മലയാളിമനസ്സില്‍ ബാലാമണിയായി ഇടം പിടിച്ച താരമാണ് നവ്യ നായര്‍. ‘ഇഷ്ടം’ എന്ന ദിലീപ് ചിത്രത്തിലൂടെയാണ് ബിഗ് സ്ക്രീനില്‍ അരങ്ങേറ്റം കുറിച്ചതെങ്കിലും പ്രേക്ഷകര്‍ നവ്യയെ ഹൃദയത്തോ്ട ചേര്‍ത്തത് ‘നന്ദന’ത്തിലൂടെയാണ്. ആ സിനിമയ്ക്ക് ശേഷം മലയാളത്തിലും തമിഴിലുമടക്കം നിരവധി മികച്ച വേഷങ്ങള്‍ ചെയ്ത് നവ്യ തിളങ്ങി. സ്വന്തം വീട്ടിലെ കുട്ടി എന്നൊരു ഇമേജാണ് നവ്യ പ്രേക്ഷകരുടെ മനസ്സില്‍ നേടിയെടുത്തത്. കരിയറിന്റെ പീക്ക് ടൈമില്‍ വിവാഹിതയായ താരം പിന്നീട് കുടുംബിനിയായി ഒതുങ്ങി.
വലിയൊരു ഇടവേളയ്ക്ക് ശേഷം പ്രേക്ഷകരുടെ മുന്നിലേക്ക് തിരിച്ചെത്തിയ നവ്യ സിനിമയേക്കാളേറെ തിളങ്ങിയത് നൃത്തവേദികളിലൂടെയാണ്. മാതംഗി എന്ന നൃത്തവിദ്യാലയവും അതിന്റെ വേദികളുമായി തിരക്കിലാണ് നവ്യ. സോഷ്യല്‍ മീഡിയ പ്ലാറ്റ്ഫോമുകളില്‍ നവ്യയുടെ നൃത്തവീഡിയോകള്‍ തരംഗമായി മാറാറുണ്ട്. ഇടയ്ക്ക് വളരെ സെലക്ടീവായി മാത്രം സിനിമകള്‍ ചെയ്തും നവ്യ ബിഗ്സ്‍ക്രീനില്‍ തിളങ്ങാറുണ്ട്. എല്ലാ വിശേഷങ്ങളും സന്തോഷങ്ങളും സോഷ്യല്‍ മീഡിയ വഴി പങ്കിട്ടും നവ്യ പ്രേക്ഷകമനസ്സില്‍ ലൈവായി നില്‍ക്കുന്നുണ്ട്.
ഇപ്പോഴിതാ തന്നെ അനുഗ്രഹിച്ചതിന് ദൈവത്തിന് നന്ദി പറഞ്ഞു കൊണ്ടുള്ള കുറിപ്പ് പങ്കിടുകയാണ് നവ്യ നായര്‍. സന്തോഷത്തിനും വേദനകള്‍ക്കും പാഠങ്ങള്‍ക്കും നന്ദിയെന്നും അതാണ് തന്നെ ഈ നിലയില്‍ എത്തിച്ചതെന്നുമാണ് നവ്യ കുറിച്ചിരിക്കുന്നത്.
‘‘ദൈവമേ, എന്നെ അനുഗ്രഹിച്ച നന്മയ്ക്കും എന്നെ രൂപപ്പെടുത്തിയ തിന്മയ്ക്കും നന്ദി. എല്ലാ സന്തോഷത്തിനും, എല്ലാ വേദനയ്ക്കും, എല്ലാ പാഠങ്ങൾക്കും... അതെല്ലാം തന്നെയാണ് എന്നെ ഇന്നത്തെ നിലയിൽ എത്തിച്ചത്...ഇതിനെല്ലാം ഞാൻ നന്ദിയുള്ളവളാണ്....’’ എന്നാണ് നവ്യ കുറിച്ചിരിക്കുന്നത്. ഫ്ലൈറ്റ് യാത്രയ്ക്കിടെ പകര്‍ത്തിയ ചിത്രങ്ങള്‍ക്കൊപ്പമാണ് നവ്യയുടെ കുറിപ്പ്.
Comments