തിരുവനന്തപുരം: സ്ത്രീവിദ്വേഷ പരാമര്‍ശത്തില്‍ ഇടതുപക്ഷത്തിന് മറുപടിയുമായി കാന്തപുരം വിഭാഗം. സിറാജ് പത്രത്തിലെ ലേഖനത്തിലൂടെയാണ് മറുപടി. തെരഞ്ഞെടുപ്പില്‍ തോറ്റതിന് സമുദായത്തോട് ദേഷ്യം തീര്‍ക്കരുതെന്നും സിപിഎഎമ്മിന്റെ തെരഞ്ഞെടുപ്പിലെ തോല്‍വിക്ക് കാരണം അണികള്‍ തോല്‍പ്പിച്ചതാണെന്നും തിരുത്താന്‍ തയ്യാറായില്ലെങ്കില്‍ ബംഗാളിലെ അവസ്ഥ പാര്‍ട്ടിക്ക് കേരളത്തില്‍ ഉണ്ടാകുമെന്നും പറയുന്നു. ഇവിടെ ആര്‍ക്കാണ് പ്രശ്‌നം? എന്ന തലക്കെട്ടില്‍ എഴുതിയ ലേഖനത്തിലാണ് വിമര്‍ശനം.
സഖാഫി എളമരത്തിന്റേതാണ് ലേഖനം. കാന്തപുരത്തെ വിമര്‍ശിക്കുന്നതിന് മുമ്പായി അദ്ദേഹത്തിന്റെ പ്രസംഗം പരിശോധിച്ചിട്ട് വേണമായിരുന്നു അങ്ങിനെ ചെയ്യാന്‍ എന്നും പറയുന്നു. ഇടതുപക്ഷം തോറ്റതല്ലെന്നും അണികളും നേതാക്കളും ചേര്‍ന്ന് തോല്‍പ്പിച്ചതാണെന്നും ലേഖനത്തില്‍ പറയുന്നു. ഭരണമോശം കൊണ്ടാണ് പരാജയപ്പെട്ടത് എന്ന് അഭിപ്രായമില്ല. മറിച്ച് പാര്‍ട്ടിക്കുള്ളിലെ അമര്‍ഷം തന്നെയായിരുന്നു പ്രധാനകാരണമെന്ന് തിരഞ്ഞെടുപ്പ് ഫലം ബോധ്യപ്പെടുത്തുന്നുണ്ട്. ഒന്നാം പിണറായി സര്‍ക്കാര്‍ മികച്ച ഭരണം കാഴ്ചവെച്ചു. ഉജ്ജ്വലമായി വീണ്ടും തിരിച്ചുവന്നപ്പോള്‍ നന്മ ഉദ്ദേശിച്ച് കൊണ്ടാകാം മന്ത്രി സഭയില്‍ ഒരു തലമുറമാറ്റം കൊണ്ടു വന്നു. എന്നാല്‍ മുഖ്യമന്ത്രി മാത്രം മാറിയില്ല. ഇത് മികച്ച ഭരണം കാഴ്ചവെച്ച പല മുതിര്‍ന്ന നേതാക്കള്‍ക്കിടയിലും കടുത്ത അമര്‍ഷവും പ്രതിഷേധവും ഉണ്ടാക്കി.
പാര്‍ട്ടി രീതിയനുസരിച്ച് പരസ്യമായി ആരും പ്രതികരിച്ചില്ലെങ്കിലും കടുത്ത മനോവേദന കടിച്ചിറക്കി അവര്‍ പാര്‍ട്ടിക്കൊപ്പം നിന്നു. ആലപ്പുഴയില്‍ സുധാകരനെ പോലുള്ളവര്‍ മെമ്പര്‍ഷിപ്പ് പുതുക്കാതെ പ്രതിഷേധമറിയിച്ചു. മുഖ്യമന്ത്രി കൂടി മാറിയിരുന്നെങ്കില്‍ ഇത് ഇത്ര രൂക്ഷമാകുമായിരുന്നില്ല. വീണ്ടും തിരഞ്ഞെടുപ്പ് വന്നപ്പോള്‍ മുഖ്യമന്ത്രി പിണറായി വിജയന്‍ പിന്നെയും മത്സരരംഗത്ത് ഉണ്ടാകുകയും പാര്‍ട്ടി നേതൃത്വത്തിലുള്ള പലരുടെയും ഭാര്യമാരും ബന്ധുക്കളും സീറ്റ് ഉറപ്പിക്കുകയും ചെയ്തതോടെ കണ്ണൂര്‍ ജില്ലയിലടക്കം പാര്‍ട്ടിക്കുള്ളില്‍ പൊട്ടിത്തെറിയുണ്ടായി. ചിലര്‍ യു ഡി എഫിനൊപ്പം ചേര്‍ന്നു മത്സരിക്കാനും തയ്യാറായി. തിരഞ്ഞെടുപ്പ് പ്രചരണരീതി കൂടുതല്‍ പ്രകോപനമുണ്ടാക്കി.
