കണ്ണൂര്‍: വി. കുഞ്ഞികൃഷ്ണന്‍, ടി.കെ. ഗോവിന്ദന്‍, ജി. സുധാകരന്‍ എന്നിവര്‍ പാര്‍ട്ടിവിട്ടത് ഗൗരവത്തോടെ പരിശോധിക്കണമെന്നും കമ്യൂണിസ്റ്റ് പാര്‍ട്ടിയില്‍ ശുദ്ധീകരണം ആവശ്യമുണ്ടെന്നും സിപിഐഎം നേതാവ് പി.ജയരാജന്‍. രാഷ്ട്രീയ സ്വാധീനത്തില്‍ ഇടത് പക്ഷം എന്തുകൊണ്ട് പിന്നിലായെന്ന് പരിശോധിക്കണമെന്നും അണികളുടെ അഭിപ്രായം കേട്ട് തിരുത്തല്‍ നടത്തുമെന്നും പ്രതികരിച്ചു.
സിപിഐഎം കണ്ണൂര്‍ ഡിസിയുടെ പോഡ്കാസ്റ്റിലായിരുന്നു പി ജയരാജന്റെ പ്രതികരണം. പാര്‍ട്ടിവിട്ടവരുടേത് താത്ക്കാലിക വിജയം മാത്രമാണ്. പ്രശ്‌നങ്ങള്‍ പറയേണ്ടിയിരുന്നത് പാര്‍ട്ടിയില്‍ തന്നെയായിരുന്നു. അതിന് പകരം സിപിഐഎം വിരുദ്ധരുടെ കൂടെ ചേര്‍ന്ന് പാര്‍ട്ടിയെ ആക്രമിച്ചു. രാഷ്ട്രീയ സംഘടന പ്രവര്‍ത്തനത്തില്‍ പോരായ്മയുണ്ടായതായി വ്യക്തമാക്കിയ അദ്ദേഹം ഇടതുപക്ഷം തെറ്റ് തിരുത്തി തിരിച്ചുവരുമെന്നും പ്രത്യാശ പ്രകടിപ്പിച്ചു. പാര്‍ട്ടി അംഗങ്ങളുടെ അഭിപ്രായം കൂടി കണക്കിലെടുത്ത്് തെറ്റുകള്‍ തിരുത്തുകയാണ് പാര്‍ട്ടിക്ക് മുന്നോട്ടുപോകാനുള്ള വഴി.
തെറ്റായ പ്രവണതയ്ക്ക് വിധേയരായ ആളുകള്‍ പാര്‍ട്ടിക്കകത്ത് ഉണ്ടെങ്കില്‍ പരിശോധിക്കുകയും തിരുത്തുകയും വേണം. രാഷ്ട്രീയ സ്വാധീനത്തില്‍ ഇടതുപക്ഷം പുറകോട്ട് പോയതിന് ഒരു കാരണം വര്‍ഗീയ ശക്തികള്‍ പരസ്പരം സഹായിച്ചതാണ്. രണ്ടാമത്തെ ഭാഗം ഇടതുപക്ഷം സ്വയം പരിശോധിക്കേണ്ടതാണ്. വികസന നേട്ടങ്ങള്‍ ഉണ്ടാക്കിയത് കൊണ്ട് മാത്രം രാഷ്ട്രീയമാറ്റം ഉണ്ടാകില്ല. ലീഗിന്റെയും ബിജെപിയുടെയും കോണ്‍ഗ്രസിന്റെയും കൂടെ നില്‍ക്കുന്നവരെ ഒപ്പം കൂട്ടാനുള്ള രാഷ്ട്രീയ സംഘടനാ പ്രവര്‍ത്തനം നടത്തണം. അതില്‍ പോരായ്മ വന്നിട്ടുണ്ടെന്നും പറഞ്ഞു.
നേതൃത്വം അംഗങ്ങളോട് പറഞ്ഞത് സ്വതന്ത്രവും ഉള്ള് തുറന്ന ചര്‍ച്ചയും നടത്തണമെന്നാണ്. മനസ്സില്‍ അടിഞ്ഞുകൂടിയ സംശയങ്ങളാണ് പാര്‍ട്ടി അംഗങ്ങള്‍ തുറന്നടിച്ചത്. ഈ പ്രക്രിയ നടന്നതുകൊണ്ടാണ് കേന്ദ്ര കമ്മിറ്റി രേഖ അംഗീകരിച്ചത്. കേന്ദ്ര കമ്മിറ്റി രേഖ അടിസ്ഥാനത്തില്‍ തെറ്റുകള്‍, പോരായ്മകള്‍, തെറ്റായ പ്രവണതകള്‍ അതിനെതിരെ ഉള്‍പ്പാര്‍ട്ടിയില്‍ ചര്‍ച്ചയും നടന്നു. ഈ പ്രക്രിയ പാര്‍ട്ടിക്ക് അകത്ത് ഇനിയും തുടരുമെന്നും അതിന്റെ ഭാഗമാണ് വിശാല സംസ്ഥാന സമിതി യോഗം എന്നും അദ്ദേഹം ചൂണ്ടിക്കാട്ടി.
Comments