വിവാദങ്ങളും ചര്‍ച്ചകളും സൈബര്‍ ആക്രമണങ്ങളുമൊക്കെയുണ്ടെങ്കിലും നടനവിസ്മയം മോഹന്‍ലാല്‍ അവതരിപ്പിക്കുന്ന ബിഗ് ബോസ് മലയാളം സീസണുകള്‍ക്കായി ആവേശത്തോടെയാണ് കുടുംബപ്രേക്ഷകര്‍ കാത്തിരിക്കുന്നത്. ഒരു സീസണ്‍ അവസാനിച്ച് വിജയിയെ തെരഞ്ഞെടുക്കുമ്പോള്‍ മുതല്‍ അടുത്ത സീസണില്‍ ആരൊക്കെയുണ്ടാകുമെന്നതാണ് പ്രേക്ഷകര്‍ ചിന്തിക്കാന്‍ തുടങ്ങുന്നത്. അത്തരത്തില്‍ പ്രേക്ഷകർ മാസങ്ങളായി ആകാംക്ഷയോടെ കാത്തിരുന്ന ബിഗ് ബോസ് മലയാളം സീസണ്‍ 8 ന് തിരശ്ശീല ഉയരാൻ ഇനി മണിക്കൂറുകള്‍ മാത്രമാണ് ബാക്കിയുള്ളത്.
ഇതിനിടെ സിനിമ, സീരിയല്‍, ടെലിവിഷൻ, സോഷ്യല്‍ മീഡിയ, ആക്ടിവിസം തുടങ്ങി വിവിധ മേഖലകളില്‍ നിന്നുള്ള പ്രമുഖരുടെ പേരുകള്‍ തങ്ങളുടെ പ്രെഡിക്ഷന്‍ ലിസ്റ്റിലൂടെ പ്രേക്ഷകര്‍ പങ്കുവച്ചിരുന്നു. എന്നാല്‍ സെപ്റ്റംബർ 6-ന് വൈകുന്നേരം നടക്കുന്ന ഗംഭീര ഗ്രാൻഡ് പ്രീമിയർ എപ്പിസോഡിലൂടെ മാത്രമേ മത്സരാർത്ഥികളുടെ അന്തിമ പട്ടിക ഔദ്യോഗികമായി പുറത്തു വരുകയുള്ളൂ. പുതിയ സീസണില്‍ മാറ്റുരയ്ക്കാനെത്തുവന്നരില്‍ തുടക്കം മുതല്‍ തന്നെ ഏറ്റവും ശക്തമായി ഉയർന്നുകേട്ട പേരായിരുന്നു രാഹുല്‍ ഈശ്വറിന്റേത്.
ഇപ്പോഴിതാ എല്ലാ അഭ്യൂഹങ്ങള്‍ക്കും ആക്കം കൂട്ടിക്കൊണ്ട് രാഹുല്‍ ഈശ്വർ സോഷ്യല്‍ മീഡിയയില്‍ പങ്കിട്ട കുറിപ്പാണ് ചര്‍ച്ചകളില്‍ നിറയുന്നത്. കുടുംബത്തോടൊപ്പം എയർപോർട്ടില്‍ നിന്നുള്ള ചിത്രം പങ്കിട്ടായിരുന്നു രാഹുല്‍ ഈശ്വറിന്റെ കുറിപ്പ്.
‘‘ഒരുപാട് അകലെയുള്ള ‘ഒരു രാജ്യത്ത്’ പോവുകയാണ്... രാജഭരണമുള്ള രാജ്യമാണ്. ഇന്ത്യൻ ഭരണഘടന ഉയർത്തിപ്പിടിക്കുന്ന സോഷ്യലിസം, ജനാധിപത്യം, മതസൗഹാർദ്ദം എല്ലാമാണ് ആധുനിക രാജ്യങ്ങളില്‍ വേണ്ടത്. എല്ലാ പ്രാർത്ഥനകളും വേണം. സാധാരണ ഫിൻലാൻഡില്‍ പോകുമ്പോഴാണ് വീട്ടുകാർ കൊണ്ട് വിടുന്നത്. ഇത് ‘അതിലും ദൂരെ പോവുകയാണ്’... ഒരുപാട് ഒരുപാട് ദൂരെ. പക്ഷെ നമ്മള്‍ ഇവിടെയൊക്കെത്തന്നെ കാണും. കാരണം ഇന്ത്യയും ഗാന്ധിജിയും തന്നെയാണ് എന്നും ഇപ്പോഴും മനസ്സില്‍. ജയ് ഹിന്ദ്...’’ എന്നാണ് രാഹുല്‍ ഈശ്വറിന്റെ കുറിപ്പ്. എവിടേക്കാണ് പോകുന്നതെന്ന് രാഹുല്‍ പറയാത്തതിനാല്‍ ഈ നിഗൂഢമായ യാത്ര ബിഗ് ബോസ് ഹൗസിലേക്കാണോ എന്ന് പല ആരാധകരും ചോദിക്കുന്നുണ്ട്. പലരും പോസ്റ്റിനു താഴെ ബിഗ് ബോസ് ഹൗസിലേക്കാണോ എന്ന് സംശയം പ്രകടിപ്പിച്ച് കമന്റുകള്‍ കുറിക്കുന്നുണ്ട്. മുന്‍പ് മലയാളി ഹൗസ് എന്ന റിയാലിറ്റി ഷോയില്‍ രാഹുല്‍ ഈശ്വര്‍ മത്സരാര്‍ത്ഥിയായി എത്തിയിരുന്നു.
