കൊച്ചി: എറണാകുളം പൂതൃക്ക പഞ്ചായത്തിലെ ഉപതെരഞ്ഞെടുപ്പില്‍ ട്വന്റി ട്വന്റി ഒറ്റയ്ക്ക് മത്സരിക്കുന്നു. ഉപതെരഞ്ഞെടുപ്പില്‍ ട്വന്റി ട്വന്റി ഇറക്കിയിരിക്കുന്ന പ്രചാരണ പോസ്റ്ററുകള്‍ എന്‍ഡിഎ മുന്നണി ബന്ധം പരാമര്‍ശിക്കാത്തതാണ് സംശയത്തിന് കാരണമായിരിക്കുന്നത്.
ഇതിന് പുറമേ പ്രചാരണ പ്രവര്‍ത്തനങ്ങളില്‍ ബിജെപി പ്രവര്‍ത്തകരെ ഒഴിവാക്കി എന്നും ആക്ഷേപമുണ്ട്. ബിജെപി - ട്വന്റി ട്വന്റി കൂട്ടുകെട്ടിന് പിന്നാലെ വിവാദങ്ങളുടെ പുറത്ത് ഭരണം നഷ്ടമായ പഞ്ചായത്താണ് പൂതൃക്ക. ട്വന്റി ട്വന്റിയുടെ മെമ്പറും പഞ്ചായത്ത് പ്രസിഡന്റുമായിരുന്ന പൂജാ ജോമോന്‍ രാജിവച്ചിരുന്നു. ഈ സാഹചര്യത്തിലാണ് പൂതൃക്ക പഞ്ചായത്തില്‍ ഉപതെരഞ്ഞെടുപ്പ് വന്നത്.
ബിജെപിയുമായി ചേര്‍ന്ന് മത്സരിച്ചപ്പോള്‍ വോട്ടുചോര്‍ച്ചയുണ്ടായി എന്ന ആക്ഷേപത്തിലാണ് ട്വന്റിട്വന്റി തനിച്ച് മത്സരിക്കാന്‍ തീരുമാനിച്ചതെന്നാണ് സംസാരം. പോസ്റ്ററില്‍ ഒരിടത്തും എന്‍ഡിഎ എന്ന പരാമര്‍ശമില്ല. പ്രചരണത്തില്‍ നിന്നും ബിജെപി പ്രവര്‍ത്തകരെ ഒഴിവാക്കുകയും ചെയ്തിരിക്കുകയാണ്.
Comments