മലപ്പുറം: ആത്മീയ ചികിത്സയെന്ന പേരില്‍ നാട്ടുകാരെ പറ്റിച്ച് പണമുണ്ടാക്കുന്ന സ്ഥാപനം നാട്ടുകാരും യൂത്ത്‌ലീഗും ചേര്‍ന്ന് പൂട്ടിച്ചു. മലപ്പുറം തിരൂര്‍ കൊടക്കലിലെ 'ജിന്ന് മഹ്‌ളറ' എന്ന സ്ഥാപനമാണ് പൂട്ടിച്ചത്. 'ജിന്ന് മന്ത്രിച്ച് ഊതിയത്' എന്ന പേരില്‍ വാഴപ്പഴവും തേനുമെല്ലാം വില്‍പ്പന നടത്തുകയും സാമ്പത്തീക തട്ടിപ്പ് നടത്തിയെന്നുമാണ് ആരോപണം. സ്ഥാപനം നാട്ടുകാര്‍ ചേര്‍ന്ന് പൂട്ടിക്കുകയായിരുന്നു.
ആത്മീയ ചികിത്സ എന്ന പേരില്‍ നടത്തി വന്ന സ്ഥാപനത്തിലേക്ക് ആയിരക്കണക്കിന് ആളുകളാണ് എത്തിക്കൊണ്ടിരുന്നത്. ജിന്നിനെ വിളിച്ചു വരുത്തി രോഗശാന്തി നല്‍കും, ജിന്നിന്റെ ഉപദ്രവം ഒഴിപ്പിക്കും തുടങ്ങിയ വാഗ്ദാനങ്ങളോടെ ആയിരുന്നു സ്ഥാപനം പ്രവര്‍ത്തിച്ചിരുന്നത്. വന്‍ തോതില്‍ പണത്തട്ടിപ്പും ഇയാള്‍ നടത്തി. ജിന്ന് മന്ത്രിച്ച് ഊതി കൊടുത്ത വാഴപ്പഴത്തിന് 2500 രൂപയാണ് കിട്ടിയത്. 1000 രൂപ വിശ്വാസികള്‍ ആദ്യം വില പറയുകയും പിന്നീട് ലേലത്തില്‍ 2500 രൂപയോളം കിട്ടുകയുമായിരുന്നു. തൊലി കളയാതെ ഏത്തപ്പഴം ഉള്ളില്‍ നിന്ന് മുറിച്ചു കൊടുത്ത വീഡിയോ സോഷ്യല്‍ മീഡിയയില്‍ പ്രചരിച്ചതോടെയാണ് തട്ടിപ്പ് പുറത്തായത്. പഴം മുറിച്ചത് ജിന്നാണെന്നാണ് പ്രചരിപ്പിച്ചത്.
ആലപ്പുഴ സ്വദേശി ജമാലുദ്ധീന്റെ നേതൃത്വത്തില്‍ ആയിരുന്നു സ്ഥാപനം. കായല്‍പട്ടണം ഔലിയാക്കളുടെ പേരക്കുട്ടി സി.എം ഉസ്താദ് ആണ് താന്‍ എന്ന പേരില്‍ ആയിരുന്നു ഇയാള്‍ പ്രവര്‍ത്തിച്ചിരുന്നത്. നാല് മാസം മുന്‍പ് അക്യു പഞ്ചര്‍ ചികിത്സ എന്ന പേരിലായിരുന്നു പ്രവര്‍ത്തനം. പിന്നീട് അതിന് ശേഷമായിരുന്നു ആത്മീയ ചികിത്സയുമായി എത്തിയത്. എത്തുന്നത് ആയിരക്കണക്കിന് പേര്‍. വന്‍തുക തട്ടിയെടുത്തെന്നും. കര്‍ശന നടപടിയെടുക്കണമെന്ന ആവശ്യം ഉയര്‍ന്നിരിക്കുയാണ്.
Comments