മലയാള സിനിമയുടെ പ്രിയതാരങ്ങളായ മമ്മൂട്ടി, മോഹൻലാൽ, ലാലു അലക്സ് എന്നിവർ ഒരുമിച്ചുള്ള പുതിയ ചിത്രം സോഷ്യൽ മീഡിയയിൽ വൈറലാകുന്നു. ദീർഘകാലത്തിന് ശേഷമാണ് മൂവരും ഒരുമിച്ച് ഒരു ഫ്രെയിമിൽ എത്തുന്നത് എന്ന പ്രത്യേകതയും ഈ ചിത്രത്തിനുണ്ട്.
ചിത്രത്തിനൊപ്പം ലാലു അലക്സ് കുറിച്ച വാക്കുകളും ഇപ്പോൾ ആരാധകർ ഏറ്റെടുത്തിരിക്കുകയാണ്.
‘ മമ്മൂട്ടി, മോഹൻലാൽ, ലാലു അലക്സ് — ഇങ്ങനെ ഞങ്ങൾ മൂന്ന് പേരും ഒന്നിച്ചുള്ള ഒരു ഫോട്ടോ കുറേ കാലങ്ങൾക്കു ശേഷമാണ് കിട്ടുന്നത്. ആ ചിത്രം കാണുമ്പോൾ പലതും പലതും ഓർമയിൽ വരുന്നു. പറഞ്ഞറിയിക്കാനാകാത്ത ഒരു വലിയ സന്തോഷത്തിന്റെ ഫീൽ…
ഞങ്ങൾ അങ്ങോട്ടും ഇങ്ങോട്ടും “എടാ… പോടാ…” എന്ന് വിളിക്കുന്ന അത്രയും ആത്മബന്ധമുള്ള സൗഹൃദമാണ് വർഷങ്ങളായി കാത്തുസൂക്ഷിക്കുന്നത്. ഒരുമിച്ച് നിരവധി സിനിമകളിൽ അഭിനയിച്ചു, ഒരുപാട് കഥാപാത്രങ്ങളും ഓർമകളും പങ്കുവച്ചു. ആ ബന്ധം ഇന്നും അതേ സ്നേഹത്തോടെ മുന്നോട്ട് പോകുന്നു.
മോഹൻലാലിനൊപ്പമുള്ള അതിമനോഹരം എന്ന സിനിമ വരെ എത്തിനിൽക്കുകയാണ് ഈ സൗഹൃദത്തിന്റെ യാത്ര.’, ലാലു അലക്സ് കുറിച്ചു.
മമ്മൂട്ടിക്കും മോഹൻലാലിനുമൊപ്പം ഒട്ടേറെ ചിത്രങ്ങളിൽ ഒ‍രുമിച്ചഭിനയിച്ച ലാലു അലക്സ് പങ്കുവെച്ച ചിത്രത്തിന് താഴെ കമന്‍റുകളുമായി ആരാധകരുമെത്തി. വർഷങ്ങൾ കഴിഞ്ഞിട്ടും മങ്ങാത്ത ഇവരുടെ ആത്മബന്ധത്തെ നെഞ്ചിലേറ്റുകയാണ് പ്രേക്ഷകർ.
Comments