മലയാളത്തിലെ ക്രൈം ത്രില്ലറുകള്‍ക്ക് ഒരു ബെഞ്ച്മാര്‍ക്ക് നല്‍കിയ സിനിമയാണ് ജീത്തു ജോസഫ്- മോഹന്‍ലാല്‍ കൂട്ടുകെട്ടിലിറങ്ങിയ ദൃശ്യം. ആദ്യ സിനിമയുടെ ഗംഭീര വിജയത്തിനു ശേഷം രണ്ടാം ഭാഗവും മൂന്നാം ഭാഗവും പ്രേക്ഷകര്‍ക്ക് മുന്നിലെത്തി. ഒന്നിനൊന്ന് മികച്ചതായിട്ടാണ് ഓരോ ഭാഗവും ജീത്തു അണിയിച്ചൊരുക്കിയത്. റീമേക്ക് ചെയ്ത ഭാഷകളിലും ബ്ലോക്ക്ബസ്റ്റര്‍ വിജയം നേടിയ ചിത്രം പാന്‍ ഇന്ത്യന്‍ തലത്തില്‍ വരെ ശ്രദ്ധ നേടിയതാണ്.
ആദ്യ ഭാഗത്തിന്റെ ഹിന്ദി റീമേക്ക് നൂറു കോടി ക്ലബ് കടന്നിരുന്നു. പിന്നീടെത്തിയ രണ്ടാം ഭാഗവും വലിയ സ്വീകാര്യത നേടിയതാണ്. അതിനു പിന്നാലെ ‘ദൃശ്യം’ ഹിന്ദി പതിപ്പായ ‘ദൃശ്യം 3: ദ് കൺക്ലൂഷൻ’ റിലീസിനൊരുങ്ങുകയാണ്. അഭിഷേക് പഥക് കഥയും സംവിധാനവും നിർവഹിക്കുന്ന ചിത്രത്തിൽ അജയ് ദേവ്ഗൺ, തബു, ശ്രീയ ശരൺ, പ്രകാശ് രാജ്, ജയ്ദീപ് അഹ്ലാവത്ത് എന്നിവരാണ് പ്രധാന വേഷങ്ങളിലെത്തുന്നത്.
ഇപ്പോഴിതാ ‘ദൃശ്യം 3’ന്റെ പ്രമോഷണൽ ചടങ്ങിൽ മലയാളം ‘ദൃശ്യം’ ഫ്രാഞ്ചൈസികളെക്കുറിച്ചും ഈ സിനിമ മോഹന്‍ലാലും ജീത്തു ജോസഫും കാണണമെന്ന് ആഗ്രഹമുണ്ടെന്നും പറയുകയാണ് അജയ് ദേവ്ഗണ്‍. മലയാളത്തിന്റെ തനിപ്പകർപ്പല്ലെന്നും രണ്ടാം ഭാഗം മലയാളത്തില്‍നിന്ന് പ്രചോദനം ഉള്‍ക്കൊണ്ട് ചെയ്തതാണെങ്കിലും മൂന്നാം ഭാഗത്തിന്റെ തിരക്കഥ തികച്ചും വേറൊരു കഥയാണെന്ന് അജയ് ദേവ്ഗണ്‍ വ്യക്തമാക്കി.
‘‘ദൃശ്യം 3’ ഒറിജിനൽ ചിത്രത്തിന്റെ തനിപ്പകർപ്പല്ല. നിരവധി മാറ്റങ്ങൾ ചിത്രത്തിൽ വരുത്തിയിട്ടുണ്ട്. രണ്ടു സിനിമകളും രണ്ടാണ്. മലയാളത്തെയും ഹിന്ദി ദൃശ്യത്തെയും രണ്ടായി കാണണം. ഇത് വേറെ തന്നെ തിരക്കഥയാണ്. ഈ സിനിമ ലാൽ സർ (മോഹൻലാൽ) കാണണമെന്നാണ് എന്റെ ആഗ്രഹം. ദൃശ്യത്തിന്റെ അണിയറപ്രവർത്തകർ സിനിമ കണ്ട് വിലയിരുത്തണം. ലാൽ സാറിന്റെ അനുമതി കൂടി ലഭിച്ചാൽ സന്തോഷമാണ്. അദ്ദേഹത്തിന്റെ അഭിപ്രായം അറിയാൻ ആകാംക്ഷയുണ്ട്.
