ബോളിവുഡിന് ഏറ്റവും പ്രിയപ്പെട്ട സംവിധായകനായ ഡേവിഡ് ധവാന്റെ മകനും യുവനായകന്മാരില്‍ മുന്‍നിരയിലുള്ള താരവുമാണ് വരുണ്‍ ധവാന്‍. ആദ്യ സിനിമയിലൂടെ തന്നെ പ്രേക്ഷകമനസ്സ് കീഴടക്കിയ താരത്തിനെ ഏറ്റവുമിഷ്ടപ്പെടുന്നത് കുട്ടിപ്രേക്ഷകരാണ്. താരത്തിന്റെ ക്യൂട്ട്നെസ്സും സ്റ്റൈലുമൊക്കെ ചെറുപ്പക്കാര്‍ക്കും വലിയ ഹരമാണ്. വലിയൊരു ആരാധകവൃന്ദം തന്നെ വരുണ്‍ ധവാനുണ്ട്.
ഇപ്പോഴിതാ അഭിനയം പോലെ താനേറെയിഷ്ടപ്പെടുന്ന കൃഷിയ്ക്കു വേണ്ടി സമയം ചെലവിടുന്ന ചിത്രങ്ങള്‍ പങ്കിടുകയാണ് വരുണ്‍ ധവാന്‍. പുതിയൊരു ഫാം വാങ്ങി അതിലാണ് താരം നെല്‍ക്കൃഷി തുടങ്ങിയിരിക്കുന്നത്.
‘‘കൃഷി ആരംഭിക്കുന്നു...’’ എന്ന ക്യാപ്ഷന്‍ നല്‍കിയാണ് താരം ചിത്രങ്ങള്‍ പങ്കിട്ടിരിക്കുന്നത്. നെൽച്ചെടികൾ നടുന്നതിന്റെയും കർഷകരോടൊപ്പം കൃഷി ചെയ്യുന്നതിന്റെയും താരം പങ്കുവച്ചിട്ടുണ്ട്. വെള്ള ഷർട്ടും പാന്റ്സും ബൂട്ടും ധരിച്ച്, ചെളി നിറഞ്ഞ വയലുകളിൽ ഒരു കൃഷി ഉപകരണം വച്ച് കൃഷി ചെയ്യുന്നത് കാണാം. പാടത്തിന്റെ നടുക്ക് നില്‍ക്കുന്ന ചിത്രവും വിളകൾ നടുന്ന ചിത്രങ്ങളും താരം ഷെയര്‍ ചെയ്തിട്ടുണ്ട്. ഒപ്പം ഫാമിൽ ജോലി ചെയ്യുന്ന ആളുകളുമായി സമയം ചെലവഴിക്കുന്ന ചിത്രവുമുണ്ട്. സ്വന്തം ഫാമില്‍ ഏറെ ആസ്വദിച്ചാണ് താരം കൃഷി ചെയ്യുന്നതെന്ന് ചിത്രങ്ങളില്‍ നിന്ന് വ്യക്തമാണ്. താരത്തിന്റെ പുതിയ വിനോദത്തിന് നിറഞ്ഞ കൈയടി നല്‍കുകയാണ് ആരാധകര്‍. നിരവധി സഹപ്രവര്‍ത്തകരും വരുണിന്റെ പുതിയ പാഷനെ ആശംസിച്ച് കമന്റുകള്‍ കുറിക്കുന്നുണ്ട്.
കരിയറിലും നല്ല തിരക്കിലായ താരം ഏറ്റവുമവസാനം അഭിനയിച്ചത്, അച്ഛന്‍ ഡേവിഡ് ധവാൻ സംവിധാനം ചെയ്ത ‘ഹേ ജവാനി തോ ഇഷ്ക് ഹോനാ ഹേ’ എന്ന റൊമാന്റിക് കോമഡി ചിത്രത്തിലാണ്. മൃണാൽ താക്കൂർ, പൂജ ഹെഗ്‌ഡെ എന്നിവരോടൊപ്പം മനീഷ് പോൾ, ചങ്കി പാണ്ഡെ, ജിമ്മി ഷെയർഗിൽ, മൗനി റോയ് എന്നിവരും ചിത്രത്തിൽ അഭിനയിക്കുന്നു. ഡേവിഡ് ധവാന്റെ അവസാന സംവിധാന പദ്ധതിയായിരിക്കുമെന്നാണ് റിപ്പോര്‍ട്ട്.
Comments