സിനിമാ മേഖലയിലെ താരങ്ങൾക്ക് പണവും പ്രശസ്തിയും അധികാരവും നൽകുന്നത് യുവാക്കളാണെന്നും, അങ്ങനെയുള്ളവർ പ്രതിസന്ധികൾ നേരിടുമ്പോൾ താരങ്ങൾ നിശബ്ദത പാലിക്കുന്നത് ശരിയല്ലെന്നും നടി പാർവതി തിരുവോത്ത്. സിജെപി പ്രതിഷേധവുമായി ബന്ധപ്പെട്ട താരങ്ങളുടെ നിശബ്ദതയെക്കുറിച്ച് സംസാരിക്കുകയായിരുന്നു പാര്‍വതി. ഗലാട്ട പ്ലസിന് നൽകിയ അഭിമുഖത്തിലാണ് പ്രതികരണം.
സ്വന്തം ജീവിതത്തിലെ വിലപ്പെട്ട സമയവും പണവും ചെലവാക്കി സിനിമകളെ വിജയിപ്പിക്കുന്നത് സാധാരണക്കാരായ ചെറുപ്പക്കാരാണ്. പട്ടിണി കിടന്നും വിദ്യാഭ്യാസം പൂർത്തിയാക്കാൻ ബുദ്ധിമുട്ടുമ്പോഴും അവർ താരങ്ങൾക്ക് വേണ്ടി പാലഭിഷേകം നടത്തുകയും സിനിമകൾ ആഘോഷിക്കുകയും ചെയ്യുന്നു. എന്നാൽ അതേ യുവാക്കൾ രാജ്യത്ത് ലാത്തിച്ചാർജിനും ആക്രമണങ്ങൾക്കും ഇരയാകുമ്പോൾ, ജനപ്രിയരായ അഭിനേതാക്കളും സംവിധായകരും പൂർണ്ണമായും നിശബ്ദരാകുന്നത് വേദനാജനകമാണ്. അത് വണ്‍ സൈഡ് റിലേഷന്‍ഷിപ്പാണ്, അന്യായമാണെന്നും പാർവതി വ്യക്തമാക്കി.
അഭിനേതാക്കൾക്ക് രാഷ്ട്രീയമില്ലെന്ന് പറഞ്ഞ് ഒഴിഞ്ഞ് മാറാവുന്ന കാലം കഴിഞ്ഞുപോയി. ഭയവും എല്ലാവരുടെയും പ്രീതി പിടിച്ചുപറ്റണമെന്ന ആഗ്രഹവുമാണ് പലരെയും പ്രതികരിക്കുന്നതിൽ നിന്ന് പിന്നോട്ട് വലിക്കുന്നത്. അടുത്ത സിനിമ ഇറങ്ങുമ്പോൾ പഴയ അതേ ആരാധനയും പിന്തുണയും ഇവർ പ്രതീക്ഷിക്കുന്നു. എന്നാലത് അന്യായമാണ്.
യുവാക്കളുടെ ചെലവിൽ പണവും അധികാരവും നേടിയവർ, അവർ ആക്രമിക്കപ്പെടുമ്പോഴും നിശബ്ദരാക്കപ്പെടുമ്പോഴും മിണ്ടാതിരിക്കുന്നത് തെറ്റാണ്. സിനിമകൾ ആളുകൾ കാണരുതെന്ന് കരുതിയല്ല താൻ തുറന്നു സംസാരിക്കുന്നത്. രാത്രി സമാധാനത്തോടെ ഉറങ്ങാൻ വേണ്ടിയാണ് പ്രതികരിക്കുന്നതെന്നും പാർവതി കൂട്ടിച്ചേർത്തു.
Comments