വന്ദേമാതരം പൂർണമായി ആലപിച്ചതിനെതിരെ കെസി; അടിച്ചേൽപ്പിക്കൽ വേണ്ടെന്ന് എൻസി; ആർഎസ്എസിനു വഴങ്ങരുതെന്ന് കോൺഗ്രസ്

ശ്രീനഗർ: ജമ്മു കശ്മീരിൽ നടന്ന ഒരു ചടങ്ങിൽ ദേശീയഗീതമായ 'വന്ദേമാതരം' മുഴുവനായി ആലപിച്ചതുമായി ബന്ധപ്പെട്ട് കോൺഗ്രസും സഖ്യകക്ഷിയായ നാഷണൽ കോൺഫറൻസും (എൻസി) തമ്മിലുണ്ടായ അഭിപ്രായവ്യത്യാസം വലിയ രാഷ്ട്രീയ വിവാദമാവുന്നു. മുഖ്യമന്ത്രി ഒമർ അബ്ദുല്ലയുടെയും നാഷണൽ കോൺഗ്രസ് പ്രസിഡന്റ് ഫാറൂഖ് അബ്ദുല്ലയുടെയും സാന്നിധ്യത്തിൽ ശ്രീനഗറിൽ നടന്ന അന്താരാഷ്ട്ര ചലച്ചിത്രമേളയിലാണ് ഈ സംഭവം നടന്നത്.

ശ്രീനഗറിലെ ചടങ്ങിൽ വന്ദേമാതരത്തിന്റെ പൂർണ്ണരൂപം ആലപിച്ചതിനെതിരെ കോൺഗ്രസ് ജനറൽ സെക്രട്ടറി കെ.സി വേണുഗോപാൽ രംഗത്തെത്തിയിരുന്നു. സ്വാതന്ത്ര്യസമര സേനാനികൾ വിഭാവനം ചെയ്ത ബഹുസ്വര സംസ്കാരവുമായി പൂർണ്ണരൂപം യോജിച്ചുപോകില്ലെന്നും, പാർട്ടി സ്വീകരിച്ച രണ്ട് ചരണങ്ങൾ മാത്രം പാടുന്ന രീതിയിൽ സഖ്യകക്ഷികൾ ഒപ്പം നിൽക്കണമെന്നും അദ്ദേഹം ആവശ്യപ്പെട്ടു.

എന്നാൽ, സഖ്യകക്ഷിയായ കോൺഗ്രസിന് തങ്ങളുടെ മേൽ ഉപാധികൾ അടിച്ചേൽപ്പിക്കാൻ കഴിയില്ലെന്ന് നാഷണൽ കോൺഗ്രസ് ശക്തമായി തിരിച്ചടിച്ചു. എന്തുപാടണം, എത്രമാത്രം പാടണം എന്ന കാര്യത്തിൽ നിർദ്ദേശങ്ങൾ നൽകാൻ സഖ്യകക്ഷിക്ക് അധികാരമില്ലെന്നും ആളുകളുടെ മേൽ യാതൊന്നും അടിച്ചേൽപ്പിക്കാൻ തങ്ങൾ എതിരാണെന്നും എൻ സി നേതാവ് ബഷീർ അഹമ്മദ് വ്യക്തമാക്കി. നാഗ്പൂരിലെ (ആർഎസ്എസ്) തീരുമാനങ്ങൾക്ക് വഴങ്ങരുതെന്ന് കോൺഗ്രസ് ഇതിന് മറുപടിയും നൽകി.

മറുവശത്ത്, കോൺഗ്രസിന്റെ ഈ നിലപാടിനെതിരെ ബിജെപി കടുത്ത വിമർശനവുമായി രംഗത്തെത്തി. വന്ദേമാതരത്തെ എതിർക്കുന്നതിലൂടെ കോൺഗ്രസ് ഇരുപത്തിയൊന്നാം നൂറ്റാണ്ടിലെ 'മുസ്ലിം ലീഗ്' ആയി മാറിയിരിക്കുകയാണെന്ന് ബിജെപി വക്താവ് സുധാൻഷു ത്രിവേദി കുറ്റപ്പെടുത്തി.

പാർട്ടി പരിപാടികളിൽ വന്ദേമാതരത്തിന്റെ ആദ്യ രണ്ട് ചരണങ്ങൾ മാത്രം പാടിയാൽ മതിയെന്ന് കോൺഗ്രസ് വർക്കിങ് കമ്മിറ്റി കഴിഞ്ഞ മാസം തീരുമാനിച്ചിരുന്നു. എന്നാൽ സർക്കാർ ചടങ്ങുകളിൽ വന്ദേമാതരത്തിന്റെ ആറു ചരണങ്ങളും പാടണമെന്ന് ഈ വർഷം ആദ്യം കേന്ദ്രസർക്കാർ ഉത്തരവിട്ടിരുന്നു.