ഭര്‍ത്താവ് ശിലാദിത്യ മുഖോപാധ്യായയെക്കുറിച്ച് ഗായിക ശ്രേയ ഘോഷാല്‍ പറഞ്ഞ വാക്കുകളാണ് ഇപ്പോള്‍ ശ്രദ്ധനേടുന്നത്. തനിക്ക് ലഭിച്ച ഭാഗ്യമാണ് ശിലാദിത്യ എന്നാണ് ഗായിക പറയുന്നത്. ദ് മെയിന്‍ ഫെമിനിസ്റ്റ് എന്ന യൂട്യൂബ് ചാനലിന് നല്‍കിയ അഭിമുഖത്തിലാണ് ശ്രേയ ഘോഷാല്‍ കുടുംബത്തെക്കുറിച്ച് മനസ്സുതുറന്നത്.
പരസ്പരം മനസ്സിലാക്കിയുളള ജീവിതമാണ് തങ്ങളുടേതെന്ന് ശ്രേയ പറഞ്ഞു. പരസ്പരം ഈഗോ വെച്ചുപുലര്‍ത്താതെ വീട്ടുജോലികളടക്കം ഒന്നിച്ചു ചെയ്താണ് മുന്നോട്ട് പോകുന്നതെന്നും മകന് ദേവ്യാനും ഇതൊക്കെ കണ്ടുപഠിച്ചാണ് വളരുന്നതെന്നും ശ്രേയ വ്യക്തമാക്കി.
‘എനിക്ക് ഭാഗ്യമുളളതുകൊണ്ട് എനിക്ക് അദ്ദേഹത്തെ ലഭിച്ചു. അദ്ദേഹം മുഴുവന്‍ വീട്ടുകാര്യങ്ങളും നോക്കും. അദ്ദേഹം സ്വന്തം കാര്യങ്ങള്‍ സ്വയം ചെയ്ത് ജീവിക്കാനാണ് താത്പര്യപ്പെടുന്നത്. സ്വന്തം പാത്രങ്ങള്‍ കഴുകും , അടുക്കള വൃത്തിയാക്കും. ഞാന്‍ അത് ചെയ്യുന്നതുകണ്ടാല്‍ അസ്വസ്ഥനാകും.
ഞങ്ങള്‍ രണ്ടുപേരും ദിവസം മുഴുവന്‍ കഠിനാധ്വാനം ചെയ്തിട്ടാണ് വീട്ടിലേക്ക് വരുന്നത്. അതുകൊണ്ടുതന്നെ ഞങ്ങള്‍ രണ്ടുപേരും എപ്പോഴും ഒരുമിച്ച് ഞങ്ങളുടെ വീട്ടുജോലികള്‍ ചെയ്യും. ഞാന്‍ ചിലപ്പോള്‍ മാസങ്ങളോളം വീട്ടില്‍ ഉണ്ടാകാറില്ല. നീ ഇവിടെ ഇല്ലായിരുന്നല്ലേ എന്ന് അദ്ദേഹം ഒരിക്കല്‍പോലും പറഞ്ഞിട്ടില്ല. ഞങ്ങള്‍ ഡേറ്റിങ്ങിലായതുകൊണ്ട് പരസ്പരം നന്നായി അറിയാം. ഞാന്‍ അദ്ദേഹത്തിനായി എപ്പോഴുമുണ്ടാകുമെന്ന് അദ്ദേഹത്തിന് അറിയാം. അദ്ദേഹത്തിന് ഈഗോ പ്രശ്‌നങ്ങളില്ല. എനിക്കും അങ്ങനെ തന്നെ. ഞങ്ങളുടെ കുട്ടിയാണ് ഞങ്ങളുടെ പ്രപഞ്ചത്തിന്റെ കേന്ദ്രം.
മകന് ഞങ്ങളായിട്ട് ഒന്നും പഠിപ്പിച്ച് കൊടുക്കാറില്ല. ഞങ്ങള്‍ രണ്ടുപേരും ഉദാഹരണങ്ങളായി നില്‍ക്കുകയാണ്. അവന്‍ അത് അനുകരിക്കുകയാണ് ചെയ്യുന്നത്. ഞങ്ങള്‍ എങ്ങനെ പരസ്പരം പെരുമാറുന്നു, ഞങ്ങള്‍ എങ്ങനെ മറ്റുളളവരോട് പെരുമാറുന്നു എന്നൊക്കെ അവന്‍ കണ്ടുപഠിക്കും’. ശ്രേയ ഘോഷാലിന്റെ വാക്കുകള്‍.
പത്ത് വര്‍ഷത്തെ ഡേറ്റിങ്ങിനൊടുവില്‍ 2015 ഫെബ്രുവരി 5 നാണ് ശ്രേയയും ശിലാദിത്യയും വിവാഹിതരായത്. 2021 ല്‍ ഇരുവര്‍ക്കും ആണ്‍കുട്ടി ജനിച്ചു. ദേവ്യാന്‍ എന്നാണ് മകന്റെ പേര്.
Comments