട്ടോകൾ പുറത്തുവിടുകയും ചെയ്തു. അധികം വൈകാതെ, ഈ വിവരങ്ങളുമായി പൊരുത്തപ്പെടുന്ന ഒരാളെ തിരിച്ചറിഞ്ഞു. ഓഗസ്റ്റ് 12-ന് കുരാനയെ അറസ്റ്റ് ചെയ്തതായി പൊലീസ് അറിയിച്ചു.

കുരാനയെ കസ്റ്റഡിയിൽ റിമാൻഡ് ചെയ്തു. ബ്രിട്ടീഷ് കൊളംബിയ പ്രോസിക്യൂഷൻ സർവീസ് ഇയാൾക്കെതിരെ രണ്ട് ക്രിമിനൽ കോഡ് കുറ്റങ്ങൾ ചുമത്താൻ അനുമതി നൽകി. കൂടാതെ ജാമ്യാപേക്ഷ പരിഗണിക്കുന്നതിനായി കാത്തിരിക്കുകയാണെന്നും പൊലീസ് പറഞ്ഞു. ആരോപിക്കപ്പെട്ട ആക്രമണത്തെക്കുറിച്ചുള്ള അന്വേഷണം തുടരുകയാണെന്നും പൊലീസ് കൂട്ടിച്ചേർത്തു.