നാടകവേദികളിലൂടെ തുടക്കം കുറിച്ച് പിന്നീട് ‘ഋതു’ എന്ന ചിത്രത്തിലൂടെ ബിഗ്സ്ക്രീനില്‍ അരങ്ങേറ്റം കുറിച്ച താരമാണ് വിനയ് ഫോര്‍ട്ട്. ‘പ്രേമം’ എന്ന ചിത്രത്തിലെ വിമല്‍ സാര്‍ എന്ന കഥാപാത്രമാണ് വിനയ്യ്ക്ക് കരിയര്‍ ബ്രേക്ക് നല്‍കിയത്. ഈയൊരു കഥാപാത്രത്തിലൂടെ വിനയ് മലയാള സിനിമാപ്രേക്ഷകരുടെ മനസ്സിലിടം പിടിച്ചു. പിന്നീട് തമാശ, മാലിക്, ചുരുളി, ആട്ടം എന്നിങ്ങനെയുള്ള സിനിമകളിലെ നര്‍മ്മരസമുള്ള കഥാപാത്രവും സീരിയസ് വേഷങ്ങളും ചെയ്ത് വിനയ് തന്റേതായ സ്ഥാനം മലയാള സിനിമയില്‍ ഉറപ്പിച്ചു.
ഗിരീഷ് എ.ഡി.യുടെ സംവിധാനം ചെയ്ത് നിവിൻ പോളി - മമിതാ ബൈജു കോമ്പോയിലിറങ്ങി, തിയേറ്ററുകളിൽ കളക്ഷൻ റെക്കോർഡുകൾ ഭേദിച്ച് മുന്നേറുന്ന ബെത്ലഹേം കുടുംബ യൂണിറ്റ്, നഹാസ് ഹിദായത്ത് വമ്പൻ ബഡ്ജറ്റിൽ സംവിധാനം ചെയ്ത ദുൽഖർ സൽമാൻ ചിത്രം ഐ ആം ഗെയിം എന്നീ സിനിമകളിലെ വിനയ് ഫോര്‍ട്ടിന്റെ കഥാപാത്രങ്ങള്‍ക്ക് വലിയ കൈയടി നേടാന്‍ കഴിയുന്നുണ്ട്. സിനിമയുടെ പ്രൊമോഷനുമായി ബന്ധപ്പെട്ട തിരക്കുകളിലാണ് താരമിപ്പോള്‍.
ഇപ്പോഴിതാ തന്റെ ഏക മകന് എഡിഎച്ച്‌ഡിയുണ്ടെന്ന് വെളിപ്പെടുത്തുകയാണ് വിനയ് ഫോർട്ട്. മകന്റെ അവസ്ഥ തിരിച്ചറിഞ്ഞതോടെ തന്റെ മുൻഗണനകൾ മാറിയെന്നും അവന്റെ ജീവിതം എങ്ങനെ ഈസിയാക്കാം എന്നതിനെ കുറിച്ചാണ് താൻ കൂടുതല്‍ ചിന്തിക്കുന്നതെന്നും മകന് സന്തോഷമുള്ളൊരു ജീവിതം നൽകുകയാണ് ഇപ്പോഴത്തെ ലക്ഷ്യമെന്നും വിനയ് പറഞ്ഞു.
‘‘എന്റെ മകന് ഒമ്പത് വയസായി. അവന്റെ അവസ്ഥ തിരിച്ചറിയും മുമ്പ് ഞാന്‍ അത്ര കണ്ട് അവന്റെ വളര്‍ച്ചയെ കുറിച്ച് ചിന്തിച്ചിരുന്നില്ല. മകന് എഡിഎച്ച്‌ഡിയുണ്ടെന്ന് തിരിച്ചറിഞ്ഞതോടെ പ്രയോറിറ്റികള്‍ മാറി. സാധാരണ കുട്ടികള്‍ക്ക് കൊടുക്കേണ്ടതിനേക്കാള്‍ കൂടുതല്‍ ശ്രദ്ധ അവന് കൊടുക്കേണ്ടതായുണ്ട്. എന്റെ കുട്ടിക്കാലത്ത് എന്റെ അച്ഛനൊക്കെ ജീവിതത്തിന്റെ രണ്ട് അറ്റവും കൂട്ടി മുട്ടിക്കാനുള്ള ഓട്ടത്തിലായിരുന്നു.
ഇപ്പോള്‍ എന്റെ ജീവിതത്തിന്റെ പ്രയോറിറ്റി മോന്റെ ഭാവിയാണ്. ഈ സ്പെക്‌ട്രത്തിലുള്ള ആളുകളെ കുറിച്ച് ഞാൻ മുമ്പ് പഠിച്ചിട്ടില്ല. ഞാൻ ഒരു പോസ്റ്റ് ഗ്രാജുവേറ്റാണ്. എന്നിരുന്നാലും എഡിഎച്ച്ഡി, ഓട്ടിസം എന്നിവയെ കുറിച്ച് എനിക്ക് യാതൊരു അറിവും ഉണ്ടായിരുന്നില്ല. അതിനെക്കുറിച്ച്‌ ദിവസവും കൂടുതല്‍ പഠിക്കാനാണ് ശ്രമം.എന്റെ ചെറുപ്പകാലത്തും ഇത്തരം അവസ്ഥയിലുള്ള കുട്ടികള്‍ എന്റെ സ്കൂളില്‍ ഉണ്ടായിരുന്നു. മടിയന്‍മാരെന്ന് പറഞ്ഞാണ് അന്ന് അവരെ സമൂഹം ട്രീറ്റ് ചെയ്തിരുന്നത്. ഈ സാഹചര്യം എന്റെ മകന് നേരിടേണ്ടി വരരുത്.
