‘ദൈവത്തിന്റെ വിലയേറിയ സമ്മാനം’; മകള്‍ അലീസയ്ക്ക് ഹൃദ്യമായ പിറന്നാള്‍ ആശംസകള്‍ നേര്‍ന്ന് സുസ്മിത സെന്‍

മകൾ അലീസയുടെ 17-ാം പിറന്നാൾ ദിനത്തിൽ വൈകാരികമായ കുറിപ്പുമായി ബോളിവുഡ് താരം സുസ്മിത സെൻ. ദൈവത്തിന്റെ വിലയേറിയ സമ്മാനമെന്നാണ് താരം മകളെ വിശേഷിപ്പിച്ചിരിക്കുന്നത്.

"പിറന്നാൾ ആശംസകൾ ഷോണ... വളരെ മനോഹരവും ചിന്താശീലമുള്ളതും ദയാലുവും ഉദാരമനസ്‌കവുമായ ഒരു ആത്മാവ്... കൃത്യം 17 വർഷം മുമ്പ് സ്‌നേഹനിധിയായ ഒരു ദൈവം എനിക്ക് ഈ ദിവസത്തിൽ സമ്മാനിച്ചയാൾ. ഞാൻ അവൾക്ക് 'ദൈവത്തിന്റെ വിലയേറിയ സമ്മാനം' എന്ന് പേരിട്ടു, അലീസ" എന്നാണ് മകൾക്കൊപ്പമുള്ള ചിത്രങ്ങൾ പങ്കുവെച്ച് സുസ്മിത ഇൻസ്റ്റാഗ്രാമിൽ കുറിച്ചത്.

കാലം കടന്നുപോകുമ്പോൾ അലീസ വളർന്നുവന്ന വ്യക്തിത്വത്തെക്കുറിച്ചും താരം വാചാലയായി. "കാലം കടന്നുപോകുന്തോറും ആ പേരിന് പിന്നിലെ വ്യക്തിയെ ഞാൻ കാണുമ്പോൾ... ഈ ലോകത്തിനും മനുഷ്യരാശിക്കും നീ ഒരു സമ്മാനമായിരിക്കുമെന്ന അഗാധവും സന്തോഷകരവുമായ ഒരു തിരിച്ചറിവ് എനിക്കുണ്ട്. നീ ആരാണെന്നതിലും നിന്നിലൂടെ ഒഴുകിയെത്തുന്ന ദൈവകൃപയിലും ഞാൻ അഭിമാനിക്കുന്നു. നിന്റെ ലാളിത്യത്തിൽ ഞാൻ ഇപ്പോഴും വിസ്മയിച്ചുനിൽക്കുന്നു... ഒരുപാട് സ്‌നേഹിക്കുന്നു!" എന്നും താരം കൂട്ടിച്ചേര്‍ത്തു.

രണ്ട് പെൺകുട്ടികളെയാണ് സുസ്മിത ദത്തെടുത്ത് വളർത്തുന്നത്. തന്റെ ഇരുപത്തിനാലാം വയസ്സിലാണ് താരം മൂത്ത മകൾ റെനീ സെന്നിനെ ദത്തെടുക്കുന്നത്. തുടർന്ന് 2010-ലാണ് അലീസയും കുടുംബത്തിലേക്ക് എത്തിയത്.