അവരുടെ ‘ദൃശ്യം 3’ പൂർണമായും വ്യത്യസ്തമാണ്. വലിയ മാറ്റങ്ങൾ വരുത്തി എന്നതിലുപരി ഇത് തികച്ചും വേറൊരു കഥയാണ്. രണ്ടാം ഭാഗത്തിന് ശേഷം ഈ സിനിമ ഉണ്ടാകുമോ എന്ന് ഞങ്ങൾക്ക് ഉറപ്പില്ലായിരുന്നു. വെറുതേ ഒരു തിരക്കഥയുണ്ടാക്കി തുടർച്ച സൃഷ്ടിക്കാൻ കഴിയുന്ന സിനിമയല്ല ഇത്. ട്വിസ്റ്റുകളും സർപ്രൈസുകളും നിറഞ്ഞതാണ് പുതിയ ഭാഗം. സംവിധായകൻ അഭിഷേക് പഥക് മികച്ച രീതിയിലാണ് ചിത്രം ഒരുക്കിയിരിക്കുന്നത്...’’ അജയ് ദേവ്ഗണ്‍ പറഞ്ഞു.
സിനിമയുടെ ട്രെയ്‌ലർ ഇക്കഴിഞ്ഞ ദിവസം പുറത്തിറങ്ങിയിരുന്നു. വിജയ് സാല്‍ഗോങ്കർ എന്ന കഥാപാത്രമായി അജയ് ദേവ്ഗണ്‍ തിരിച്ചെത്തുമ്പോള്‍ ഐജി മീര ദേശ്മുഖായി തബുവും ഭാര്യ നന്ദിനിയായി ശ്രിയ ശരണ്ണും വേഷമിടുന്നു. രജത് കപൂർ മൂന്നാം ഭാഗത്തിലുമുണ്ട്. പ്രകാശ് രാജ്, ജയ്ദീപ് അഹ്ലാവത് എന്നിവരാണ് പുതിയ കഥാപാത്രങ്ങളായി ചിത്രത്തിലെത്തുന്നത്. അലോക് ജെയിൻ, അജിത് അന്ധാരെ, കുമാർ മംഗത് പഥക്, അഭിഷേക് പഥക് എന്നിവർ ചേർന്നാണ് നിർമാണം. സംവിധായകൻ അഭിഷേക് പഥക്കിനൊപ്പം ആമില്‍ കീയൻ ഖാൻ, പർവീസ് ഷെയ്ഖ് എന്നിവരും തിരക്കഥയില്‍ പങ്കാളികളാണ്. ഹിന്ദി ‘ദൃശ്യം 3’ ഒക്ടോബർ രണ്ടിന് തിയേറ്ററുകളിലെത്തും.
2013-ല്‍ പുറത്തിറങ്ങിയ മലയാളം ‘ദൃശ്യ’ത്തിന്റെ ഹിന്ദി റീമേക്ക് 2015-ലാണ് റിലീസ് ചെയ്തത്. ചിത്രം ആഗോളതലത്തില്‍ 110 കോടി രൂപ കളക്ഷൻ നേടിയിരുന്നു. അതിനു ശേഷം രണ്ടാം ഭാഗവും പുറത്തിറങ്ങി പ്രേക്ഷകരുടെ കൈയടി നേടി. ‘ദൃശ്യം 3: ദ് കൺക്ലൂഷൻ’ തിയറ്ററുകളിലെത്തും മുമ്പു തന്നെ തങ്ങളുടെ പോസ്റ്ററുകളിലും മറ്റും അണിയറക്കാർ സൂചിപ്പിക്കുന്നത് ഇത് വിജയ് സൽഗോങ്കറുടെ (ഹിന്ദിയിലെ ജോർജുകുട്ടി) അവസാന കഥയായിരിക്കുമെന്നാണ്.
ഹിന്ദിയിൽ മൂന്നാം ഭാഗത്തോടെ ഫ്രാഞ്ചൈസി അവസാനിക്കുമെങ്കിലും മലയാളത്തിൽ നാലാം ഭാഗം കൂടി വന്നേക്കുമെന്നാണ് സൂചന. ‘ദൃശ്യം’ നാലാം ഭാഗത്തിന്റെ ഔദ്യോഗിക പ്രഖ്യാപനം ഇക്കഴിഞ്ഞ ദിവസം ഒരു അവാര്‍ഡ് വേദിയില്‍ വച്ച് നിര്‍മ്മാതാവ് ആന്റണി പെരുമ്പാവൂര്‍ പങ്കിട്ടിരുന്നു. ‘ദൃശ്യം’ പരമ്പരയ്ക്ക് അടുത്തൊരു ഭാഗം ഉറപ്പായും ഉണ്ടാകുമെന്നും, ഇത് തന്റെ ഉറപ്പാണെന്നുമാണ് ആന്റണി പെരുമ്പാവൂർ വേദിയിൽ വച്ച് വ്യക്തമാക്കിയത്. ഇതറിഞ്ഞതോടെ കഴിഞ്ഞ മൂന്നു പ്രാവശ്യത്തെയും പോലെ പ്രേക്ഷകര്‍ ആകാംക്ഷയോടെ പുതിയ അപ്ഡേഷനുകള്‍ക്കായി കാത്തിരിക്കുകയാണ്.
Comments