താമരശ്ശേരി: അടച്ചിട്ട വീടിനുള്ളില്‍ നിന്നും വിദേശമദ്യക്കുപ്പികളും വെടിയുണ്ട ശേഖരവും കണ്ടെത്തിയതിനെ തുടര്‍ന്ന് യുവാവിനെ പോലീസ് കസ്റ്റഡിയില്‍ എടുത്തു. താമരശ്ശേരിയിലെ വീട്ടില്‍ നിന്നും കഴിഞ്ഞ ദിവസം വൈകിട്ട് പോലീസും എക്‌സൈസും ചേര്‍ന്ന് നടത്തിയ തെരച്ചിലിലാണ് മദ്യക്കുപ്പികളും വെടിയുണ്ടയും കണ്ടെത്തിയത്. സംഭവത്തില്‍ പോലീസ് അന്വേഷണം നടത്തി വരികയാണ്.
നെല്ലിപ്പുഴി സ്വദേശി നിധിന്‍ എന്നയാളെയാണ് താമരശ്ശേരി പോലീസ് കസ്റ്റഡിയില്‍ എടുത്തത്. വീട്ടില്‍ നിന്നും ഒരു മിനി ബീവറേജസ് തന്നെയാണ് കണ്ടെത്തിയത്. വിദേശമദ്യശേഖരം ഉണ്ട് എന്ന രഹസ്യസന്ദേശം കിട്ടിയതിനെ തുടര്‍ന്നായിരുന്നു എക്‌സൈസ് പരിശോധന നടത്തിയത്. തുടര്‍ന്ന് 63 കുപ്പി വിദേശമദ്യവും അതിനൊപ്പം 70 ലധികം വെടിയുണ്ടയും കണ്ടെത്തിയിരുന്നു. ഇതെല്ലാം അനധികൃതമായി സൂക്ഷിക്കപ്പെട്ടതായിരുന്നു. ഉടന്‍ തന്നെ എക്‌സൈസ് താമരശ്ശേരി പോലീസിന് വിവരം നല്‍കുകയും പോലീസ് എത്തി വെടിയുണ്ടകള്‍ പിടിച്ചെടുക്കുകയുമായിരുന്നു.
വീട് നിധിന്‍ മറ്റൊരാളില്‍ നിന്നും വാടകയ്ക്ക് എടുത്തതാണെന്നും പോലീസ് കണ്ടെത്തി. കോടഞ്ചേരിക്കാരനായ ഒരാളുടേതാണ് വീട്. അനധികൃതമായി ആയുധം കൈവശം വെച്ചതിനാണ് കേസെടുത്തിരിക്കുന്നത്. മദ്യവും വെടിയുണ്ടയും എന്തിനാണ് സൂക്ഷിച്ചതെന്ന് വ്യക്തമല്ല. വെടിയുണ്ട സൂക്ഷിക്കാനുള്ള നിയമപ്രകാരമുള്ള ഒരു രേഖകളും ഇയാളുടെ പക്കല്‍ ഉണ്ടായിരുന്നുമില്ലെന്നാണ് പോലീസ് പറയുന്നത്.
Comments