രാക്ഷസന്‍ എന്ന ഒറ്റ സിനിമയിലൂടെ തെന്നിന്ത്യയിലെ മുന്‍നിര നടന്മാരിലൊരാളായി മാറിയ താരമാണ് വിഷ്ണു വിശാല്‍. അതിനു ശേഷമെത്തിയ ‘ആര്യന്‍’ എന്ന ഇന്‍വെസ്റ്റിഗേഷന്‍ ത്രില്ലര്‍ ഗണത്തില്‍പെടുന്ന ചിത്രത്തിലൂടെയും വിഷ്ണു ശ്രദ്ധിക്കപ്പെട്ടിരുന്നു. കരിയർ ബെസ്റ്റ് ബോക്സ് ഓഫീസ് ഓപ്പണിങ്ങുമായിട്ടാണ് ‘ആര്യന്‍’ കേരളക്കരയ്ക്ക് മുന്നിലെത്തിയത്.
സ്വഭാവിക അഭിനയത്തിലൂടെ പ്രശസ്തി നേടിയ വിഷ്ണുവിന്റെ ഏറ്റവും പുതിയ ചിത്രം ‘ഗാട്ട കുസ്തി 2’ആണ്. സ്ത്രീവിരുദ്ധമായ പ്രമേയങ്ങൾ അടങ്ങിയിട്ടുണ്ടെന്ന വിമർശനങ്ങൾക്കിടയിലും, ചിത്രം ആഗോളതലത്തിൽ 55 കോടിയിലധികം രൂപ നേടുകയും നിലവിൽ നെറ്റ്ഫ്ലിക്സിൽ സ്ട്രീം ചെയ്യുന്നുമുണ്ട്. മികച്ച വിജയം നേടിയാണ് ഈ സിനിമ മുന്നേറിയത്.
എന്നാല്‍ ഇപ്പോഴിതാ തന്റെ ഏറ്റവും പുതിയ ചിത്രം മികച്ച വിജയം നേടിയെങ്കിലും അതില്‍ സന്തോഷിക്കാനാവുന്നില്ലെന്ന് കുറിക്കുകയാണ് വിഷ്ണു വിശാല്‍. തന്റെ ജീവിതത്തില്‍ ഇപ്പോഴും മാറ്റങ്ങളില്ലെന്നും താൻ ഉത്കണ്ഠയും വിഷാദരോഗവും ഓട്ടോ ഇമ്മ്യൂൺ രോഗാവസ്ഥ നേരിടുന്നുണ്ടെന്നും സിനിമയുടെ വിജയത്തിനുശേഷവും തനിക്ക് ഒഴിഞ്ഞുമാറാത്ത ശൂന്യതയും തന്റെ പോസ്റ്റ് ആരുടെയും സഹതാപം പിടിച്ചുപറ്റാനല്ലെന്നും വർഷങ്ങളായുള്ള ചിന്തകളുടെ സമാഹാരം മാത്രമാണെന്നും താരം വ്യക്തമാക്കി.
‘‘2018-ലാണ് ഞാന്‍ ആദ്യമായി വിഷാദരോഗം അനുഭവിച്ചത്. 2020-ൽ അത് പരസ്യമാക്കി. സിനിമാ മേഖലയിലേക്ക് വരുമ്പോൾ കാര്യങ്ങൾ ശാന്തമാകുമെന്നും സ്ഥിരതയുള്ള ഒരു ജീവിതം ലഭിക്കുമെന്നും പ്രതീക്ഷിച്ചിരുന്നു. എന്നാൽ, ഒരു വലിയ ഇൻട്രോവേർട്ട് ആയതിനാൽ ഈ മേഖലയിലെ വൈകാരികമായ ഉയർച്ചതാഴ്ചകളോടും അനിശ്ചിതത്വങ്ങളോടും പൊരുത്തപ്പെടുന്നത് കഠിനവും വേദനാജനകവുമായിരുന്നു. രാക്ഷസൻ എന്ന ചിത്രത്തിന് ശേഷം നേരിട്ട വ്യക്തിപരമായ തിരിച്ചടിയാണ് എന്നെ വീണ്ടും വിഷാദത്തിലേക്കും ഉത്കണ്ഠയിലേക്കും തള്ളിയിട്ടത്. ഞാൻ അനുഭവിച്ചതെല്ലാം ഒരു ബ്ലോക്ക്ബസ്റ്റർ ഹിറ്റ് ചിത്രം മാറ്റുമെന്ന് പ്രതീക്ഷിച്ചുകൊണ്ട് കരിയറിൽ ശ്രദ്ധ കേന്ദ്രീകരിച്ചു.
തുടർന്ന് കോവിഡും അതിന്റെ തുടർച്ചയായ അനിശ്ചിതത്വവും വന്നു. പക്ഷേ എന്റെ ഉത്കണ്ഠ വർദ്ധിക്കുകയാണ് ചെയ്തത്. ഞാൻ തോറ്റുകൊടുത്തില്ല. ഞാൻ തിരിച്ചടിച്ച് കോവിഡിന് ശേഷം എഫ്ഐആര്‍, ഗട്ട കുസ്തി എന്നീ ചിത്രങ്ങളിലൂടെ വലിയ വിജയങ്ങൾ നൽകി. ഇനിയെല്ലാം ശരിയാകുമെന്ന് ഞാൻ കരുതി. എന്നാൽ അടുത്ത വർഷങ്ങൾ വെല്ലുവിളികളാണ് കൊണ്ടുവന്നത്. മാസങ്ങളോളം വെറുതെയിരിക്കേണ്ടിവന്നു. പ്രതിഫലം പോലും നൽകാത്ത ചലച്ചിത്ര പ്രവർത്തകരുടെ വാക്കുകൾ വിശ്വസിച്ച് സമയം കളഞ്ഞു. ബന്ധങ്ങൾക്കാണ് പണത്തേക്കാൾ പ്രാധാന്യമെന്നും പണം ഒടുവിൽ വരുമെന്നും ഞാൻ വിശ്വസിച്ചു. അതിനാൽ ഞാൻ ത്യാഗങ്ങൾ തുടർന്നു. എന്നാൽ അധിക സമയത്തിനും ജോലിക്കും എനിക്ക് ഒരിക്കലും പ്രതിഫലം ലഭിക്കില്ലെന്ന് ഒടുവിൽ ഞാൻ തിരിച്ചറിഞ്ഞു.
