കൊച്ചിയില്‍ നടന്ന തന്റെ പുതിയ ചിത്രം ' ആശ' യുടെ പ്രസ് മീറ്റിനിടെ ഇംഗ്ലീഷ് സംസാരിച്ച അവതാരകയോട് നടി ഉര്‍വശി പറഞ്ഞ വാക്കുകളാണ് ഇപ്പോള്‍ ശ്രദ്ധ നേടുന്നത്.
ഉര്‍വശി സംസാരിക്കുന്നതിന് മുന്നോടിയായി നടിയെ സ്വാഗതം ചെയ്തു കൊണ്ട് അവതാരക ഇംഗ്ലീഷില്‍ സംസാരിച്ചതിനാണ് ഉര്‍വശി മറുപടി നല്‍കിയത്. 'കൊച്ചേ, കേരളത്തില്‍ നിന്നു കൊണ്ട് മലയാളികള്‍ അത്രയും വലിയ ആള്‍ക്കാരാണെന്ന് പറഞ്ഞിട്ട് ഇംഗ്ലീഷില്‍ എന്തോന്നാ ഈ കടുക് വറക്കുന്നത് ?. മലയാളികളല്ലേ ഇവിടെ നില്‍ക്കുന്ന എല്ലാവരും.
ഞാന്‍ വിചാരിച്ചു, ഐശ്വര്യ ലക്ഷ്മി ചെന്നൈയില്‍ നിന്ന് തിരക്കിട്ട് എത്തിയതിനാലാകാം അവരോട് ഇംഗ്ലീഷില്‍ സംസാരിക്കുന്നതെന്ന്. എന്നെയും ഇംഗ്ലീഷില്‍ പറഞ്ഞ് അറ്റാക്ക് ചെയ്യുകയാണ്. നിങ്ങള്‍ എന്താ റിയാക്ട് ചെയ്യാത്തെ പിള്ളേരേ, എന്നെ ഒന്ന് രക്ഷപ്പെടുത്ത്. നമ്മള്‍ നമ്മുടെ നാട്ടില്‍, നമ്മുടെ സദസ്സില്‍ സംസാരിക്കുമ്പോള്‍ എല്ലാവര്‍ക്കും മനസിലാകുന്ന രീതിയില്‍ മലയാളത്തില്‍ തന്നെ സംസാരിച്ചാല്‍ മതി. എല്ലാവര്‍ക്കും മനസിലാകില്ലേ. മലയാളം അറിയാവുന്നവരല്ലേ ഇവിടെ കാണുന്നത്'. - ഉര്‍വശി പറഞ്ഞു.
പുതുമുഖ സംവിധായകന്‍ സനല്‍ സഫര്‍ ഒരുക്കുന്ന ചിത്രമാണ് 'ആശ'. സഫര്‍ സനല്‍, രമേശ് ഗിരിജ, ജോജു ജോര്‍ജ് എന്നിവര്‍ ചേര്‍ന്നാണ് ചിത്രത്തിന് തിരക്കഥയൊരുക്കിയിരിക്കുന്നത്. ഉർവശി, ജോജു ജോർജ്, ഐശ്വര്യ ലക്ഷ്മി, വിജയരാഘവൻ തുടങ്ങിയവരാണ് ചിത്രത്തിൽ പ്രധാന കഥാപാത്രങ്ങളെ അവതരിപിക്കുന്നത്. ഗോവിന്ദ് വസന്തയാണ് ചിത്രത്തിന്റെ സംഗീതം നിർവഹിച്ചിരിക്കുന്നത്.
Comments