ഏകദേശം 90 വർഷം പഴക്കമുള്ള ഒരു പെയിന്റിങ്ങിലെ ദൃശ്യം കണ്ട് അമ്പരന്നിരിക്കുകയാണ് സോഷ്യൽ മീഡിയ. ചിത്രത്തിൽ ഒരാൾ കയ്യിൽ പിടിച്ചിരിക്കുന്ന കറുത്ത ചതുരാകൃതിയിലുള്ള വസ്തുവാണ് ഇപ്പോൾ വലിയ ചർച്ചയായിരിക്കുന്നത്. ഇന്നത്തെ സ്മാർട്ട്‌ഫോണിനോട് സാമ്യമുള്ള ഈ വസ്തു കണ്ട് ചിത്രത്തിൽ ടൈം ട്രാവലിന്റെ സൂചനയുണ്ടെന്ന തരത്തിലുള്ള വാദങ്ങളും സമൂഹമാധ്യമങ്ങളിൽ ഉയർന്നു.
1937ൽ അമേരിക്കൻ ചിത്രകാരനായ ഉംബെർട്ടോ റൊമാനോ വരച്ച ‘മിസ്റ്റർ പിൻചനും ദ സെറ്റ്ലിങ് ഓഫ് സ്പ്രിങ്ഫീൽഡും’ എന്ന ചുവർചിത്രത്തിലാണ് ഈ രംഗമുള്ളത്. പതിനേഴാം നൂറ്റാണ്ടിലെ ഇംഗ്ലീഷ് കുടിയേറ്റക്കാരും തദ്ദേശീയ ജനവിഭാഗങ്ങളും തമ്മിലുള്ള കൂടിക്കാഴ്ചയാണ് ചിത്രത്തിന്റെ പ്രമേയം. ചിത്രത്തിലെ ഒരാൾ കൈയിൽ പിടിച്ചിരിക്കുന്ന ചെറിയ ഇരുണ്ട വസ്തുവിലേക്ക് ശ്രദ്ധയോടെ നോക്കുന്നതാണ് ഇപ്പോൾ വൈറലായിരിക്കുന്നത്.
ചിത്രം വൈറലായതോടെ ‘അന്ന് സ്മാർട്ട്‌ഫോൺ എങ്ങനെ എത്തി?’ എന്ന ചോദ്യമാണ് പലരും ഉന്നയിച്ചത്. ചിലർ ഇത് ടൈം ട്രാവലിന്റെ തെളിവായിരിക്കാമെന്നുപോലും തമാശയായി പ്രതികരിച്ചു. എന്നാൽ ചിത്രകാരൻ ഭാവിയിലെ സാങ്കേതിക ഉപകരണം ചിത്രത്തിൽ ഉൾപ്പെടുത്തിയതാണെന്നതിന് യാതൊരു തെളിവുമില്ല. കാഴ്ചയിൽ സ്മാർട്ട്‌ഫോണിനോട് സാമ്യമുണ്ടെന്നത് മാത്രമാണ് ഇത്തരം വാദങ്ങൾക്ക് പിന്നിലെ പ്രധാന കാരണം.
യഥാർഥത്തിൽ ചിത്രത്തിലെ വസ്തു ഒരു ചെറിയ കൈക്കണ്ണാടിയായിരിക്കാനാണ് കൂടുതൽ സാധ്യതയെന്നാണ് വിശദീകരണം. യൂറോപ്യൻ വ്യാപാരത്തിലൂടെ തദ്ദേശീയ ജനവിഭാഗങ്ങൾക്ക് ചെറിയ കണ്ണാടികൾ ലഭിച്ചിരുന്നുവെന്ന ചരിത്ര പശ്ചാത്തലവും ഇതിനുണ്ട്. അതുകൊണ്ടുതന്നെ നൂറ്റാണ്ടുകൾ പഴക്കമുള്ള ഒരു രംഗത്തിൽ ആധുനിക സ്മാർട്ട്‌ഫോൺ പ്രത്യക്ഷപ്പെട്ടുവെന്ന വാദത്തിന് ചരിത്രപരമായ അടിത്തറയില്ല. എന്നിരുന്നാലും, ഇന്നത്തെ സാങ്കേതിക ഉപകരണത്തോട് ഇത്രയേറെ സാമ്യമുള്ള ഒരു വസ്തു 1937ലെ ചിത്രത്തിൽ പ്രത്യക്ഷപ്പെട്ടത് തന്നെയാണ് ചിത്രത്തെ വീണ്ടും വൈറലാക്കിയിരിക്കുന്നത്.
Comments