മണിരത്നം സംവിധാനം ചെയ്ത ‘ദിൽ സേ’ എന്ന ചിത്രത്തിലൂടെ ബിഗ്സ്ക്രീനില്‍ അരങ്ങേറ്റം കുറിച്ച താരമാണ് പ്രീതി സിന്റ. ബോളിവുഡിന്റെ കിംഗ് ഖാന്‍ ഷാരൂഖ് ഖാനൊപ്പം ആദ്യ ചിത്രത്തില്‍ തിളങ്ങിയ താരത്തിന് പിന്നീടിങ്ങോട്ട് തിരിഞ്ഞു നോക്കേണ്ടി വന്നിട്ടില്ല. ഒരുപാട് സൂപ്പര്‍ഹിറ്റ് ചിത്രങ്ങളില്‍ പ്രീതി അക്കാലത്ത് നായികയായി തിളങ്ങി. സ്ത്രീ പ്രാധാന്യമുള്ള കരുത്തുറ്റ കഥാപാത്രങ്ങളിലൂടെയാണ് പ്രീതി പ്രേക്ഷകരുടെ മനസ്സില്‍ തന്റെ സ്ഥാനം ഉറപ്പിച്ചത്. ചിരിച്ച മുഖത്തോടെ മാത്രം അഭിമുഖങ്ങളില്‍ പ്രത്യക്ഷപ്പെടാറുള്ള താരം പലപ്പോഴും തന്റെ സിനിമാ അനുഭവങ്ങള്‍ പറഞ്ഞ് പ്രേക്ഷകരെ പൊട്ടിച്ചിരിപ്പിട്ടുണ്ട്.
ഇപ്പോഴിതാ ഒരു ഷോട്ടിനിടെ ഒരു നടന്റെ പാന്റ് കീറിപ്പോയെന്ന് പറയുകയാണ് പ്രീതി സിന്റ. ആ രംഗം വളരെ മികച്ചതായിരുന്നുവെന്നും അത് ഇപ്പോഴും സിനിമയിൽ നിലനിൽക്കുന്നുണ്ടെന്നും പ്രീതി പറഞ്ഞു. ഒപ്പമഭിനയിച്ച നടന്റെ പേരു പരാമര്‍ശിക്കാതെയായിരുന്നു പ്രീതിയുടെ രസകരമായ തുറന്നു പറച്ചില്‍.
‘‘ഞാൻ ആ നടന്റെ പേര് പറയുന്നില്ല, പക്ഷേ ഒരു നടന്റെ കൂടെ ഞാനൊരു പാട്ട് ചെയ്തിരുന്നു. അതിൽ ഞങ്ങൾക്ക് ഒരു കുന്നിറങ്ങി താഴേക്ക് ഉരുണ്ട് വീഴുന്ന ഒരു സീനുണ്ടായിരുന്നു. അങ്ങനെ ഉരുണ്ട് വീഴുന്നതിനിടയിൽ അദ്ദേഹത്തിന്റെ പാന്റ്സ് കീറിപ്പോയി. ആ പാന്റ്സിൽ വലിയൊരു ദ്വാരം തന്നെ വീണു, അത് പുറത്തു കാണാനും പറ്റുമായിരുന്നു... അതിപ്പോഴും ആ പാട്ടിലുണ്ട്, കേട്ടോ? ആരാണ് ആ നടന്‍ എന്ന് ഞാൻ പറയില്ല, പക്ഷേ എനിക്കത് ഓർത്ത് ചിരി അടക്കാൻ പറ്റിയില്ല. അതിനുശേഷം കഴിഞ്ഞ ദിവസം ഞാൻ വീണ്ടും അത് സിനിമയിൽ കണ്ടപ്പോഴും ഞങ്ങൾ അതിനെക്കുറിച്ച് ഓർത്ത് ചിരിച്ചു... പക്ഷെ അത് ഇപ്പോഴും അതിലുണ്ട്...’’ എന്നാണ് പ്രീതി സിന്റ പറഞ്ഞത്. പ്രീതിയുടെ ഈ ബിഹൈന്‍ഡ് ദ സീന്‍ അനുഭവം കേട്ട് പൊട്ടിച്ചിരിക്കുകയാണ് സോഷ്യല്‍ മീഡിയ. പലരും ആ നടന്‍ ആരാണെന്ന കമന്റുകളും കുറിക്കുന്നുണ്ട്. സെയ്ഫ് അലി ഖാനാണ് ആ നടനെന്നും ക്യാ കെഹ്ന എന്ന സിനിമയിലെ ഗാനരംഗമാണതെന്നും പലരും കമന്റുകളില്‍ കുറിക്കുന്നു.
വലിയൊരു ഇടവേളയ്ക്ക് ശേഷം വീണ്ടും അഭിനയരംഗത്തും സജീവമാകുകയാണ് പ്രീതി സിന്റ. എട്ടുവർഷത്തെ ഇടവേളയ്ക്കുശേഷമാണ് രാജ്കുമാർ സന്തോഷിയുടെ ‘ബട്വാര 1947’ എന്ന ചിത്രത്തിലൂടെ താരം ബിഗ് സ്ക്രീനില്‍ തിരിച്ചെത്തി. ഓഗസ്റ്റ് 14ന് റിലീസ് ചെയ്ത ചിത്രത്തില്‍ സണ്ണി ഡിയോള്‍, ഷബാന ആസ്മി, അലി ഫസല്‍ എന്നിവർക്കൊപ്പമാണ് പ്രീതി സിന്റ പ്രധാന വേഷത്തിലെത്തുന്നത്.
കരിയറില്‍ തിളങ്ങി നില്‍ക്കുമ്പോഴാണ് താരം ലോസ് ഏഞ്ചൽസിൽ വച്ച് അമേരിക്കയിൽ നിന്നുള്ള തന്റെ ദീർഘകാല സുഹൃത്തായ ജീൻ ഗുഡ്ഇനഫിനെ താരം വിവാഹം ചെയ്തത്. ഐപിഎൽ പഞ്ചാബ് കിംഗ്സ് ക്രിക്കറ്റ് ടീമിന്റെ സഹ ഉടമ കൂടിയായ പ്രീതി പിന്നീട് വളരെ കുറച്ചു സിനിമകളില്‍ മാത്രമേ പ്രത്യക്ഷപ്പെട്ടിട്ടുള്ളൂ. വാടക ഗർഭധാരണത്തിലൂടെ പ്രീതിയും ജീനും ഇരട്ട കുട്ടികളുടെ മാതാപിതാക്കളുമായി.
Comments