മലയാളടെലിവിഷന്‍ ചരിത്രത്തില്‍ ഏറ്റവുമധികം ആരാധകരുള്ള റിയാലിറ്റി ഷോയാണ് ബിഗ് ബോസ് മലയാളം. മലയാളത്തിന്റെ നടനവിസ്മയം മോഹന്‍ലാല്‍ അവതാരകനായി എത്തുന്ന ബിഗ് ബോസ് മലയാളം അതിന്റെ എട്ടാം സീസണുമായി തിരിച്ചെത്തിയിരിക്കുകയാണ്. ഒരുവർഷത്തോളം നീണ്ട കാത്തിരിപ്പിന് ശേഷമാണ് ഈ സീസണ്‍ പ്രേക്ഷകര്‍ക്ക് മുന്നിലെത്തുന്നത്. മലയാളികൾക്ക് കണ്ട് സുപരിചിതരായ മുഖങ്ങളും സോഷ്യൽ മീഡിയ താരങ്ങളും അഗ്നിപരീക്ഷയിൽ വന്ന് വിജയിച്ച് കയറിയ നാല് പേരുമടക്കം 21 മത്സരാർത്ഥികളാണ് ഇത്തവണ ബിഗ് ബോസിൽ മാറ്റുരയ്ക്കാനെത്തുന്നത്. സിനിമാ താരവും മോഡലും മുൻ മിസ് കേരളയുമെല്ലാമായ ഗായത്രി സുരേഷ് ആയിരുന്നു ആദ്യ മത്സരാർത്ഥിയായി എത്തിയത്.
എന്നാല്‍ ബിഗ് ബോസ് മലയാളം സീസൺ എട്ട് ആരംഭിച്ച് രണ്ട് ദിവസം മാത്രം പിന്നിട്ടപ്പോള്‍ മത്സരത്തിൽ ഒരു ഗംഭീര ട്വിസ്റ്റാണ് ബിഗ് ബോസ് കൊണ്ടുവന്നത്. ഷോയിൽ നിന്നും ഒരാൾ മത്സരാർത്ഥികളുടെ തീരുമാനപ്രകാരം സ്പോട്ട് എവിക്ഷന്‍ നടത്തിയാണ് പ്രേക്ഷകരെ ബിഗ് ബോസ് ഞെട്ടിച്ചത്. ബിഗ് ബോസ് മലയാളം സീസണ്‍ 8ല്‍ പ്രവേശിച്ച്‌ 48 മണിക്കൂർ പോലും തികയും മുൻപ് ഗായത്രി സുരേഷാണ് ഹൗസില്‍ നിന്ന് എവിക്ടായിരിക്കുന്നത്.
ഇപ്പോഴിതാ എവിക്ഷനായതിന്റെ പിന്നാലെ തന്റെ സോഷ്യല്‍ മീഡിയ പേജിലൂടെ ഇതിനെക്കുറിച്ചുള്ള പ്രതികരണം പങ്കിടുകയാണ് ഗായത്രി സുരേഷ്. പുറത്തായതിന് പിന്നാലെ ഇൻസ്റ്റാഗ്രാമില്‍ പങ്കുവച്ച വീഡിയോയിലാണ് ബിഗ് ബോസ് വീട്ടിലെ തന്റെ അനുഭവത്തെക്കുറിച്ചും പുറത്താക്കല്‍ തീരുമാനത്തെക്കുറിച്ചും ഗായത്രി സംസാരിച്ചത്.
‘‘എല്ലാവരും അറിഞ്ഞുകാണുമല്ലോ ഞാൻ ബിഗ് ബോസ് ഹൗസില്‍ നിന്ന് എവിക്‌ട് ആയി. സത്യമാണ്, വളരെ ഷോക്ക്ഡ് ആയിരുന്നു, ബ്ലാങ്ക് ആയിരുന്നു. അതുകൊണ്ടാണ് ഇത്രയും നേരം ഓണ്‍ലൈനില്‍ വരാതിരുന്നത്. ഒട്ടേറെ പ്രതീക്ഷകളോടെയാണ് ബിഗ് ബോസ് വീട്ടിലേക്ക് പോയത്. നന്നായി ടാസ്കുകള്‍ ചെയ്യണമെന്നും തന്നെക്കുറിച്ചുള്ള ആളുകളുടെ ധാരണ മാറ്റണമെന്നും സ്വയം കൂടുതല്‍ കണ്ടെത്തണമെന്നുമൊക്കെ കരുതിയിരുന്നു. എന്നാല്‍ രണ്ടാം ദിവസം തന്നെ പുറത്തായത് എനിക്ക് വളരെ അന്യായമായി തോന്നി.
