തിരുവനന്തപുരം: കോൺഗ്രസ് പാർട്ടി സസ്പെൻഡ് ചെയ്ത പാളയം പ്രദീപിനെ പേഴ്സണല് സ്റ്റാഫില്‍ ഉള്‍പ്പെടുത്തുന്നതിനായി രമ്യ ഹരിദാസ് നിയമസഭാ സെക്രട്ടറിയുടെ ഓഫീസില്‍ കത്ത് നല്‍കിയതിൽ അതൃപ്തി പരസ്യമാക്കി സ്പീക്കർ തിരുവഞ്ചൂർ രാധാകൃഷ്ണൻ. ഇതോടെ പാളയം പ്രദീപ് വിഷയത്തിൽ രമ്യ ഹരിദാസ് എം‌എൽഎയ്ക്ക് പാർട്ടിയുടെ ഒരു പിന്തുണയും ലഭിക്കില്ല എന്ന് വ്യക്തമായിരിക്കുകയാണ്.
തനിക്കും തന്റെ ഓഫീസിനും രമ്യ ഹരിദാസ് കത്തുനൽകിയിട്ടില്ല. നിയമസഭയെ വിവാദങ്ങളിലേക്ക് വലിച്ചിഴയ്ക്കരുതെന്ന് രമ്യയോട് പറഞ്ഞിട്ടുണ്ടെന്ന് തിരുവഞ്ചൂർ വ്യക്തമാക്കി. സ്പീക്കറുടെ ഓഫീസിനെ സംശയത്തിന്റെ നിഴലിൽ കൊണ്ടുവരുന്നത് അംഗീകരിക്കാൻ കഴിയില്ല. രമ്യ ഹരിദാസ് വിളിച്ചപ്പോൾ താൻ നിലപാട് വ്യക്തമാക്കിയിട്ടുണ്ട് എന്നും സ്പീക്കർ വ്യക്തമാക്കി.
അതേസമയം കെപിസിസി പ്രസിഡന്റ് സണ്ണി ജോസഫ് രമ്യ കത്ത് നൽകിയ നടപടിയെ വിമർശിച്ചു. രമ്യ ഹരിദാസ് ഏതു ദിവസമാണ് കത്ത് നൽകിയതെന്ന് പരിശോധിക്കുമെന്നും സണ്ണിജോസഫ് പറഞ്ഞു. പാളയം പ്രദീപിനെ മുന്‍കാല പ്രാബല്യത്തോടെ പേഴ്സണല് സ്റ്റാഫില്‍ നിയമിക്കണമെന്ന് ആവശ്യപ്പെട്ട് രമ്യാഹരിദാസ് നിയമസഭാ സെക്രട്ടറിയേറ്റ് ഓഫീസിന് കത്ത് നല്‍കിയിരുന്നു. ചിറയിന്‍കീഴില്‍ തമ്മില്‍ തല്ല് നടന്ന ദിവസത്തെ തീയതിയില്‍ തയ്യാറാക്കിയ കത്ത് ഇന്നലെയാണ് നൽകിയതെന്നാണ് റിപ്പോർട്ടുകൾ.
എന്നാൽ താൻ എംഎല്‍എയുടെ സ്റ്റാഫാണെന്നും കൃത്യമായി ശമ്പളം ലഭിക്കുന്നുണ്ടെന്നും പാളയം പ്രദീപ് പാലക്കാട്ട് പ്രതികരിച്ചു. ശമ്പളരേഖകള്‍ ബാങ്കില്‍നിന്ന് ലഭിക്കാന്‍ കാത്തിരിക്കുകയാണെന്നുമാണ് പാളയം പ്രദീപിന്റെ പ്രതികരണം.
Comments