യാത്രയ്ക്ക് ശേഷം നിങ്ങള്‍ക്ക് മുതുക് വേദനയോ കഴുത്ത് വേദനയോ അനുഭവപ്പെടാറുണ്ടോ? എങ്കില്‍, യാത്രയിലെ ഈ പൊതുവായ തെറ്റായ ശീലങ്ങള്‍ ഒഴിവാക്കാന്‍ ശ്രദ്ധിക്കുക. പ്രതിദിന യാത്ര ജീവിതത്തിന്റെ ഒരു പ്രധാന ഭാഗമാണ്. ഭാരമേറിയ ബാഗുകള്‍ ചുമന്നും, ദീര്‍ഘനേരം നിന്നുകൊണ്ടും, ഗതാഗതക്കുരുക്കില്‍ പെട്ടും, തിരക്കേറിയ പൊതുഗതാഗത സംവിധാനങ്ങളെ ആശ്രയിച്ചും ഒക്കെയായിരിക്കാം നിങ്ങളുടെ യാത്രകള്‍.
പ്രതിദിന യാത്ര നട്ടെല്ലിന്റെ ആരോഗ്യത്തെ ബാധിക്കുന്നത് എന്തുകൊണ്ട്?
യാത്രകള്‍ മാത്രമല്ല ഇവിടെ വില്ലനാകുന്നത്. ചില യാത്രാശീലങ്ങളും ദീര്‍ഘനേരമുള്ള തെറ്റായ ഇരിപ്പും നട്ടെല്ലില്‍ അനാവശ്യമായ സമ്മര്‍ദ്ദം ഉണ്ടാക്കുകയും കഴുത്തുവേദനക്കും മുതുക് വേദനക്കും കാരണമാവുകയും ചെയ്യുന്നു. ശരിയായ രീതിയില്‍ ഇരിക്കാനും, യാത്രകളില്‍ ശരീരത്തിന് അനുയോജ്യമായ രീതി പാലിക്കാനും ശ്രദ്ധിച്ചാല്‍ ഈ ബുദ്ധിമുട്ടുകള്‍ ഒരു പരിധി വരെ കുറയ്ക്കാന്‍ സാധിക്കും.
അതായത്, യാത്രയ്ക്കിടയിലെ നിങ്ങളുടെ ഇരിപ്പ്, നില്‍പ്പ്, ബാഗുകള്‍ ചുമക്കുന്ന രീതി, ഫോണ്‍ ഉപയോഗം എന്നിവ നിങ്ങളുടെ നട്ടെല്ലിന്റെ ആരോഗ്യത്തെ ക്രമേണ ബാധിച്ചേക്കാം. ഇത് കഴുത്തിലും ഇടുപ്പിലും വിട്ടുമാറാത്ത വേദനയ്ക്കും അസ്വസ്ഥതയ്ക്കും കാരണമാകുന്നു.
യാത്രകളില്‍ ഒഴിവാക്കേണ്ട ശീലങ്ങള്‍ ഏതെല്ലാമാണ്?
ഒറ്റനോട്ടത്തില്‍ കുഴപ്പമില്ലെന്ന് തോന്നുന്ന പല യാത്രാശീലങ്ങളും ദിവസേന ആവര്‍ത്തിക്കുന്നത് ശരീരത്തിന് വലിയ ആയാസമുണ്ടാക്കും. അമിതഭാരമുള്ള ബാഗുകള്‍ ചുമക്കുന്നത് മുതല്‍ യാത്രയിലുടനീളം തലകുനിച്ചിരുന്ന് ഫോണ്‍ ഉപയോഗിക്കുന്നത് വരെ ഇതില്‍പ്പെടാം. നട്ടെല്ലിനെ ബാധിക്കുന്നതും സാധ്യമെങ്കില്‍ ഒഴിവാക്കേണ്ടതുമായ ശീലങ്ങള്‍ അറിയാം....
* അമിതഭാരമുള്ള ബാഗുകള്‍ ചുമക്കുന്നത് - ബാഗുകളുടെ അമിതഭാരം നട്ടെല്ലില്‍ അധിക സമ്മര്‍ദ്ദം ഉണ്ടാക്കുകയും മുതുക് വേദനയ്ക്ക് കാരണമാവുകയും ചെയ്യും.
* ദീര്‍ഘനേരമുള്ള ഇരുചക്രവാഹന യാത്രകള്‍ - തുടര്‍ച്ചയായ ബൈക്ക് യാത്രകള്‍, ബാലന്‍സ് ചെയ്യല്‍, ബ്രേക്കിംഗ്, റോഡിലെ കുലുക്കങ്ങള്‍ എന്നിവ കഴുത്തിലും താഴ്ഭാഗത്തെ ഇടുപ്പിലും വേദനയുണ്ടാക്കാം.
* ബസുകളുടെ പിന്‍സീറ്റിലെ യാത്ര - ബസുകളുടെ പിന്‍സീറ്റുകളില്‍ കുലുക്കവും റോഡിലെ തള്ളിച്ചയും കൂടുതലായി അനുഭവപ്പെടുന്നതിനാല്‍ ഇത് താഴത്തെ ഇടുപ്പിന് ആയാസമുണ്ടാക്കുന്നു.
* കാറുകളിലെ തെറ്റായ ഇരിപ്പുരീതികള്‍ - ദീര്‍ഘദൂര യാത്രകളില്‍ തെറ്റായ രീതിയിലോ അസ്വസ്ഥമായ നിലയിലോ ഇരിക്കുന്നത് താഴത്തെ ഡിസ്‌കിനും കഴുത്തിനും ദോഷകരമാണ്.
* തുടര്‍ച്ചയായി ഫോണിലേക്ക് തലകുനിച്ചിരിക്കുന്നത് - ഫോണ്‍ ഉപയോഗിക്കുമ്പോള്‍ ദീര്‍ഘനേരം തല താഴേക്ക് കുനിച്ചിരിക്കുന്നത് കഴുത്തിനും കണ്ണുകള്‍ക്കും ആയാസമുണ്ടാക്കും.
* എപ്പോഴും കൂടുതല്‍ കഠിനമായ യാത്രാമാര്‍ഗ്ഗങ്ങള്‍ തിരഞ്ഞെടുക്കുന്നത് - സാധ്യമെങ്കില്‍, മെട്രോ പോലെയുള്ള സുഗമമായ യാത്രാമാര്‍ഗ്ഗങ്ങള്‍ തിരഞ്ഞെടുക്കുക. ഇത് റോഡ് യാത്രകളിലെ കുലുക്കങ്ങള്‍ മൂലമുണ്ടാകുന്ന ശാരീരിക ബുദ്ധിമുട്ടുകള്‍ കുറയ്ക്കാന്‍ സഹായിക്കും.
* തിരക്കേറിയ സമയങ്ങളിലെ ട്രെയിന്‍ യാത്ര - അമിത തിരക്കുള്ള സമയങ്ങളിലെ ട്രെയിന്‍ യാത്രകള്‍ ശരീരത്തിന് വലിയ ആയാസമുണ്ടാക്കുന്നു. സാധ്യമെങ്കില്‍, തിരക്കില്ലാത്ത സമയങ്ങളില്‍ യാത്ര ചെയ്യാനും ഇരിപ്പിടം ഉറപ്പാക്കാനും ശ്രദ്ധിക്കുക.
Comments