കൊച്ചി: സഹപാഠികളുടെയും അദ്ധ്യാപകരുടേയും ചിത്രങ്ങള്‍ മോര്‍ഫിംഗ് ചെയ്ത് പ്രചരിപ്പിച്ച കേസില്‍ പ്രതി ശ്രീഹരിയില്‍ നിന്നും പോലീസിന് കിട്ടിയിരിക്കുന്നത് ഞെട്ടിക്കുന്ന മൊഴി. ഇതിന് പിന്നില്‍ വന്‍ റാക്കറ്റ് പ്രവര്‍ത്തിക്കുന്നതായും കൂടുതല്‍ വിദ്യാര്‍ത്ഥികള്‍ക്ക് പങ്കുണ്ടെന്നാണ് വിവരം. റാക്കറ്റിനെ നിയന്ത്രിക്കുന്നത് മലപ്പുറം സ്വദേശിയായ ഒരു വിദ്യാര്‍ത്ഥിയാണ്. ഇയാളെ ഒന്നാം പ്രതിയാക്കി കേസെടുത്തു.
ശ്രീഹരിയുടെ മൊഴിയുടെ അടിസ്ഥാനത്തില്‍ ഇയാള്‍ക്ക് വേണ്ടിയുള്ള തെരച്ചിലിലാണ് പോലീസ്. കേസ് ഭാരത് മാതാ കോളേജിന് അപ്പുറത്തേക്ക് നീളുന്നതാണെന്നാണ് മൊഴി. മറ്റു കോളേജുകളിലെ വിദ്യാര്‍ത്ഥികളുടെ ചിത്രങ്ങളും മോര്‍ഫിംഗിന് ഇരയാക്കിയിട്ടുണ്ടെന്നുമാണ് മൊഴി. സംഘത്തിലും മറ്റു കോളേജിലെ വിദ്യാര്‍ത്ഥികളുമുണ്ട്. കോളേജ് അധികൃതര്‍ നല്‍കിയ പരാതിയിലാണ് ബിബിഎ രണ്ടാം വര്‍ഷ വിദ്യാര്‍ത്ഥിയായ ശ്രീഹരിക്കെതിരേ പോലീസ് കേസെടുത്തത്. ഇയാളെ പോലീസ് ചോദ്യം ചെയ്തു വരികയാണ്. സംഭവത്തില്‍ കൂടുതല്‍ അറസ്റ്റ് ഉണ്ടായേക്കുമെന്നാണ് വിവരം.
അഞ്ചിലധികം പേര്‍ സംഘത്തിലുണ്ടെന്നാണ് വിവരം. ഇവര്‍ മാത്രമുള്ള ടെലിഗ്രാം ഗ്രൂപ്പ് ഉണ്ടായിരുന്നു. അതിലൂടെയാണ് പ്രവര്‍ത്തനം നടത്തിയിരുന്നത്. ഈ ഗ്രൂപ്പ് ഇപ്പോള്‍ ഡിലീറ്റ് ചെയ്ത നിലയിലാണ്. എന്നാല്‍ ഗ്രൂപ്പ് കണ്ടെത്താനുള്ള നീക്കത്തിലാണ് സൈബര്‍പോലീസ്. ഇതിന് പുറമേ പതിനായിരം പേര്‍ അംഗങ്ങളായുള്ള മറ്റൊരു ടെലിഗ്രാം ഗ്രൂപ്പ് ഉണ്ടായിരുന്നു. ഇതില്‍ മറ്റു കോളേജിലെ വിദ്യാര്‍ത്ഥികളും ഉണ്ടായിരുന്നു. ഇതിലൂടെയാണ് മോര്‍ഫിംഗ് നടത്തിയ ചിത്രം പ്രചരിപ്പിച്ചിരുന്നത്. റാക്കറ്റ് പ്രവര്‍ത്തിക്കാന്‍ തുടങ്ങിയിട്ട് മാസങ്ങളായെന്നുമാണ് ശ്രീഹരിയില്‍ നിന്നും കിട്ടിയിരിക്കുന്ന വിവരം. കഴിഞ്ഞ ഡിസംബര്‍ മുതല്‍ റാക്കറ്റ് പ്രവര്‍ത്തിച്ചുവരികയായിരുന്നു. അന്വേഷണത്തില്‍ കൂടുതല്‍ അറസ്റ്റ് ഉണ്ടായേക്കും.
ഭാരത് മാതാ കോളേജിലെ വിദ്യാര്‍ത്ഥികളും പൂര്‍വ്വവിദ്യാര്‍ത്ഥികളും റാക്കറ്റിലുണ്ട്. മോര്‍ഫിംഗിനും പ്രചരിപ്പിക്കാനുമായി ശ്രീഹരി സ്വന്തം ഫോണ്‍ ഉപയോഗിച്ചപ്പോള്‍ റാക്കറ്റിലെ മറ്റുള്ളവര്‍ വ്യാജഫോണ്‍ ഉപയോഗിച്ചായിരുന്നു പ്രവര്‍ത്തിച്ചത്. കോളേജിന്റെ മീഡിയാ ടീമിലെ അംഗം എന്ന പദവി ദുരുപയോഗം ചെയ്താണ് ശ്രീഹരി ചിത്രങ്ങള്‍ പകര്‍ത്തിയിരുന്നത്. നിലവില്‍ പ്രത്യേക അന്വേഷണ സംഘം രൂപീകരിച്ചാണ് അന്വേഷണം നടത്തുന്നത്. ശ്രീഹരിയെ ചോദ്യം ചെയ്തു വരികയാണ്. അന്വേഷണം ശ്രീഹരിയില്‍ മാത്രം ഒതുങ്ങരുതെന്നാണ് വിദയാര്‍ത്ഥികള്‍ പറയുന്നു.
Comments