സ്വന്തമായി പ്രൊഡക്ഷൻ ഹൗസ് നടത്തുന്നതും ജീവനക്കാർക്ക് കൃത്യസമയത്ത് വേതനം നൽകുന്നതും സാമ്പത്തിക സമ്മർദ്ദം ഉണ്ടാക്കി. ഈ മാനസിക സമ്മർദ്ദം കാരണം ഓട്ടോ ഇമ്മ്യൂൺ പ്രശ്നം നേരിട്ടു. തുടർന്ന് ചികിത്സ തുടങ്ങി. ഈ എട്ട് വർഷത്തിനിടയിൽ, ഞാൻ നിരവധി കൗൺസിലിംഗ് സെഷനുകൾ നടത്തിയിട്ടുണ്ട്. പ്രത്യേകിച്ചും കഴിഞ്ഞ മൂന്ന് വർഷമായി, ഞാൻ വളരെ കൃത്യമായി തെറാപ്പി ചെയ്തുവരുന്നുണ്ട്. ഉത്കണ്ഠയ്ക്കും വിഷാദത്തിനുമായി മരുന്നുകളും കഴിച്ചിട്ടുണ്ട്. ഞാൻ വീണ്ടും കീഴടങ്ങാൻ തയ്യാറായില്ല. ഇതാ ഞാൻ, ഗാട്ട ഗുസ്തി 2 വലിയ വിജയം നേടി രണ്ട് മാസം പിന്നിട്ടിരിക്കുന്നു. എന്നിട്ടും... യാതൊരു മാറ്റവുമില്ല. വിജയം ലഭിക്കുമ്പോഴെല്ലാം സന്തോഷവും ആശ്വാസവും സംതൃപ്തിയും അനുഭവപ്പെടുന്നുണ്ട്. എന്നാൽ അതെല്ലാം നിമിഷനേരം മാത്രമേ നീണ്ടുനിൽക്കാറുള്ളൂ. എന്നിട്ട്, എങ്ങനെയോ, ഞാൻ വീണ്ടും അതേ ഉത്കണ്ഠയുള്ള മനസ്സിലേക്ക് മടങ്ങുന്നു. അതേ ശൂന്യത. എനിക്ക് മറ്റെന്തെങ്കിലും നേടിയെടുക്കണമെന്ന അതേ തോന്നൽ വരുന്നു.
13 വയസ്സുള്ളപ്പോൾ ഒരു ക്രിക്കറ്റ് കളിക്കാരനാകാൻ ആഗ്രഹിച്ചിരുന്നു. വിജയത്തിനായുള്ള യാത്രയിൽ എവിടെയോ എനിക്ക് ‘മനോഹരമായ നിമിഷങ്ങൾ’ നഷ്ടപ്പെട്ടു. കുടുംബത്തിലെ വിശേഷ അവസരങ്ങളും സ്നേഹിക്കുന്ന ആളുകളോടൊപ്പം ചെലവഴിക്കേണ്ട സമയവും എനിക്ക് നഷ്ടമായി. പണത്തെക്കുറിച്ച് അധികം ചിന്തിക്കാതെ കൂടുതൽ കഷ്ടപ്പെട്ടു. കഴിയുമായിരുന്നിട്ടും വേണ്ടത്ര പണം സമ്പാദിച്ചില്ല. ചിലപ്പോൾ സ്വന്തം ആരോഗ്യവുമായി വിട്ടുവീഴ്ച ചെയ്തു. സിനിമ ഉപേക്ഷിച്ച് ലളിതമായ ജീവിതത്തിലേക്ക് പോകുന്നതിനെക്കുറിച്ചും ആലോചിച്ചിരുന്നു.
സിനിമ ഉപേക്ഷിക്കുന്നതല്ല, ജീവിതം മാറ്റിവെക്കാതിരിക്കലാണ് വേണ്ടതെന്ന് ഞാൻ തിരിച്ചറിഞ്ഞു. ആരാധകർ തങ്ങളുടെ സ്വപ്നങ്ങൾ പിന്തുടരുമ്പോൾ ജീവിതം ആസ്വദിക്കാൻ മറക്കരുത്, ഉത്കണ്ഠയോടും വിഷാദത്തോടും പോരാടുന്നവര്‍ ആവശ്യമായ സഹായം തേടണമെന്ന അഭ്യര്‍ത്ഥനയും എനിക്കുണ്ട്...’’ വിഷ്ണു വിശാൽ സോഷ്യല്‍ മീഡിയയില്‍ കുറിച്ചു. വിഷ്ണുവിന്റെ ഈ തുറന്നുപറച്ചില്‍ വലിയ രീതിയില്‍ ആരാധകര്‍ ഏറ്റെടുത്തിട്ടുണ്ട്. പലരും ഇത്തരം കാര്യങ്ങള്‍ മൂടിവയ്ക്കാന്‍ ശ്രമിക്കുമ്പോള്‍ ഒരു സെലിബ്രിറ്റിയിത് തുറന്നു പറഞ്ഞത് നന്നായി എന്നാണ് പലരും കുറിക്കുന്നത്.
Comments