ന്യൂഡൽഹി: വലതുപക്ഷ ഇൻഫ്ലുവൻസറായ സ്വതന്ത്ര ഭരദ്വാജിന്റെ വെളിപ്പെടുത്തലുകൾ ബിജെപിയെയും സഖ്യകക്ഷികളെയും പ്രതിരോധത്തിലാക്കുന്നു. മുഖം രക്ഷിക്കൽ നടപടിയുടെ ഭാഗമെന്നോണം ലോക് ജനശക്തി പാർട്ടി സ്വതന്ത്ര ഭരദ്വാജിനെതിരെ ഔദ്യോഗികമായി പരാതി നൽകി. തന്റെ പേര് ദുരുപയോഗം ചെയ്തുവെന്നാണ് ചിരാഗ് പാസ്വാൻ പരാതിയിൽ പറയുന്നത്.
ഭരദ്വാജ് തന്റെ പേര് ദുരുപയോഗം ചെയ്യുകയും, തനിക്ക് രാഷ്ട്രീയ സ്വാധീനമുണ്ടെന്ന് വരുത്തിതീർക്കാൻ ശ്രമിക്കുകയും ചെയ്തുവെന്ന് ചിരാഗ് പാസ്വാൻ വ്യക്തമാക്കി. പൊതുജീവിതത്തിൽ നിരവധി ആളുകൾ കാണാൻ വരികയും ഫോട്ടോയെടുക്കുകയും ചെയ്യാറുണ്ട്. എന്നാൽ അതിന്റെ പേരിൽ തങ്ങളുടെ പേര് ദുരുപയോഗം ചെയ്യുന്നതും, തന്റെ സ്വാധീനം കൊണ്ടാണ് നടപടി ഉണ്ടാകാത്തതെന്ന് വരുത്തിതീർക്കാൻ നോക്കുന്നതും അംഗീകരിക്കാനാവില്ലെന്ന് പാസ്വാൻ വ്യക്തമാക്കി. സംഭവത്തിൽ ഡൽഹി പോലീസ് നിഷ്പക്ഷ അന്വേഷണം നടത്തി കർശന നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു. ഇരയായ കുടുംബത്തിനൊപ്പം പാർട്ടിയുണ്ടാകുമെന്നും പസ്വാൻ ഉറപ്പുനൽകി.
സിജെപി ജന്തർ മന്തറിൽ നടത്തിയ പ്രതിഷേധത്തിനിടയിൽ വിദ്യാർത്ഥി പ്രവർത്തകയുടെ പിതാവിനെ ആക്രമിച്ചതായും അദ്ദേഹത്തിന്റെ തലയോട്ടി തകർത്തതായും സ്വതന്ത്ര ഭരദ്വാജ് അവകാശപ്പെടുന്ന ഒരു അഭിമുഖത്തിന്റെ വീഡിയോ പുറത്തുവന്നതിന് പിന്നാലെയാണ് ലോക് ജനശക്തി പാർട്ടി പരാതി നൽകിയത്. വിദ്യാർത്ഥി പ്രവർത്തകയുടെ പിതാവിനെ ആക്രമിച്ച സംഭവത്തെക്കുറിച്ച് സ്വതന്ത്ര ഭരദ്വാജ് നടത്തിയ വെളിപ്പെടുത്തലുകളാണ് നേതാക്കളെ പ്രതിരോധത്തിലാക്കിയത്. ഇരയുടെ തലയോട്ടി തകർത്തുവെന്നും 60-ഓളം തുന്നലുകൾ വേണ്ടിവന്ന ഗുരുതര പരിക്കേൽപ്പിച്ചിട്ടും താൻ അറസ്റ്റിലാകാതെ രക്ഷപ്പെട്ടുവെന്നും ഭരദ്വാജ് അഭിമുഖത്തിൽ വീമ്പിളക്കിയിരുന്നു.
തനിക്ക് രാഷ്ട്രീയ പിന്തുണയുണ്ടെന്ന് വരുത്തിതീർക്കാൻ ബീഹാർ ഉപമുഖ്യമന്ത്രി സമ്രാട്ട് ചൗധരി, ഡൽഹി മന്ത്രി കപിൽ മിശ്ര, കേന്ദ്രമന്ത്രി ചിരാഗ് പസ്വാൻ തുടങ്ങിയ പ്രമുഖ രാഷ്ട്രീയ നേതാക്കളുടെ പേരുകൾ ഇയാൾ പോഡ്കാസ്റ്റിൽ പരാമർശിച്ചു. കപിൽ മിശ്രയുടെയും ചിരാഗ് പസ്വാന്റെയും ഇടപെടൽ കൊണ്ടാണ് താൻ പിടിയിലാകാതെ ഇരുന്നതെന്ന തരത്തിലുള്ള അവകാശവാദങ്ങളും ഭരദ്വാജ് ഉന്നയിച്ചിരുന്നു. ഈ നേതാക്കൾക്കൊപ്പമുള്ള തന്റെ ഫോട്ടോകളും ഇയാൾ സമൂഹമാധ്യമങ്ങളിൽ പങ്കുവെച്ചിരുന്നു. വെള്ളിയാഴ്ച ഉത്തർപ്രദേശിൽ നിന്നാണ് ഡൽഹി പോലീസ് സ്വതന്ത്ര ഭരദ്വാജിനെ കസ്റ്റഡിയിലെടുത്തത്.
Comments