ബിഗ് ബോസ് ഇത്തവണ ‘ജനാധിപത്യം’ എന്ന ആശയത്തിലാണ് മുന്നോട്ടുപോകുന്നത്, റിനിയെ പുറത്താക്കുന്നതിനായി എല്ലാവരും വോട്ട് ചെയ്തിരുന്നു. എന്നാല്‍ തിരിച്ചെത്തിയപ്പോള്‍ ക്യാപ്റ്റൻ പെട്ടെന്ന് എന്റെ പേര് ചൂണ്ടിക്കാണിക്കുകയായിരുന്നു. തുടർന്ന് ആർജെ അഞ്ജലിയെയും നോമിനേറ്റ് ചെയ്തു. അഞ്ജലിക്ക് സംസാരിക്കാൻ അവസരം നല്‍കിയതിന് പിന്നാലെ അന്തിമ തീരുമാനം തന്നെ പുറത്താക്കുക എന്നതായിരുന്നു. സംഭവിച്ചത് എങ്ങനെ ഉള്‍ക്കൊള്ളണമെന്ന് പോലും എനിക്ക് മനസിലായില്ല.
വീട്ടിലുള്ളവരോട് യാത്ര പറഞ്ഞ് വാതിലിനടുത്തെത്തുന്നതുവരെ ഇതൊരു പ്രാങ്ക് ആണെന്നാണ് കരുതിയിരുന്നത്. ബിഗ് ബോസിന്റെ വാതില്‍ തുറക്കില്ല, ഞാന്‍ പുറത്തുപോകില്ല എന്നൊക്കെയാണ് കരുതിയതെങ്കിലും ഒടുവില്‍ അത് സംഭവിച്ചു. ഇത് കുറച്ച്‌ അന്യായമല്ലേ എന്നാണ് എനിക്ക് ചോദിക്കാനുള്ളത്. ഇത്രയും പേർ റിനിക്ക് വോട്ട് ചെയ്തിട്ടും എന്തുകൊണ്ട് എനിക്ക് ഒരു അവസരം തന്നില്ല ?. ഞാൻ അത്രയും ദുർബലയായ മത്സരാർഥിയാണെന്ന് കരുതുന്നില്ല, എല്ലാവരോടും സൗഹൃദത്തിലായിരുന്നു. പറയേണ്ടിടത്തെല്ലാം എന്റെ നിലപാട് വ്യക്തമാക്കിയിരുന്നു.
കുറച്ചുകൂടി സമയം ലഭിച്ചിരുന്നെങ്കില്‍ കൂടുതല്‍ സജീവമായി കളിക്കുമായിരുന്നു. പുറത്തുവന്നതിന് ശേഷമാണ് എല്ലാ ഇടത്തും പോയി സ്വയം അവസരങ്ങള്‍ സൃഷ്ടിക്കണമെന്നും ഞാൻ മനസിലാക്കിയത്. എന്നാല്‍ പുറത്തുവന്നപ്പോഴാണ് എനിക്ക് ലഭിക്കുന്ന പിന്തുണയുടെ വ്യാപ്തി മനസിലായത്. എനിക്കൊപ്പം നിന്ന എല്ലാവർക്കും നന്ദി...’’ എന്നാണ് ഗായത്രി സുരേഷ് സോഷ്യല്‍ മീഡിയയില്‍ പങ്കിട്ട വീഡിയോയില്‍ പറഞ്ഞത്. ഇതേ ഞെട്ടല്‍ പല കുടുംബപ്രേക്ഷകരും സോഷ്യല്‍ മീഡിയയിലൂടെ പങ്കിടുന്നുണ്ട്.
മലയാളം ബിഗ് ബോസ് സീസണ്‍ 8 പുതിയ പരീക്ഷണങ്ങള്‍ക്കൊപ്പമാണ് തുടക്കം കുറിച്ചത്. 40 പേരെ ഉള്‍ക്കൊള്ളിച്ച് സാധാരണക്കാര്‍ക്കായി സംഘടിപ്പിച്ച ബിഗ് ബോസ് പ്രീ ഷോ ആയ അഗ്നിപരീക്ഷയടക്കം എല്ലാം പുതുമ നിറഞ്ഞതായിരുന്നു. അവസാനം ഹൗസിനുള്ളിലേക്ക് സെലിബ്രിറ്റികളം സാധാരണക്കാരും സോഷ്യല്‍ മീഡിയ താരങ്ങളുമടക്കം 21 മത്സരാർത്ഥികള്‍ മാറ്റുരയ്ക്കാനെത്തി. എന്നാല്‍ ആദ്യ രണ്ടു ദിവസത്തിനുള്ളില്‍ തന്നെ അപ്രതീക്ഷിതമായ സംഭവങ്ങളാണ് ഹൗസിനുള്ളിൽ നടന്നത്.
