സുകുമാരക്കുറുപ്പ് വിദേശത്തുണ്ടെന്നത് അഭ്യൂഹം ; സര്‍ക്കാരിന് ഒന്നും പൂഴ്ത്തിവെയ്ക്കാനില്ലെന്ന് രമേശ് ചെന്നിത്തല

കൊച്ചി: പിടികിട്ടാപുള്ളി സുകുമാര കുറുപ്പ് വിദേശത്ത് ഉണ്ട് എന്ന വെളിപ്പെടുത്തലില്‍ നിജസ്ഥിതി അറിയാനുള്ള ശ്രമത്തില്‍ കേരള പൊലീസ് ഇന്റര്‍പോളുമായി ബന്ധപ്പെട്ടിരിക്കുയാണെന്ന് ആഭ്യന്തരമന്ത്രി രമേശ് ചെന്നിത്തല. നിജസ്ഥിതി അറിയാന്‍ അന്വേഷണം നടക്കുന്നുണ്ടെന്നും ക്രൈംബ്രാഞ്ച് എഡിജിപിക്ക് നിര്‍ദേശം നല്‍കിയിട്ടുണ്ടെന്നും പറഞ്ഞു.

സുകുമാരക്കുറുപ്പിനെ കണ്ടെന്നത് അഭ്യൂഹമാണെന്നും ആഭ്യന്തര മന്ത്രി പറഞ്ഞു. കഴിഞ്ഞ കുറെ ദിവസങ്ങളായി അഭ്യൂഹങ്ങള്‍ ഉണ്ട്. വയലാര്‍ രവി ആഭ്യന്തരമന്ത്രി ആയിരുന്ന കാലത്തെ സംഭവമാണ്. അത് സുകുമാരക്കുറുപ്പ് ആണെന്ന് ഉറപ്പാക്കാന്‍ ശാസ്ത്രീയ തെളിവുകള്‍ വേണ്ടതുണ്ടെന്നും പറഞ്ഞു. അന്വേഷണവുമായി ബന്ധപ്പെട്ട റിപ്പോര്‍ട്ട് പൂഴ്ത്തി എന്ന ആരോപണത്തില്‍ 40 വര്‍ഷത്തിലേറെ പഴക്കമുള്ള കാര്യത്തില്‍ എന്താണ് പൂഴ്ത്തി വെയ്ക്കാന്‍ ഉള്ളതെന്നും ചെന്നിത്തല ചോദിച്ചു.

ഹൃദ്രോഗിയായ സുകുമാരക്കുറുപ്പ് ഇത്രകാലം ജീവിച്ചിരിക്കാന്‍ ഇടയില്ലെന്നും മരണപ്പെട്ടിരിക്കാമെന്നും കാണിച്ച് ക്രൈംബ്രാഞ്ച് അന്വേഷണം അവസാനിപ്പിക്കാന്‍ പോകുമ്പോഴാണ് ബ്രൂണെയില്‍ സുകുമാരക്കുറുപ്പിനോട് സാദൃശ്യം തോന്നുന്നയാളെ കണ്ടെന്ന വിവരം പുറത്തുവന്നിരിക്കുന്നത്. ഇതോടെ ഇക്കാര്യം കൂടി അന്വേഷിക്കാന്‍ അന്വേഷണത്തിന് ആഭ്യന്തരവകുപ്പ് നിര്‍ദേശം നല്‍കിയിരിക്കുന്നത്.