ആമയെ കണ്ടപ്പോൾ കൗതുകം, ഒടുവിൽ പുറത്ത് കയറി സവാരി; ചൈനയിലെ പാർക്കിൽ നിന്നുള്ള ദൃശ്യങ്ങൾക്കെതിരെ രൂക്ഷ വിമർശനം

മൃഗങ്ങളെ അടുത്തുകാണാനും അവയുടെ ചലനങ്ങൾ ആസ്വദിക്കാനുമാണ് പലരും മൃഗശാലകളിലും പാർക്കുകളിലും എത്തുന്നത്. എന്നാൽ ചൈനയിലെ ഒരു പാർക്കിൽ സന്ദർശകർ ചെയ്തത് കണ്ട് സോഷ്യൽ മീഡിയയിൽ വലിയ രോഷമാണ് ഉയരുന്നത്. സാധാരണയായി അകലെ നിന്ന് മാത്രം കാണുന്ന ആമയെ അടുത്തുകണ്ടതിന്റെ ആവേശത്തിൽ ചിലർ അതിന്റെ പുറത്ത് കയറുകയായിരുന്നു. സംഭവത്തിന്റെ വീഡിയോ പുറത്തുവന്നതോടെ മൃഗങ്ങളോടുള്ള മനുഷ്യരുടെ പെരുമാറ്റത്തെക്കുറിച്ചുള്ള ചർച്ചകളും ശക്തമായി.

ചൈനയിലെ ഗ്വാങ്‌ഡോങ് പ്രവിശ്യയിലെ ഫോഷാനിലുള്ള ചാങ്‌ലു ടൂറിസം ആൻഡ് ലെഷർ പാർക്കിലാണ് സംഭവം നടന്നത്. വലിയ ആമകളെ കാണുന്നതിനിടയിൽ ഒരു യുവതി കുട്ടിയുമായി ആമയുടെ പുറത്ത് കയറിയതാണ് വീഡിയോയിൽ കാണുന്നത്. ആമ മുന്നോട്ട് നീങ്ങാൻ ശ്രമിക്കുന്നതിനിടെ യുവതി അതിന്റെ പുറത്ത് ഇരുന്ന് ചിരിക്കുന്നതും സമീപത്തുണ്ടായിരുന്ന മറ്റൊരു കുട്ടിയെയും ആമയുടെ പുറത്ത് കയറാൻ പ്രോത്സാഹിപ്പിക്കുന്നതും ദൃശ്യങ്ങളിലുണ്ട്.

പാർക്കിൽ ആമകളുടെ പുറത്ത് കയറുകയോ അവയുടെ ശരീരത്തിൽ ഇരിക്കുകയോ ചെയ്യരുതെന്ന് മുന്നറിയിപ്പ് നൽകിയിരുന്നുവെന്നാണ് റിപ്പോർട്ട്. എന്നിട്ടും സന്ദർശകർ ഇത്തരത്തിൽ പെരുമാറിയത് വലിയ വിമർശനത്തിനിടയാക്കി. ആമയുടെ പുറത്ത് കയറുന്നത് അതിന് അസ്വസ്ഥത മാത്രമല്ല, ശരീരത്തിന് പരിക്കേൽക്കാനും കാരണമാകുമെന്ന് അധികൃതരും വ്യക്തമാക്കി. സംഭവസമയത്ത് പാർക്ക് ജീവനക്കാർ ഇടപെടാത്തതിനെതിരെയും ചിലർ വിമർശനം ഉന്നയിച്ചു.

വീഡിയോ സമൂഹമാധ്യമങ്ങളിൽ വൈറലായതോടെ മൃഗങ്ങളോട് കരുണയോടെയും ഉത്തരവാദിത്തത്തോടെയും പെരുമാറണമെന്ന ആവശ്യവുമായി നിരവധി പേരാണ് രംഗത്തെത്തിയത്. സംഭവത്തിൽ ഉൾപ്പെട്ട ആമയെ പിന്നീട് മൃഗഡോക്ടർ പരിശോധിച്ചെന്നും ആരോഗ്യനിലയിൽ പ്രശ്നങ്ങളൊന്നും കണ്ടെത്തിയില്ലെന്നും പാർക്ക് അധികൃതർ അറിയിച്ചു. എന്നാൽ ഒരു വിനോദത്തിനുവേണ്ടി മൃഗങ്ങളെ ഉപയോഗിക്കുന്നത് എത്രത്തോളം ശരിയാണെന്ന ചോദ്യമാണ് ഈ വൈറൽ ദൃശ്യങ്ങൾ വീണ്ടും ഉയർത്തുന്നത്.