മോന്റെ ജീവിതം എങ്ങനെ സാധാരണ പോലെ ആക്കാമെന്നാണ് എന്റെ ലൈഫിന്റെ പര്‍പ്പസ് എന്നാണ് ഞാന്‍ ഇപ്പോള്‍ ചിന്തിക്കുന്നത്. ഏറ്റവും നന്നായി അവനെ എജ്യുക്കേറ്റ് ചെയ്യുക. ഏറ്റവും നന്നായി അവനെ ഇന്റിപെന്റന്റാക്കുക. ഹാപ്പിനെസ് നിറഞ്ഞൊരു ലൈഫ് അവന് ഉണ്ടാക്കി കൊടുക്കുക എന്നതാണ് എന്റെ പ്രയോറിറ്റി ഇപ്പോള്‍.
നമ്മുടെ സമൂഹത്തിന് ഈ അവസ്ഥയെക്കുറിച്ച് ഒട്ടും അറിയില്ല. എന്റെ ചെറുപ്പകാലത്തും ഇത്തരം അവസ്ഥയിലുള്ള കുട്ടികള്‍ എന്റെ സ്കൂളിൽ ഉണ്ടായിരുന്നു. മടിയന്‍മാരെന്ന് പറഞ്ഞാണ് അന്ന് അവരെ സമൂഹം ട്രീറ്റ് ചെയ്തിരുന്നത്. ഈ സാഹചര്യം എന്റെ മകന് നേരിടേണ്ടി വരരുത്. ന്യൂറോ ടിപ്പിക്കല്‍ ആയിട്ടുള്ളവര്‍ക്ക് വേണ്ടി ഡിസൈന്‍ ചെയ്ത സമൂഹമാണ് നമ്മുടേത്. ആ സൊസൈറ്റിയിൽ നാളെ എന്റെ മകന് എങ്ങനെ ഫംഗ്ഷൻ ചെയ്യാൻ പറ്റും അതാണ് ഞാൻ ആലോചിക്കുന്നത്. മകനുള്ള പ്രയോറിറ്റി കഴിഞ്ഞിട്ടേ എനിക്ക് ഇപ്പോൾ മറ്റെന്തും ഉള്ളൂ. അവന്റെ ചലഞ്ചുകൾ ഈസിയാക്കുക എന്നതാണ് എന്റെ ലക്ഷ്യം...’’ എന്നാണ് വിനയ് ഫോര്‍ട്ട് പറയുന്നത്. ട്വന്റിഫോർ ന്യൂസിന്റെ വെബ് സ്‌പെഷ്യൽ പോഡ്‌കാസ്റ്റിലായിരുന്നു വിനയ് ഫോർട്ട് മനസ്സ് തുറന്നത്. വിനയ് യുടെ മനസ്സു തുറന്നുള്ള ഈ അഭിമുഖത്തിന് വലിയ സ്വീകാര്യതയാണ് ആരാധകര്‍ നല്‍കുന്നത്. കൂടുതല്‍ പേരും വിനയ് യ്ക്കും കുടുംബത്തിനും സ്നേഹവും പ്രാര്‍ത്ഥനയും പങ്കിടുന്നുണ്ട്.
മസ്തിഷ്കത്തിന്റെ വളര്‍ച്ചയെയും പ്രവര്‍ത്തനങ്ങളെയും ബാധിക്കുന്ന ഒരു നാഡീവ്യൂഹ വികസന തകരാറാണ് എഡിഎച്ച്ഡി. ഇത് കുട്ടികളിലും അപൂര്‍വ്വമായി മുതിര്‍ന്നവരിലും കാണപ്പെടാറുണ്ട്. ഒരു കാര്യത്തിലും ശ്രദ്ധ പതിപ്പിക്കാനാകാതെ വരുക, വളരെ എളുപ്പത്തില്‍ ശ്രദ്ധ പാളിപ്പോവുക, പറയുന്ന നിര്‍ദ്ദേശങ്ങളോ പൂർണ്ണമായി പാലിക്കാതിരിക്കുക, ദൈനംദിന ജീവിതത്തിലെ കാര്യങ്ങൾ മറന്നുപോകുക എന്നിവയാണ് ഈ അവസ്ഥയുടെ പ്രധാന ലക്ഷണങ്ങള്‍. ചെറുപ്പത്തിൽ തന്നെ കണ്ടെത്തിയാൽ കൃത്യമായ തെറാപ്പികളിലൂടെയും ട്രെയിനിംഗിലൂടെയും ഈ അവസ്ഥ പരിഹരിക്കുക എളുപ്പമാണ്. അടുത്തിടെ നടൻ ഫഹദ് ഫസിലും ഷൈൻ ടോം ചാക്കോയുമെല്ലാം തങ്ങൾക്ക് എഡിഎച്ച്ഡി സ്ഥിരീകരിച്ച വിവരം തുറന്നുപറഞ്ഞിരുന്നു.
Comments