സ്‌ട്രെസ്, തിരക്കുപിടിച്ച ജീവിതശൈലി, ആവശ്യത്തിന് ഉറക്കം ലഭിക്കാത്തത്, വീട്ടിലെ ഉത്തരവാദിത്തങ്ങള്‍ തുടങ്ങിയ സാധാരണ ജീവിതശൈലീ ഘടകങ്ങളാണ് തളര്‍ച്ചയ്ക്കും ക്ഷീണത്തിനും പ്രധാന കാരണമായി കരുതപ്പെടുന്നത്. എന്നാല്‍ ഈ ദൈനംദിന പ്രശ്‌നങ്ങള്‍ക്കപ്പുറം, വിട്ടുമാറാത്ത ക്ഷീണം ശരീരത്തിലെ പോഷകക്കുറവുമായി ബന്ധപ്പെട്ടിരിക്കാം. സ്ത്രീകളില്‍ ഇത്തരം പോഷകക്കുറവുകള്‍ വളരെ സാധാരണമാണെങ്കിലും, അവയുടെ ലക്ഷണങ്ങള്‍ പലപ്പോഴും സാധാരണ കാര്യമായി തള്ളിക്കളയുകയോ ശ്രദ്ധിക്കപ്പെടാതെ പോകുകയോ ചെയ്യാറുണ്ട്.
ഏറ്റവും സാധാരണമായ 3 പോഷകക്കുറവുകള്‍:
1. അയണ്‍ (ഇരുമ്പ്) കുറവ് - നിരവധി പ്രതിരോധ നടപടികള്‍ ഉണ്ടായിരുന്നിട്ടും അയണ്‍ കുറവ് ഇപ്പോഴും വ്യാപകമായി തുടരുന്നു. സമീപകാല ദേശീയ സര്‍വേകള്‍ പ്രകാരം ഗര്‍ഭധാരണ ശേഷിയുള്ള പ്രായത്തിലുള്ള സ്ത്രീകളില്‍ അനീമിയ (വിളര്‍ച്ച) 56 ശതമാനവും കടന്നിരിക്കുകയാണ്. കൗമാരക്കാരായ പെണ്‍കുട്ടികളിലാണ് വിളര്‍ച്ച കൂടുതല്‍ സങ്കീര്‍ണ്ണമാകുന്നത്: കൗമാരപ്രായത്തിലാണ് ശരീരത്തിന് അയണ്‍ ഏറ്റവും കൂടുതല്‍ ആവശ്യമുള്ളത് എന്ന കാര്യം ഓര്‍ക്കുമ്പോള്‍ ഇത് വളരെ വിഷമകരമാണ്. ആര്‍ത്തവം കാരണം ഓരോ മാസവും ശരീരത്തില്‍ നിന്ന് അയണ്‍ നഷ്ടപ്പെടുന്നു. വളര്‍ച്ചയ്ക്കും ഇത് അത്യാവശ്യമാണ്. എന്നാല്‍ പെണ്‍കുട്ടികളുടെ ആരോഗ്യത്തിന്റെ ഭാവി നിര്‍ണ്ണയിക്കുന്ന ഈ വര്‍ഷങ്ങളില്‍ ഭൂരിഭാഗം പേരുടെയും ശരീരത്തില്‍ അയണിന്റെ അളവ് വളരെ കുറവാണ്.
2. വിറ്റാമിന്‍ ഡി - അടുത്തതായി വിറ്റാമിന്‍ ഡി കുറവിനെക്കുറിച്ചാണ്. വര്‍ഷത്തില്‍ ഭൂരിഭാഗം സമയവും സുലഭമായി സൂര്യപ്രകാശം ലഭിക്കുന്ന ഇന്ത്യ പോലൊരു ഉഷ്ണമേഖലാ രാജ്യത്ത് ഇത് സംഭവിക്കുന്നത് അത്ഭുതകരമാണ്. ആധുനിക ജീവിതശൈലിയാണ് ഇതിന് പ്രധാന കാരണം. ആളുകള്‍ ഇന്ന് ജീവിക്കുന്ന രീതി നോക്കുമ്പോള്‍ ഇതിന്റെ കാരണം വ്യക്തമാകും - ഫ്‌ലൂറസെന്റ് ലൈറ്റുകള്‍ക്ക് കീഴില്‍ കെട്ടിടങ്ങള്‍ക്കുള്ളില്‍ കൂടുതല്‍ സമയം ചെലവഴിക്കുന്നു, വസ്ത്രധാരണം കൊണ്ടോ അല്ലാതെയോ ചര്‍മ്മം മൂടിയിരിക്കുന്നു, വിറ്റാമിന്‍ ഡി അടങ്ങിയതോ അത് ആഗിരണം ചെയ്യാന്‍ സഹായിക്കുന്നതോ ആയവ ഭക്ഷണക്രമത്തില്‍ കുറവാണ്. ഏറ്റവും കൂടുതല്‍ സൂര്യപ്രകാശം ലഭിക്കുന്ന ഒരു രാജ്യം സൂര്യപ്രകാശത്തെ പൂര്‍ണ്ണമായും അവഗണിക്കുന്ന സാഹചര്യമാണ് നിലവിലുള്ളത്.
3. വിറ്റാമിന്‍ ബി12 - ഇന്ത്യയില്‍ വ്യാപകമായി കാണപ്പെടുന്നതും എന്നാല്‍ പലപ്പോഴും ശ്രദ്ധിക്കപ്പെടാതെ പോകുന്നതുമായ മറ്റൊന്നാണ് വിറ്റാമിന്‍ ബി12 കുറവ്. ഇന്ത്യക്കാരില്‍ പകുതിയോളം പേര്‍ക്കും ബി12 ന്റെ കുറവുണ്ടെന്നാണ് കണക്കാക്കുന്നത്. ഇതിന്റെ കാരണം പ്രധാനമായും ഭക്ഷണരീതിയാണ്. ബി12 പ്രധാനമായും മൃഗങ്ങളില്‍ നിന്നുള്ള ഭക്ഷണങ്ങളിലാണ് കാണപ്പെടുന്നത്. എന്നാല്‍ ഇന്ത്യയിലെ നല്ലൊരു ശതമാനം ആളുകളും സസ്യാഹാരികളാണ്, സാധാരണ ഇന്ത്യന്‍ ഭക്ഷണക്രമത്തില്‍ ഇത് നികത്താനുള്ള ഫോര്‍ട്ടിഫൈഡ് ഭക്ഷണങ്ങള്‍ വളരെ കുറവുമാണ്. സസ്യാഹാരം കഴിക്കുന്നവര്‍ക്ക്, പ്രത്യേകിച്ച് ബി12 ചേര്‍ത്ത (fortified) ഭക്ഷണങ്ങള്‍ കഴിക്കാത്തവര്‍ക്ക്, വിറ്റാമിന്‍ ബി12 ലഭിക്കാതെ പോകാം. നിങ്ങള്‍ക്ക് തളര്‍ച്ച തോന്നുമ്പോള്‍ അതിന് കാരണം നിങ്ങളുടെ ജോലിത്തിരക്കാണെന്ന് കരുതുന്നു. മുടി കൊഴിയുമ്പോള്‍ അതിന് കാരണം വെള്ളമോ ഷാംപൂവോ ആണെന്ന് കരുതുന്നു. മാനസികമായി തളര്‍ച്ചയോ ഓര്‍മ്മക്കുറവോ തോന്നുമ്പോള്‍ ജീവിതത്തിലെ മറ്റ് ബുദ്ധിമുട്ടുകളെ പഴിചാരുന്നു.
Comments