വിമാനത്തിന്റെയകത്തു നിന്നുള്ള ചിത്രങ്ങള്‍ പങ്കിട്ടും താരം കുറിപ്പ് പങ്കുവച്ചിട്ടുണ്ട്. ‘‘വിമാന യാത്ര ക്ക് ശേഷം ‘വേറൊരു രാജ്യത്തെത്തി’... ഇവിടത്തെ രാജ ഭരണം ഭയങ്കര കടുപ്പമാണെന്നു കേൾക്കുന്നു. രാജാവിനെ മുഖം കാണിക്കാൻ സമയം കാത്ത് നിൽക്കുന്നു....ജനാധിപത്യ ഭരണത്തിലേക്ക് ഈ നാട് വഴിമാറണം, വഴി മാറ്റണം. സംശയമില്ല ഇതൊരു ലോകോത്തര രാജ്യമാണ്, സിമ്പ്ലി സൂപ്പര്‍... പക്ഷെ പാസ്പോർട്ട്, വിസ ഒക്കെ അവർ മേടിച്ചു വയ്ക്കും. അത് അനീതിയല്ലേ .. നമ്മുടെ ‘പാസ്പോര്‍ട്ട്’ നമ്മുടെ കയ്യിൽ വേണ്ടേ ?...’’ എന്നാണ് രാഹുല്‍ ഈശ്വര്‍ കുറിച്ചിരിക്കുന്നത്.
പ്രെഡിക്ഷൻ ലിസ്റ്റുകളില്‍ മറ്റു നിരവധി പ്രമുഖരുടെ പേരുകളും പ്രേക്ഷകര്‍ പങ്കുവയ്ക്കുന്നുണ്ട്. സിനിമാ-സീരിയല്‍ രംഗത്തുനിന്ന് ഭാമ, നീന കുറുപ്പ്, ‘തട്ടീം മുട്ടീം’ പരമ്പരയിലൂടെ സുപരിചിതനായ സിദ്ധാർത്ഥ് പ്രഭു, ടെലിവിഷൻ താരം ആദിത്യൻ ജയൻ, പ്രിയങ്ക അനൂപ്, മൃദുല വിജയ്, നിത പ്രോമി, മേഘ്ന വിൻസന്റ് എന്നിവരുടെ പേരുകളാണ് അവയില്‍ മുന്‍നിരയിലുള്ളത്. മിനിസ്‌ക്രീൻ അവതാരക ലക്ഷ്മി നക്ഷത്ര, ഫൈറ്റ് മാസ്റ്ററായ ഫൈറ്റർ കാളി, സംഗീത സംവിധായകനും ഗായകനുമായ ഇഷാൻ ദേവ് എന്നിവരും പട്ടികയിലുണ്ട്. സോഷ്യല്‍ മീഡിയ രംഗത്തുനിന്ന് വിക്കി തഗ്ഗ്, കണ്ടന്റ് ക്രിയേറ്റർ ജിയോ ജോസഫ് (എം4 ടെക്), നടി റിനി ആൻ ജോർജ്, ശ്രീരാജ് (കടല്‍കൊമ്പൻ), ഷെഫ് നളൻ, കടല്‍ മച്ചാന്റെ അമ്മ സന്ധ്യമ്മ, അവതാരകരായ റോഹൻ ലോന, കെന്ന ഷാല്‍ബിൻ, ശ്രീനാഥ് ജനാർദ്ദനൻ എന്നിവരുടെ പേരുകളും കേള്‍ക്കുന്നുണ്ട്. മുഹമ്മദ് ആസിഫ്, ബബിത ബാബി, ഗൗരി ഉണ്ണിമായ, ജസീല പർവീണ്‍, ജാസി ആഷി, ശ്രീലക്ഷ്മി അറയ്ക്കല്‍, ഗേ ദമ്പതികളായ സോനു-നികേഷ് എന്നിവരുടെ പേരുകളും പ്രെഡിക്ഷൻ ലിസ്റ്റിലുണ്ട്. ഇതില്‍ ആരൊക്കെയാണ് യഥാർത്ഥത്തില്‍ ബിഗ് ബോസ് വീടിന്റെ പടിവാതിലുകള്‍ കടക്കുമെന്നറിയാൻ കുറച്ചു മണിക്കൂറുകള്‍ മാത്രമാണ് ബാക്കിയുള്ളത്.
Comments