കേരളം നിറയെ ഒരു വ്യക്തിയുടെ മാത്രം ഭീമന്‍ ബോഡുകള്‍ നിറഞ്ഞു. ഒരു മുന്നണിയായി മത്സരിക്കുമ്പോള്‍ മുന്നണി നേതാക്കളുടെ ഫോട്ടോയെങ്കിലും വെക്കേണ്ടതായിരുന്നു എന്ന സംസാരം അണികളും നേതാക്കളും തമ്മില്‍ പറഞ്ഞു. പരസ്യ പ്രതികരണത്തിന് മുതിര്‍ന്നാല്‍ പുറത്താവും. രാജാവും പ്രജയും എന്ന രീതി ജനാധിപത്യത്തിന് ചേര്‍ന്നതല്ലെന്ന് പല പ്രാദേശിക നേതാക്കള്‍ പങ്കുവെച്ചത് ഓര്‍ക്കുന്നു. അവര്‍ പാര്‍ട്ടിയെ രക്ഷിക്കാന്‍ വോട്ടിംഗ് യന്ത്രങ്ങള്‍ ഉപയോഗിച്ചു. പിന്നെ പത്ത് കൊല്ലമായതല്ലേ, ഒന്നു മാറ്റി നോക്കാമെന്ന് നിഷ്പക്ഷ വോട്ടര്‍മാരും ചിന്തിച്ചു കാണും.
ചുരുക്കത്തില്‍ പാര്‍ട്ടി തോറ്റതല്ല. ഇടതു പക്ഷം തകര്‍ന്നതുമല്ല. അണികള്‍ നല്‍കിയ ഒരു ശിക്ഷകൂടിയാണ് ഈ തോല്‍വി. ഇതിന്റെ അരിശം പാര്‍ട്ടി പ്രവര്‍ത്തകരോടും സമുദായ സംഘടനകളോടും തീര്‍ക്കുന്നതിന് പകരം രോഗത്തിന് ചികിത്സിക്കുന്നതാണ് നല്ലത്. അല്ലെങ്കില്‍ ബംഗാളിലെ അവസ്ഥവരും. അത് ആരും ആഗ്രഹിക്കുന്നില്ലെന്നും ലേഖനത്തില്‍ പറയുന്നു.
ഇത് സ്വന്തം പാര്‍ട്ടിയിലെ തന്നെ വോട്ട് നഷ്ടപ്പെടാന്‍ കാരണമായി. തെരഞ്ഞെടുപ്പില്‍ അണികളടേയും പാര്‍ട്ടിപ്രവര്‍ത്തകരുടേയും കോപം നേരിടേണ്ടി വന്നു. രാജാവ് പ്രജ എന്ന നിലയിലുള്ള പ്രവര്‍ത്തനത്തിന്റെ അമര്‍ഷം അണികള്‍ തെരഞ്ഞെടുപ്പില്‍ തീര്‍ത്തു. രാജാവ് പ്രജ എന്ന രീതി ജനാധിപത്യമല്ലെന്നും ലേഖനത്തില്‍ പറയുന്നു. ഇവിടുത്തെ ന്യുനപക്ഷങ്ങള്‍ക്ക് ഇടതിനോട് ഒരു എതിര്‍പ്പുമില്ല. എന്നിരുന്നാലും ഇത്തരരവത്തിലുള്ള പ്രതികരണവുമായി മൂമ്പോട്ട് പോയാല്‍ പാര്‍ട്ടി തന്നെ ഇല്ലാതാകുന്ന അവസ്ഥയിലേക്ക് നയിക്കുമെന്നും വിമര്‍ശിക്കുന്നു.
Comments