കുടുംബപ്രേക്ഷകര്‍ക്ക് ഏറെയിഷ്ടമുള്ള താരങ്ങളില്‍ ഒരാളാണ് അനുമോള്‍. സീരിയലുകളിലൂടെയും ടെലിവിഷന്‍ ഷോകളിലൂടെയും സോഷ്യല്‍ മീഡിയയിലൂടെയുമാണ് അനുമോള്‍ പ്രേക്ഷകര്‍ക്ക് പ്രിയങ്കരിയായത്. സ്റ്റാർ മാജിക് എന്ന പരിപാടിയിലൂടെയാണ് അനു ഏറെ ശ്രദ്ധിക്കപ്പെട്ടത്. പിന്നീട് ബിഗ് ബോസ് മലയാളം സീസണ്‍ ഏഴില്‍ മത്സരാര്‍ത്ഥിയായും പിന്നീട് ജേതാവായും മാറിയതോടെ അനുമോളുടെ പ്രേക്ഷ‍കപ്രീതി കൂടി. തിങ്കള്‍ മുതല്‍ വെള്ളി വരെ, കല്യാണം, മഹേഷും മാരുതിയും തുടങ്ങിയ സിനിമകളിലും സീരിയലുകളിലും വേഷമിട്ട താരം മികച്ച നടിക്കുള്ള കേരള സംസ്ഥാന ടെലിവിഷൻ പുരസ്കാരവും സ്വന്തമാക്കിയിട്ടുണ്ട്.
ഈയടുത്താണ് താരം തമിഴ്നാട് സ്വദേശി ഭുവനേഷിനെ വിവാഹം ചെയ്തത്. ഗുരുവായൂര്‍ അമ്പലനടയില്‍ നിന്നുള്ള വിവാഹചിത്രങ്ങള്‍ പങ്കിട്ടാണ് താരം തന്റെ വിവാഹവാര്‍ത്ത ആരാധകരെ അറിയിച്ചത്. ഇവരുടെ വിശേഷങ്ങളറിയാന്‍ പ്രേക്ഷകര്‍ക്ക് വലിയ താത്പര്യമാണ്. ഇക്കഴിഞ്ഞ ദിവസം താരത്തിന്റെ വളരെ വ്യത്യസ്തമായ മുഖത്തോടു കൂടിയുള്ള ചിത്രങ്ങള്‍ പ്രേക്ഷകര്‍ക്ക് മുന്നിലെത്തിയിരുന്നു. മുഖം മുഴുവന്‍ നീരു വന്ന് വീങ്ങി അനുമോളാണെന്ന് തിരിച്ചറിയാന്‍ പോലും പറ്റാത്ത ചിത്രങ്ങളായിരുന്നു എല്ലാം. അതോടെ ഭുവനേഷും അനുമോളും തമ്മില്‍ പ്രശ്നങ്ങളുണ്ടെന്ന തരത്തിലുള്ള അനുമാനങ്ങളും വന്നു.
ഇപ്പോഴിതാ എല്ലാ സംശയങ്ങള്‍ക്കും മറുപടി നല്‍കുകയാണ് അനുമോളുടെ ഭര്‍ത്താവ് ഭുവനേഷ്. അനുമോളുടെ കവിളില്‍ നീരുവന്ന് വീങ്ങിയിരിക്കുന്ന ദൃശ്യങ്ങളാണ് ഭുവനേഷ് പങ്കുവച്ചത്. അനുവിന് എന്തുപറ്റിയെന്നും വീഡിയോയ്ക്ക് താഴെ ആരാധകർ ചോദിക്കുന്നുണ്ട്.
‘ഞാൻ ഒരടി കൊടുത്തതാ, അതുകൊണ്ടാണ് കവിള്‍ ഇങ്ങനെ വീർത്തിരിക്കുന്നത്...’ എന്ന് തമാശരൂപേണ പറഞ്ഞാണ് ഭുവനേഷ് വീഡിയോ തുടങ്ങുന്നത്.
‘രാത്രി ഞാൻ അനുവിന്റെ അടുത്താണ് കിടന്നത്. എന്നാല്‍ ഉണർന്നപ്പോള്‍ വേറെ ആരോ എന്റെ അടുത്ത് കിടക്കുന്നു. നിങ്ങള്‍ ആരാണ്?’ എന്ന തമാശയ്ക്ക് ഭുവനേഷ് ചോദിക്കുമ്പോള്‍ ‘ഇവൻ എന്നെ അടിച്ചു...’ എന്ന് ചെറിയ ശബ്ദത്തില്‍ കുഞ്ഞുചിരിയോടെ അനുമോള്‍ പറയുന്നുണ്ട്. അനുമോളുടെ പല്ല് എടുത്തതിനെ തുടർന്നാണ് കവിള്‍ ഇത്തരത്തില്‍ വീങ്ങിയിരിക്കുന്നതെന്ന് അനുമോളും ഭുവനേഷും വ്യക്തമാക്കുന്നുമുണ്ട്. കഠിനമായ വേദനകാരണം സംസാരിക്കാൻ പോലും പ്രയാസപ്പെടുന്ന അനുമോളെയും വീഡിയോയില്‍ കാണാം.
Comments