തിരുവനന്തപുരം: സംസ്ഥാനത്ത് വൈദ്യുതി നിയന്ത്രണം തുടരേണ്ടി വരുമെന്ന് ഏകീകൃതസമയം എന്നത് ഉടന്‍ നടപ്പാക്കാന്‍ കഴിയില്ലെന്നും വൈദ്യുതിമന്ത്രി സണ്ണിജോസഫ്. ആവശ്യം അനുസരിച്ചുള്ള വൈദ്യുതി ഉല്‍പ്പാദനം സംസ്ഥാനത്ത് നടക്കുന്നില്ലെന്നും ഇക്കാര്യത്തില്‍ അത്ഭുതങ്ങള്‍ പ്രവര്‍ത്തിക്കാന്‍ കഴിയില്ലെന്നും മന്ത്രി പ്രതികരിച്ചു.
അഖിലേന്ത്യാ തലത്തില്‍ തന്നെ വൈദ്യുതിയുടെ ഉപഭോഗം കൂടുകയും ഉല്‍പ്പാദനം കുറയുകയും ചെയ്യുന്ന സാഹചര്യമുണ്ട്. ചൂട് കൂടുമ്പോള്‍ വൈദ്യുതി ഉപയോഗവും കൂടും. എസിയും ഫാനും പ്രവര്‍ത്തിപ്പിക്കുന്നതിന് പുറമെ വൈദ്യുതി വാഹനങ്ങള്‍ ചാര്‍ജ്ജ് ചെയ്യുന്നതും രാത്രിയിലാണ്. വരും കാലത്തേക്ക് വൈദ്യുതിയുടെ ആവശ്യം കൂടി വരികയാണ്. ഈ സാഹചര്യത്തില്‍ ഒന്നിലധികം തവണ വൈദ്യുതി നിയന്ത്രണം നടത്താന്‍ സര്‍ക്കാര്‍ നിര്‍ബ്ബന്ധിതമായിരിക്കുകയാണ്. അതല്ലാതെ സര്‍ക്കാരിന് മാര്‍ഗ്ഗമില്ല. അടിയന്തിരമായി പുറത്തുനിന്നും വൈദ്യുതി വാങ്ങാന്‍ സാഹചര്യമില്ല. കരാറില്‍ ഏര്‍പ്പെടണമെങ്കില്‍ അതിന്റെ നടപടിക്രമങ്ങള്‍ പൂര്‍ത്തിയാക്കണം. അത് നടപ്പിലാക്കാന്‍ മാസങ്ങള്‍ എടുക്കും.
സോളാര്‍ രാത്രി കാലത്തേക്ക് സൂക്ഷിച്ചുവെച്ച് ഉപയോഗിക്കാന്‍ സ്‌റ്റോര്‍ ചെയ്യാനുള്ള സ്‌ക്രീനിംഗ് സംവിധാനം ഇല്ല. വിവിധ ജില്ലകളില്‍ ഇതിനുള്ള പദ്ധതികള്‍ നടന്നുവരികയാണ്. ബ്രഹ്മപുരത്തെ പദ്ധതികളുടെ പ്രവര്‍ത്തനങ്ങളുമായി മുമ്പോട്ട് പോകും. സംസ്ഥാനത്തിന്റെ ആവശ്യത്തിന് 25 ശതമാനം വൈദ്യുതി മാത്രമേ കേരളത്തിന് ഉല്‍പ്പാദിപ്പിക്കുന്നുള്ളൂ. പുതിയ ജലവൈദ്യൂതി പദ്ധതികള്‍ തുടങ്ങാന്‍ സാധിക്കുന്നില്ല. ആണവ വൈദ്യുതി മറ്റു സംസ്ഥാനങ്ങള്‍ നടത്തുമ്പോള്‍ കേരളത്തിന് അത് സാധിക്കുന്നില്ല. ആണവ വൈദ്യുതി പദ്ധതിയും സാങ്കേതിക പ്രശന്ം വരുന്ന സാഹചര്യത്തിലാണ് പുറത്ത് നിന്നും വാങ്ങേണ്ടി വരുന്നത്.
എന്നാല്‍ പുറത്തുനിന്നും വൈദ്യുതി വാങ്ങുന്ന കരാര്‍ കഴിഞ്ഞ സര്‍ക്കാരിന്റെ കാലത്ത് റദ്ദാക്കി. വൈദ്യുതി വിതരണക്കാര്‍ ഏജന്‍സികളിലേക്കും മറ്റു സംസ്ഥാന സര്‍ക്കാരുകളിലേക്കും പോയി. നിലവിലെ വൈദ്യുതി പ്രതിസന്ധി സ്വിച്ചിട്ട് നിര്‍ത്താനാകില്ല. ജനങ്ങളുടെ സഹകരണം ഉണ്ടാകണമെന്നും മന്ത്രി സണ്ണിജോസഫ് പറഞ്ഞു. പദ്ധതികള്‍ ഉടന്‍ നടപ്പിലാക്കാനുള്ള നീക്കത്തിലാണെന്നും മന്ത്രി വ്യക്തമാക്കി.
Comments