മാള്‍ട്ടിയുടെ സ്‌നേഹ സമ്മാനം; കസിന്‍ നീറിന് രാഖി അയച്ചുകൊടുത്ത് പ്രിയങ്ക ചോപ്രയുടെ മകള്‍; ചിത്രം പങ്കുവെച്ച് പരിനീതി ചോപ്ര

ബോളിവുഡ് താരം പരിനീതി ചോപ്രയുടെയും രാഷ്ട്രീയ നേതാവ് രാഘവ് ഛദ്ദയുടെയും മകൻ നീർ തന്റെ ആദ്യ രക്ഷാബന്ധൻ ആഘോഷമാക്കിയതിന്റെ വിശേഷങ്ങളാണ് ഇപ്പോൾ സോഷ്യൽ മീഡിയയിൽ തരംഗമാകുന്നത്. പരിനീതിയുടെ കസിനും നടിയുമായ പ്രിയങ്ക ചോപ്രയുടെയും നിക്ക് ജോനാസിന്റെയും മകൾ മാൾട്ടി മേരി അയച്ച പ്രത്യേക രാഖി അണിഞ്ഞാണ് നീർ ഈ ആഘോഷത്തിൽ പങ്കാളിയായത്.

ശനിയാഴ്ച ഇൻസ്റ്റാഗ്രാമിലൂടെയാണ് പരിനീതി കുഞ്ഞു നീറിന്റെ കൈകളിൽ രാഖി കെട്ടിയിരിക്കുന്ന മനോഹരമായ ചിത്രം ആരാധകരുമായി പങ്കുവെച്ചത്. "എന്റെ ആദ്യ രാഖിക്ക് നന്ദി മാൾട്ടി ദീദി, ഒരുപാട് സ്നേഹം.. നീർ" എന്ന് കുറിച്ചുകൊണ്ടാണ് പരിനീതി ചിത്രം പങ്കുവെച്ചത്. തുടർന്ന് പ്രിയങ്ക ചോപ്ര ഈ ചിത്രം ഇൻസ്റ്റാഗ്രാമിൽ റീ-ഷെയർ ചെയ്യുകയും, 'ദിദി നിന്നെ സ്നേഹിക്കുന്നു ബേബി നീർ' എന്ന് കുറിക്കുകയും ചെയ്തു.

കഴിഞ്ഞവർഷം ഒക്ടോബറിലാണ് പരിനീതിക്കും രാഘവിനും മകൻ നീർ ജനിച്ചത്. കുഞ്ഞിന്റെ ജനനം മുതൽ പ്രിയങ്കയും കുടുംബവും വിലപിടിപ്പുള്ള സ്നേഹസമ്മാനങ്ങൾ അയച്ചുനൽകി ഒപ്പമുണ്ടായിരുന്നു. യു.എസിൽ സ്ഥിരതാമസമാണെങ്കിലും പ്രിയങ്ക ചോപ്ര തന്റെ വസതിയിൽ ദീപാവലിയും ഹോളിയും ഉൾപ്പെടെയുള്ള ഇന്ത്യൻ ആഘോഷങ്ങൾ കൃത്യമായി ആചരിക്കാറുണ്ട്.

അതേസമയം റെനിൽ ഡിസില സംവിധാനം ചെയ്യുന്ന നെറ്റ്ഫ്ലിക്സ് ചിത്രം 'തലാഷ്' ആണ് പരിനീതിയുടെ വരാനിരിക്കുന്ന പ്രധാന പ്രൊജക്റ്റ്. എസ്.എസ്. രാജമൗലിയുടെ സംവിധാനത്തിൽ മഹേഷ് ബാബുവും പൃഥ്വിരാജ് സുകുമാരനും ഒപ്പം അഭിനയിക്കുന്ന 'വാരണാസി' എന്ന ബ്രഹ്മാണ്ഡ ചിത്രത്തിലൂടെ പ്രിയങ്ക ചോപ്ര ഇന്ത്യൻ സിനിമയിലേക്ക് തിരിച്ചുവരവിനൊരുങ്ങുകയാണ്. 2027 ഏപ്രിലിൽ ചിത്രം തിയേറ്ററുകളിലെത്തും.