തിരക്കേറിയ റോഡിൽ യുവതിയെ തല്ലിച്ചതച്ച് യുവാവ്; വീഡിയോയ്ക്ക് പിന്നാലെ ആളിക്കത്തി ജനരോഷം

തിരക്കേറിയൊരു റോഡിൽ ആളുകൾക്കും വാഹനങ്ങൾക്കും മുന്നിൽ അരങ്ങേറിയ കാഴ്ച ആരെയും ഞെട്ടിക്കുന്നതായിരുന്നു. വഴിയരികിൽ എന്താണ് സംഭവിക്കുന്നതെന്ന് നോക്കിനിൽക്കുന്നവർക്കിടയിൽ ഒരു യുവാവ് യുവതിയെ മർദിക്കുകയും അസഭ്യം പറയുകയും ചെയ്യുന്ന ദൃശ്യങ്ങളാണ് ഇപ്പോൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നത്. ഡൽഹിയിലെ വികാസ്‌പുരി ഫ്ലൈഓവറിന് സമീപത്തുനിന്നുള്ളതെന്ന് പറയപ്പെടുന്ന വീഡിയോ വലിയ പ്രതിഷേധത്തിനും ചർച്ചകൾക്കും വഴിവെച്ചിരിക്കുകയാണ്.

വൈറൽ വീഡിയോയിൽ യുവാവ് യുവതിയെ പലതവണ അടിക്കുകയും തള്ളുകയും ചെയ്യുന്നതായി കാണാം. ഇതിനിടെ ഇയാൾ യുവതിയോട് രൂക്ഷമായി സംസാരിക്കുകയും അസഭ്യം പറയുകയും ചെയ്യുന്നുണ്ട്. തിരക്കേറിയ റോഡിൽ വാഹനങ്ങൾ കടന്നുപോകുന്നതിനിടെയാണ് സംഭവമെന്നതാണ് ദൃശ്യങ്ങളെ കൂടുതൽ ആശങ്കപ്പെടുത്തുന്നത്. ആക്രമണത്തിനിടെ യുവതിയും യുവാവും തമ്മിൽ വാക്കുതർക്കം നടക്കുന്നതായും വീഡിയോയിൽ വ്യക്തമാണ്.

സംഭവത്തിനിടെ മറ്റൊരു യുവാവ് ഇവർക്കരികിലെത്തി പ്രശ്നത്തിൽ ഇടപെടാൻ ശ്രമിക്കുന്നതും ദൃശ്യങ്ങളിലുണ്ട്. എന്നാൽ അതിന് ശേഷവും ആക്രമണം ഉടൻ അവസാനിക്കുന്നില്ലെന്നാണ് വീഡിയോ സൂചിപ്പിക്കുന്നത്. സംഭവത്തിന് പിന്നിലെ യഥാർഥ കാരണം എന്താണെന്നോ ഇരുവരും തമ്മിലുള്ള ബന്ധം എന്താണെന്നോ നിലവിൽ വ്യക്തമായിട്ടില്ല. വീഡിയോയിൽ കാണുന്ന സംഭവത്തിന് മുമ്പ് എന്താണ് നടന്നതെന്നും വ്യക്തമല്ല.

ദൃശ്യങ്ങൾ പുറത്തുവന്നതോടെ സ്ത്രീകൾക്കെതിരായ അതിക്രമങ്ങൾക്കെതിരെ സമൂഹമാധ്യമങ്ങളിൽ രൂക്ഷ പ്രതികരണമാണ് ഉയരുന്നത്. തിരക്കേറിയ പൊതുസ്ഥലത്ത് പോലും ഇത്തരം ആക്രമണം നടക്കുന്നത് ഗുരുതരമായ ആശങ്കയാണെന്നും സംഭവത്തിൽ അധികൃതർ ഇടപെടണമെന്നും നിരവധി പേർ ആവശ്യപ്പെട്ടു. അതേസമയം, വൈറൽ വീഡിയോയുടെ ആധികാരികത സ്വതന്ത്രമായി സ്ഥിരീകരിച്ചിട്ടില്ലെന്നും സംഭവത്തിൽ പൊലീസ് നടപടി സ്വീകരിച്ചോ എന്ന കാര്യത്തിൽ വ്യക്തമായ വിവരങ്ങൾ ലഭ്യമല്ലെന്നും റിപ്പോർട്ടിൽ പറയുന്നു.