ഒരു മുന്നറിയിപ്പുമില്ലാതെ പെട്ടെന്ന് ഗായത്രി സുരേഷ് പുറത്തു പോയത് ഗായത്രിക്ക് മാത്രമല്ല സഹ മത്സരാർത്ഥികള്‍ക്കും വലിയ അമ്പരപ്പ് തന്നെയായിരുന്നു. ലൈവ് കണ്ടുകൊണ്ടിരുന്ന പ്രേക്ഷകരും ഗായത്രി എവിക്ടായതിന് സാക്ഷ്യം വഹിച്ചതിന്റെ ഞെട്ടലിലാണ്. ഗായത്രി പുറത്തായത് ഷോയിലെ ആദ്യത്തെ ഷോക്കിങ് ട്വിസ്റ്റാണ്. എന്താണ് സംഭവിച്ചത് എന്ന് അറിയാതെ സ്പോട്ട് എവിക്ഷനിൽ പുറത്തായ ഗായത്രി സുരേഷ് അല്പം വിഷമത്തോടെയാണ് ഹൗസിൽ നിന്നും പുറത്തേക്ക് പോയത്. ഡെമോക്രസി എന്ന ഒരു ടാസ്കിലൂടെയാണ് ഗായത്രി സുരേഷ് പുറത്തു പോയത്. യാതൊരു സൂചനയുമില്ലാതെ റൂമിലേക്ക് വിളിച്ചു വരുത്തിയ മത്സരാർത്ഥികളോട് ഒന്നുകിൽ ബിഗ് ബോസിന്റെ നൂറ് ദിവസം കഞ്ഞിയും പയറും മാത്രം കഴിക്കുക അല്ലെങ്കിൽ ഏതെങ്കിലും ഒരു മത്സരാർത്ഥിയെ നിർദ്ദേശം ചെയ്ത് പുറത്താക്കുക എന്നായിരുന്നു ബിഗ് ബോസ് പറഞ്ഞത്.
അതിനാദ്യം മത്സരാർത്ഥികൾ പുറത്താക്കാൻ തീരുമാനിച്ചത് റിനി ആൻ ജോർജിനെ ആയിരുന്നു. കൂടുതൽ വോട്ടുകളും റിനിക്കാണ് മത്സരാര്‍ത്ഥികള്‍ നൽകിയത്. പന്ത്രണ്ട് പേർ വരെ റിനിയെ പുറത്താക്കാനായി വോട്ട് ചെയ്തു. പക്ഷെ അന്തിമ തീരുമാനം എടുക്കേണ്ടത് ലീഡറായ ജെസീല പർവീൺ ആയിരുന്നു. റിനിക്ക് വോട്ട് കൂടുതൽ ലഭിച്ചപ്പോൾ ലീഡറായ ജെസീലയ്ക്ക് റിനിക്ക് ഒരു അവസരം കൂടി കൊടുക്കണമെന്ന ആഗ്രഹം പങ്കിട്ടു. ആ തീരുമാനം ഹൗസ്മേറ്റ്സിനെ അറിയിച്ചു. അതോടെ മറ്റൊരു പേര് റിനിക്ക് പകരമായി തെരഞ്ഞെടുക്കാൻ ഹൗസ് മേറ്റ്സ് നിർബന്ധതരായി. അങ്ങനെ ഗായത്രി സുരേഷ് തെരഞ്ഞെടുത്തു. ഒട്ടും ആക്ടീവല്ലാത്ത മത്സരാർത്ഥി എന്ന കാരണമാണ് ഗായത്രിക്ക് എതിരെ തിരിയാൻ കാരണമായി പല മത്സരാര്‍ത്ഥികളും പറഞ്ഞത്.
ഹൗസിലെ മത്സരത്തിൽ വലിയൊരു ട്വിസ്റ്റ് സംഭവിക്കുകയും ഗായത്രി ബിഗ് ബോസിന്റെ നിർദേശപ്രകാരം പ്രധാന വാതിലിലൂടെ പുറത്തേക്ക് പോകുന്നതും പ്രേക്ഷകരടക്കം ലൈവിൽ കണ്ടു. വെറും 48 മണിക്കൂറിനുള്ളില്‍ ഞെട്ടിപ്പിക്കുന്ന ട്വിസ്റ്റ് കൊണ്ടു വന്നതിനാല്‍ വരും ദിവസങ്ങളില്‍ പ്രേക്ഷകരും മത്സരാർത്ഥികളും പ്രതീക്ഷിക്കാത്തത് ബിഗ് ബോസ് കൊണ്ടുവരുമെന്നു തന്നെ പ്രതീക്ഷിക്കാം. ഗായത്രി പൂർവാധികം ശക്തിയോടെ ഷോയിലേക്ക് തിരിച്ച് വരുമോ എന്ന സംശയവും പല പ്രേക്ഷകരും പങ്കിടുന്നുണ്ട്.
Comments