അഗളി: അട്ടപ്പാടിയിലെ ഇരട്ടകൊലപാതകത്തില്‍ പ്രതിക്കായി അന്വേഷണം നടത്തി പോലീസ്. പ്രതിക്കായി അന്വേഷണം ബംഗാളിലേക്ക് വ്യാപിപ്പിച്ചിരിക്കുകയാണ് പോലീസ്. കൊലപാതകത്തിന് ശേഷം പ്രതി പശ്ചിമബംഗാളിലേക്ക് രക്ഷപ്പെട്ടിരിക്കാമെന്നാണ് പോലീസ് കരുതുന്നത്. ഇയാളെ പിടിക്കാനായി അഗളി എസ്‌ഐ യുടെ നേതൃത്വത്തില്‍ മൂന്നംഗ സംഘത്തെ നിയോഗിച്ചിരിക്കുകയാണ്.
കേസിലെ കുടുതല്‍ വിവരങ്ങള്‍ പുറത്തുവരേണ്ടതുണ്ട്. അതിന് ഇയാളെ കണ്ടെത്തി ചോദ്യം ചെയ്താല്‍ മാത്രമേ വിവരം അറിയാനാകൂ. ഇന്നലെ മൃതദേഹം തൃശൂരില്‍ പോസ്റ്റുമാര്‍ട്ടം നടത്തിയിരുന്നതില്‍ നിന്നും മൃഗീയമായിട്ടാണ് കൊലപാതകം നടന്നതെന്ന വിവരം പോലീസിന് കിട്ടിയിട്ടുണ്ട്. കഴുത്തറുത്ത് യുവതിയെയും കുഞ്ഞിനെയും കൊലപ്പെടുത്തുന്നതിന് മുമ്പ് പ്രതി ഇരുവരേയും ക്രൂര മര്‍ദ്ദനത്തിന് ഇരയാക്കിയിരുന്നു. യുവതിയുടെ തലയില്‍ ആഴത്തില്‍ മുറിവ് വരുന്ന വെട്ട് കിട്ടിയിരുന്നു. കുഞ്ഞിനെയും ക്രൂരമായി ഉപദ്രവിച്ചിരുന്നു.
കൊലപാതകം നടന്നത് ഭവാനിപുഴയ്ക്ക് സമീപത്തുവെച്ചായിരിക്കാം എന്നും പോലീസ് സംശയിക്കുന്നു. അന്യസംസ്ഥാന തൊഴിലാളി താമസിച്ചിരുന്ന തോട്ടത്തിന് സമീപത്തെ ഷെഡ്ഡില്‍ പോലീസ് പരിശോധന നടത്തിയെങ്കിലും അവിടെവെച്ച് കൃത്യം നടത്തിയതിന്റെ സൂചനകള്‍ ഇല്ലായിരുന്നു. അതുകൊണ്ടു തന്നെ പുഴയ്ക്ക് സമീപത്ത് വെച്ചായിരിക്കാം ഇയാള്‍ ഭാര്യയേയും മകളെയും കൊലചെയ്തതെന്നാണ് പോലീസ് കരുതുന്നത്. പ്രതിക്ക് ഒറ്റയ്ക്ക് ഈ രീതിയില്‍ കൊലപാതം നടത്താന്‍ കഴിയില്ലെന്നും പുറത്തു നിന്നും സഹായം കിട്ടിയിരിക്കാമെന്നും പോലീസ് സംശയിക്കുന്നത്. ഇക്കാര്യമെല്ലാം അറിയണമെങ്കില്‍ ചോദ്യം ചെയ്യല്‍ നടത്തേണ്ടതുണ്ട്്.
ഭാര്യയോടുള്ള സംശയമായിരുന്നു കൊലപാതക കാരണമെന്നാണ് കരുതുന്നത്. ഇരുവരും കേരളത്തില്‍ എത്തിയിട്ട് 20 ദിവസമേ ആയിട്ടുണ്ടായിരുന്നുള്ളു. ബംഗാളില്‍ വെച്ചും ഇരുവരും ഇക്കാര്യത്തില്‍ വഴക്ക് ഉണ്ടായിട്ടുള്ളതായിട്ടാണ് കരുതുന്നത്.
Comments