പാലക്കാട്: ഡല്‍ഹിയിലേക്കുള്ള യാത്ര തീരുമാനിച്ചിരുന്നെങ്കിലും ശാരീരികബുദ്ധിമുട്ടു കാരണം മാറ്റി വെച്ചെന്ന് ചിറയിന്‍കീഴ് എംഎല്‍എ രമ്യാ ഹരിദാസ്. കെപിസിസി അന്വേഷണ സമിതിയോട് കള്ളം പറഞ്ഞിട്ടില്ലെന്നും ഡിസിസി പ്രസിഡന്റിന്റെ മകളുടെ കല്യാണത്തില്‍ പങ്കെടുക്കാനാണ് പാലക്കാട് എത്തിയതെന്നും പ്രതികരിച്ചു. ഡല്‍ഹിയിലേക്ക് പോകുമെന്ന് പറഞ്ഞിരുന്നെങ്കിലും പോകാതിരുന്നത് ശാരീരിക ബുദ്ധിമുട്ടു കാരണമാണെന്നും പറഞ്ഞു.
പാലക്കാട്ടെ ഡിസിസി പ്രസിഡന്റിന്റെ മകളുടെ വിവാഹം ആയതിനാലാണ് പാലക്കാട് എത്തിയത്. ചിറയിന്‍ കീഴിലെ പ്രശ്‌നം ഏതൊരു വീട്ടിലും സംഘടനയിലും ഉണ്ടാകുന്ന രീതിയിലുള്ള പറഞ്ഞു തീര്‍ക്കാവുന്ന കാര്യമേയുള്ളെന്നും പറഞ്ഞു. ചിറയിന്‍ കീഴില്‍ താന്‍ ഇന്നും നാളെയും എല്ലാക്കാലവും ഉണ്ടാകുമെന്നും പറഞ്ഞു. ചിറയിന്‍കീഴ് കയ്യാങ്കളി വിഷയത്തില്‍ അന്വേഷണ കമ്മീഷന് മുന്നില്‍ എത്തേണ്ടിയിരുന്ന രമ്യാ ഹരിദാസ് ഡല്‍ഹിയിലേക്ക് പോകുന്നു എന്ന് പറഞ്ഞാണ് പാലക്കാട് എത്തിയത്. ഡല്‍ഹിയിലേക്ക് ടിക്കറ്റ് എടുത്തിരുന്നെങ്കിലും രമ്യാഹരിദാസ് പാലക്കാട് എത്തുകയായിരുന്നു. രമ്യാഹരിദാസിനെതിരേയുള്ള നടപടി താക്കീതില്‍ ഒതുക്കിയേക്കും. അച്ചടക്ക നടപടി ഉണ്ടായേക്കില്ലെന്നാണ് സൂചനകള്‍.
നേരത്തേ രമ്യയ്ക്ക് വിഷയത്തില്‍ ഗുരുതരവീഴ്ച ഉണ്ടായെന്ന് കെപിസിസി കണ്ടെത്തിയിരുന്നു. മുതിര്‍ന്ന അംഗങ്ങള്‍ ഉള്‍പ്പെട്ട അന്വേഷണ കമ്മീഷനെ ഈ വിഷയത്തില്‍ കെപിസിസി ചുമതലപ്പെടുത്തിയെങ്കിലും അന്വേഷണക്കമ്മീഷന് മുന്നിലേക്ക് എത്താതെ രമ്യ പോകുകയായിരുന്നു. പാലക്കാട് ഡിസിസി പ്രസിഡന്റ് എ തങ്കപ്പന്റെ വീട്ടില്‍ വെച്ച് രമ്യാഹരിദാസ് കെ.സി. വേണുഗോപാലുമായി കൂടിക്കാഴ്ച നടത്തിയതായി റിപ്പോര്‍ട്ടുകള്‍ പുറത്തുവരികയും ചെയ്തു.
Comments